Yave mu ke na kubokila nge, kwiza nswalu sumu na kusadisa munu.

Teka dikutu ya nge samu na kuwa munu ntangu mu ke na kubokila nge!

2 Bika ti lusambulu ya munu kuyuluka na mantwala ya nge mutindu maaka ya nsunga ya mbote,

mpe ti mu nanguna maboko ya munu na sika ya nge mutindu munkayulu ya nkokila.

3 Yave, keba mambu ya yinwa ya munu,

keba mwelo ya bikoba ya munu!

4 Kubika ve ti ntima ya munu kusadila mambu ya yimbi.

Kubika ve ti mu yidika mambu ya yimbi

kintwadi na bantu yina ke salaka yimbi!

Kubika ve ti mu kudya kisika mosi na bawu na bafeti ya bawu.

5 Kana muntu ya kusungama bula munu, yawu zola kutuba ti yandi zola munu,

kana yandi kusemba munu, yawu kele mutindu mananasi na zulu ya yintu ya munu,

mu ke manga yawu ve,

mu ke tatamana na kusambila samu na kusukisa yimbi ya bawu.

6 Bika ti ba losa bazuzi ya bawu na zulu ya matadi ya nene,

mpe bawu ke kuwa mambu ya munu samu ti yawu kele mbote.

7 Mutindu ntoto me pasuka mpe me funguka,

mikwa ya beto me mwangana na mantwala ya mwelo ya yinsi ya bafwa.

8 Ni na sika ya nge Yave, Mfumu, meso ya munu ke na kutala,

ni na sika ya nge mu ke bumbamaka,

kubika ve ti ba kufwa munu.

9 Keba munu na mitambu yina ba me tambila munu,

mpe mabulu yina ba me timuna samu na kubwisa munu!

10 Bika ti bantu ya yimbi kubwa na mitambu ya bawu mosi,

mpe munu, mu kuvuuka!