1 Beno kembila Yave, samu ti yandi kele mbote,

samu ti kukwikama ya yandi ke zingilaka bantangu nyonso.

2 Bika ti bayina nyonso Yave me kuula, bawu kutuba yawu,

bika ti bayina nyonso yandi me katula na maboko ya mutantu,

3 bayina yandi me katula na bayinsi nyonso,

kubanda na esete, na wesete, na node mpe na sude, bawu kutuba yawu!

4 Bawu vwandaka kwenda dyengila na yinsi ya kuyuma, ntoto yina ata kima ke menaka,

bawu kuzwaka ve nzila ya mbanza, kisika yina bawu zolaka kwenda zinga.

5 Bawu vwandaka na nsatu mpe na mpwila ya maza,

bawu vwandaka me lemba.

6 Na kati ya mpasi, bawu lookaka na Yave,

mpe yandi kuulaka bawu na bampasi ya bawu.

7 Yandi twadisaka bawu na nzila ya kusungama,

samu ti bawu kwenda zinga na mbanza mosi.

8 Bika ti bawu kukembila Yave samu na kukwikama ya yandi,

mpe samu na mambu ya yandi ya ngitukulu yina yandi salaka na bantu,

9 samu ti yandi pesaka maza na bantu yina vwandaka na mpwila ya maza,

yandi yukutisaka bayina vwandaka na nsatu.

10 Bantu ya nkaka vwandaka zinga na kati ya kitombe, mpe na mpasi ya lufwa,

bawu vwandaka ya kukangama na kati ya bampasi, mpe na bampanga,

11 samu ti bawu tumamaka ve na mambu ya Nzambi,

samu ti bawu vwezaka malongi ya Nzambi ya Kulutila Kuzangama.

12 Nzambi kululaka bawu na kutalisa bawu mpasi,

bawu kubwaka, kubwa mosi kondwa muntu yina ke sadisa bawu.

13 Na kati ya mpasi, bawu lookaka na Yave,

mpe yandi kuulaka bawu na bampasi ya bawu.

14 Yandi basisaka bawu na kitombe mpe na mpasi ya lufwa,

mpe yandi zengaka bampanga ya bawu.

15 Bika ti bawu kukembila Yave samu na kukwikama ya yandi,

mpe samu na mambu ya yandi ya ngitukulu yina yandi salaka na bantu,

16 samu ti yandi me mwangisa myelo ya kisengo ya mbwaki,

yandi me zenga bikangulu ya kisengo.

17 Ba ya nkaka vwandaka bantu ya buzoba, samu na kukondwa kutumama ya bawu,

samu na yimbi ya bawu, bawu talaka mpasi.

18 Bawu vwandaka yina konso kima ya kudya,

mpe bawu kumaka na mwelo ya lufwa.

19 Na kati ya mpasi, bawu lookaka na Yave,

mpe yandi kuulaka bawu na bampasi ya bawu.

20 Yandi fidisaka bawu mambu ya yandi mpe yandi nyakisaka bawu.

Yandi kuulaka bawu na mpasi ya lufwa.

21 Bika ti bawu kukembila Yave samu na kukwikama ya yandi,

mpe samu na mambu ya yandi ya ngitukulu yina yandi salaka na bantu,

22 Bika ti bawu kupesa yandi minkayulu ya matondo,

bika ti bawu kuzonzila mambu ya yandi na kati ya milolo ya nsayi.

23 Bayina, vwandaka zyeta na mubu na kati ya babwatu,

mpe vwandaka sala mumbungu na kati ya maza ya nene,

24 bawu talaka mambu yina Yave salaka,

mpe mambu ya ngitukulu yina yandi salaka na yisi ya maza ya sunda mingi.

25 Yandi tubaka mpe kitembo salamaka,

yawu nangunaka bimpo ya mubu.

26 Babwatu ya bawu vwandaka yuluka na zulu

mpe yawu vwandaka kwenda tii na yisi ya maza ya sunda mingi,

bawu kumaka na mpasi mingi.

27 Kizungu-zungu simbaka bawu, bawu kumaka mutindu bantu me kola malafu,

mayela ya bawu dyamaka na maza ya mubu.

28 Na kati ya mpasi, bawu lookaka na Yave,

mpe yandi kuulaka bawu na bampasi ya bawu.

29 Yandi dingimisaka kitembo,

yandi vutulaka kizunu mpe bimpo kumaka swi.

30 Bawu yangalalaka na yina kitembo dingamaka,

yandi nataka bawu na kisika yina, bawu zolaka na kukanga babwatu ya bawu.

31 Bika ti bawu kukembila Yave samu na kukwikama ya yandi,

mpe samu na mambu ya yandi ya ngitukulu yina yandi salaka na bantu,

32 Bika ti bawu kukembila bunene ya yandi na kati ya lukutakanu ya bantu!

Bika ti bawu kuyimbila yandi mikunga ya nzitusu na lukutakanu ya bakuluntu!

33 Yandi ke kitulaka banzadi na yinsi ya kuyuma,

yandi ke kitulaka bayinto na ntoto ya kukawuka.

34 Yandi ke kitulaka ntoto ya madya na ntoto yina ke pesaka ve madya,

nyonso yina samu na mavanga ya yimbi ya bantu yina ke zingaka kuna.

35 Yandi ke kitulaka yinsi ya kuyuma na dyanga ya maza,

yandi ke kitulaka ntoto ya kukawuka na bayinto ya maza,

36 yandi ke tula kuna, bantu yina kele na nsatu,

bawu ke tunga mbanza samu na kuzinga kuna,

37 bawu ke kunda bambuma na bilanga,

mpe bawu ke kunda bilanga ya bayinti ya vinu,

yawu ke buta bambuma mingi.

38 Yandi ke sakumuna yawu mpe yawu ke kuma mingi,

yandi ke bika ve ti lutangu ya bibulu ya bawu kukuluka.

39 Ba ya nkaka ke kuma ndambu,

bawu ke kufwa samu na mpasi mpe samu na nkwamusu.

40 Nzambi ke salaka ti ba vweza bantu ya mfunu,

yandi ke salaka ti bawu kudyengila na yinsi ya kuyuma kisika yina nzila kele ve.

41 Yandi ke katulaka mputu na mpasi,

yandi ke salaka ti makanda kukuma mingi mutindu nkonga ya mameme.

42 Bantu ya kusungama ke talaka yandi, mpe bawu ke yangalalaka.

Kasi bantu ya mavanga ya yimbi ke kanga bayinwa ya bawu.

43 Bika ti muntu ya ndwenga sala keba na mambu nyonso yayi,

bika ti yandi zaba ti Yave kele mbote.