140
Lusambulu samu na lukengolo
1 Mukunga ya Davidi. Mukunga yina ba yimbilaka na lutwadusu ya mfumu ya miyimbidi.
2 Yave, kuula munu na maboko ya bantu ya yimbi,
keba munu na maboko ya bantu yina ke sala mambu nyonso na ngolo.
3 Na kati ya bantima ya bawu, bawu ke kanisaka kaka na kusala yimbi,
konso ntangu, bawu ke sosaka na kusala bamvita!
4 Bawu ke lengulaka baludimi ya bawu mutindu banyoka,
bawu kele na mante ya nyoka na bikoba ya bawu.
Kupema
5 Yave, sala ti mu kubwa ve na maboko ya bantu ya yimbi!
Keba munu na bantu yina ke salaka mambu nyonso na ngolo,
bawu ke na kusosa na kubwisa munu!
6 Bantu ya lunangu me sadila munu mitambu mpe bawu me kubika basinga samu na kukanga munu,
bawu me tula bampwasa na nzila nyonso,
bawu me timuna mabulu samu ti mu kubwa.
Kupema
7 Mu me tuba na Yave:
«Nge kele Nzambi ya munu!»
Yave, teka dikutu na kubondila yina mu ke na kubondila nge!
8 Yave Mfumu, nge kele ngolo yina ke vuukisaka munu,
nge ke kebaka yintu ya munu na ntangu ya mvita.
9 Yave, kupesa ve na bantu ya yimbi nyonso yina bawu ke na kusosa,
kusala ve ti mambu yina bawu me kubika yawu kusalama.
Kupema
kana ve bawu ke sala lunangu!
10 Bantu yina me zunga munu,
bika ti, mambu yina ya mpasi yina bawu ke na kukubika samu na munu, kubwidila bawu mosi.
11 Bika ti, makala ya tiya kubwidila bawu na zulu ya bayintu ya bawu,
bika ti, bawu kubwa na kati ya tiya,
bika ti, bawu kubwa na kati ya dibulu ya kisika yina bawu lenda basika dyaka ve!
12 Bantu yina ke na kuzonza mambu ya luvunu, bawu kuzingila ve na yinsi,
bantu yina ke salaka mambu nyonso kaka na ngolo, mpasi kulanda bawu mpe bawu kuzwa ve kizunu.
13 Mu zaba ti Yave, ke nwaninaka bamputu,
yandi ke nungisaka bantu ya mpasi.
14 Ya tsyelika bantu ya kudedama ke kembila Nkumbu ya nge,
mpe bantu ya kusungama ke zinga na ntadisi ya nge.