Yave nge me fyongonina munu mbote-mbote,

nge zaba munu mbote.

2 Nzambi, nge zaba ntangu mu ke vwandaka mpe ntangu mu ke telamaka,

Ata ti nge vwanda ntama, nge me zaba mabanza ya munu.

3 Nge ke zabaka ntangu mu ke tambulaka mpe ntangu mu ke lalaka,

nge zaba banzila ya munu nyonso.

4 Tekila ti mu zonza dyambu,

nge Yave, nge ke zabaka nyonso yina mu ke zonza.

5 Nge ke vwandaka na manima ya munu, nge ke vwandaka mpe na mantwala ya munu,

nge ke zungaka munu,

nge ke simbaka munu na diboko ya nge.

6 Luzabu ya mutindu yina kele ya ngitukulu samu na munu,

yawu me lutila mayela ya munu.

7 Wapi kisika yina mu lenda kwenda, ntama na Mpeve ya nge?

Wapi kisika yina mu lenda kima ntama na kizizi ya nge?

8 Kana mu kwenda na zulu, nge kele kuna mpe,

kana mu lala kuna na yinsi ya bafwa, nge kele kuna mpe.

9 Kana mu dumuka mutindu ndeke tii na kisika yina ntangu ke basikaka,

to kana mu kwenda zinga kuna na ndilu ya mubu,

10 kuna mpe diboko ya nge ke twadisa munu,

diboko ya nge ya lubakala ke simba munu ngolo.

11 Kana mu tuba: «Kitombe kufuka munu,

mpe mpimpa kukituka nsemo na kisika yina mu kele,»

12 samu na nge, kitombe kele ve kitombe,

mpe mpimpa ke lezimaka mutindu bwisi me kutsya,

mpe kitombe kele mutindu nsemo.

13 Ni nge yidikaka munu,

ni nge bumbaka munu na kivumu ya mama ya munu.

14 Mu ke na kukembila nge na yina nge me tula munu na lweka na mutindu mosi ya ngitukulu.

Mambu nge ke salaka kele ya ngitukulu,

mu zaba yawu mpe mu zaba yawu mbote.

15 Nzutu ya munu vwandaka ve ya kubumbama,

ntangu yina nge vwandaka yidika munu na mansweki,

nge syetaka munu na kati-kati ya yisi ya ntoto.

16 Ntangu mu vwandaka ntete ve ya kuyilama mbote-mbote, meso ya nge vwandaka tala munu.

Bilumbu nyonso ya luzingu ya munu

vwandaka ya kusonama yimeni na dibuku ya nge,

tekila ti bilumbu yango kusalama.

17 Oo, Nzambi, ya kele mpasi na kuzaba mabanza ya nge,

lutangu ya yawu kele mingi ya kulutila!

18 Kana mu meka na kutanga yawu,

yawu kele mingi kulutila munyenge ya mubu,

ntangu mu ke vumbukaka na pongi,

mu kele dyaka na nge.

19 Oo, Nzambi, sala ti muntu ya yimbi kufwa!

Beno bantu yina ke tangisaka menga ya bantu, beno kwenda ntama na munu!

20 Bambeni ya nge ke na kusadila Nkumbu ya nge samu na kuvuna bantu,

mitantu ya nge ke na kusadila Nkumbu ya nge samu na kusala yimbi.

21 Yave, wapi mutindu mu ke yina ve bayina ke yinaka nge?

Yave, wapi mutindu mu ke nyafuna ve bayina ke tediminaka nge?

22 Mu ke yinaka mingi bawu,

bawu me kuma bambeni ya munu.

23 Nzambi, fyongonina munu mbote-mbote mpe zaba ntima ya munu,

meka munu mpe zaba mabanza ya munu!

24 Tala kana mu ke na kulanda nzila ya yimbi,

twadisa munu na nzila ya mbote samu na bantangu nyonso!