1 Aleluya!

Beno kembila Nkumbu ya Yave,

beno kembila yandi, beno bisyelo ya Yave,

2 beno yina ke na kusala na Yinzo ya Yave,

mpe na ngaanda ya lupangu ya Yinzo ya Nzambi ya beto!

3 Aleluya! Samu ti Yave kele mbote,

beno yimbila samu na Nkumbu ya yandi, samu ti yandi kele kitoko!

4 Samu ti Yave me soola Yakobi,

yandi me sala ti Isayeli kuvwanda mvwilu ya yandi mosi.

5 Ya tsyelika, mu zaba ti Yave kele Nzambi ya nene,

mu zaba ti Mfumu ya beto me lutila banzambi nyonso.

6 Nyonso yina Yave ke zolaka na kusala,

yandi ke salaka yawu,

ya vwanda na zulu to na ntoto,

na mubu mpe na bisika nyonso ya kusunda mingi.

7 Yandi ke nangunaka matuti,

katuka kuna na bandilu ya ntoto,

yandi ke basisaka balusyemo na bamvula,

yandi ke basisaka mupepe na kiswekolo ya yawu.

8 Ni yandi kufwaka bana ya ntete ya bantu ya Ngipiti,

kubanda na bantu tii na bibulu.

9 Yandi lakisaka bidimbu, bimangu,

na kati-kati ya nge, Ngipiti,

samu na kupesa kitumbu na Falawo mpe bantu nyonso yina ke salaka na yandi.

10 Yandi nungaka bayinsi mingi,

yandi salaka ti bantinu ya lulendo kufwa:

11 Siwone ntinu ya ba-Amoli,

Onge ntinu ya Basane,

mpe bantinu nyonso ya Kaana.

12 Yave pesaka bayinsi ya bawu mutindu mvwilu,

yandi pesaka yawu mutindu mvwilu na Isayeli, bantu ya yandi.

13 Yave Nkumbu ya nge kele ya bantangu nyonso!

Bambandu na bambandu, bantu ke bambukila Nkumbu ya nge moyo.

14 Ya tsyelika Yave ke fundisa bantu ya yandi,

kasi yandi ke fwila bisadi ya yandi kyadi.

15 Banzambi ya biteki ya bantu ya bayinsi,

ya kele ya wolo mpe palata,

yawu kele bima yina bantu me yidika.

16 Bawu kele na bayinwa, kasi bawu ke zonzaka ve.

Bawu kele na meso kasi bawu ke talaka ve,

17 bawu kele na makutu kasi bawu ke kuwaka ve,

kiwumunu ke basikaka ve na bayinwa ya bawu.

18 Bayina ke yidikaka yawu kele kaka mutindu mosi na biteki yina,

mutindu mosi, na bantu yina ke tulaka kivuvu ya bawu na biteki yango!

19 Beno bantu ya Isayeli, beno tonda Yave!

Beno bana ya Aloni, beno tonda Yave!

20 Beno dikanda ya Levi, beno tonda Yave!

Beno yina ke zitisaka Yave, beno tonda Yave!

21 Bika ti kuna na Siyone, bantu kutonda Yave,

yina ke zingaka na Yelusalemi!

Aleluya!