136
Nzambi ya luzolo yina ke vuukisaka
1 Beno kembila Yave, samu ti yandi kele mbote,
samu ti kukwikama ya yandi ke zingilaka bantangu nyonso!
2 Beno kembila Nzambi ya banzambi,
samu ti kukwikama ya yandi ke zingilaka bantangu nyonso!
3 Beno kembila Mfumu ya bamfumu, samu ti yandi kele mbote,
samu ti kukwikama ya yandi ke zingilaka bantangu nyonso!
4 Kaka ni yandi ke salaka mambu ya nene, na ya ngitukulu,
samu ti kukwikama ya yandi ke zingilaka bantangu nyonso!
5 Ni yandi yidikaka mazulu na mayela ya yandi,
samu ti kukwikama ya yandi ke zingilaka bantangu nyonso!
6 Ni yandi yalumunaka ntoto na zulu ya maza,
samu ti kukwikama ya yandi ke zingilaka bantangu nyonso!
7 Ni yandi yidikaka ntangu, ngonda na bambwetete,
samu ti kukwikama ya yandi ke zingilaka bantangu nyonso!
8 Ntangu samu na kuyalaka kilumbu,
samu ti kukwikama ya yandi ke zingilaka bantangu nyonso!
9 Ngonda na bambwetete samu na kuyalaka na mpimpa,
samu ti kukwikama ya yandi ke zingilaka bantangu nyonso!
10 Ni yandi salaka ti bana ya ntete ya bantu na ya bibulu kufwa na Ngipiti,
samu ti kukwikama ya yandi ke zingilaka bantangu nyonso!
11 Ni yandi basisaka bana ya Isayeli na Ngipiti,
samu ti kukwikama ya yandi ke zingilaka bantangu nyonso!
12 Na lulendo ya diboko ya yandi,
samu ti kukwikama ya yandi ke zingilaka bantangu nyonso!
13 Yandi kabulaka Mubu ya Batwandu na bandambu zole,
samu ti kukwikama ya yandi ke zingilaka bantangu nyonso!
14 Ni yandi salaka ti bana ya Isayeli kutambula na kati-kati ya mubu,
samu ti kukwikama ya yandi ke zingilaka bantangu nyonso!
15 Ni yandi salaka ti Falawo na binwani ya yandi kufwa na kati ya Mubu ya Batwandu,
samu ti kukwikama ya yandi ke zingilaka bantangu nyonso!
16 Ni yandi twadisaka bantu ya yandi kuna na yinsi ya kuyuma,
samu ti kukwikama ya yandi ke zingilaka bantangu nyonso!
17 Ni yandi kufwaka bantinu ya nene,
samu ti kukwikama ya yandi ke zingilaka bantangu nyonso!
18 Ni yandi kufwaka bantinu ya lulendo,
samu ti kukwikama ya yandi ke zingilaka bantangu nyonso!
19 Ya vwandaka Siwone ntinu ya ba-Amoli,
samu ti kukwikama ya yandi ke zingilaka bantangu nyonso!
20 Mpe Onge ntinu ya Basane,
samu ti kukwikama ya yandi ke zingilaka bantangu nyonso!
21 Ni yandi pesaka bayinsi ya bantinu yina mutindu mvwilu,
samu ti kukwikama ya yandi ke zingilaka bantangu nyonso!
22 Ni yandi pesaka yawu mutindu mvwilu na bana ya Isayeli, kisyelo ya yandi,
samu ti kukwikama ya yandi ke zingilaka bantangu nyonso!
23 Ni yandi bambukilaka beto moyo ntangu beto vwandaka na mpasi,
samu ti kukwikama ya yandi ke zingilaka bantangu nyonso!
24 Ni yandi kuulaka beto na maboko ya bayina vwandaka kwamisa beto,
samu ti kukwikama ya yandi ke zingilaka bantangu nyonso!
25 Ni yandi ke pesaka madya na bantu nyonso,
samu ti kukwikama ya yandi ke zingilaka bantangu nyonso!
26 Beno kembila Nzambi ya mazulu,
samu ti kukwikama ya yandi ke zingilaka bantangu nyonso!