Yave kuwa lusambulu ya munu,

teka makutu samu na kuwa kubondila ya munu!

Pesa munu mvutu samu ti nge kele ya kukwikama mpe ya kusungama!

2 Kufundisa ve kisyelo ya nge,

samu ti ata muntu mosi ve kele ya kudedama na ntadisi ya nge.

3 Mbeni ke na kulanda munu ntangu nyonso,

yandi me nika munu na ntoto,

yandi me tula munu na kati ya kitombe,

mutindu bantu yina kufwaka na ntangu ya ntama.

4 Mu me lemba, na kati ya ntima,

mu kele na kati ya mpasi ya kulutila.

5 Mu ke na kubambuka moyo na bantangu ya ntama,

mu ke na kuzonzila dyaka na nyonso yina nge salaka,

mu ke na kubanza na bisalu ya maboko ya nge.

6 Mu me lambula maboko ya munu na sika ya nge,

na ntadisi ya nge, mu me kuma mutindu yinsi yina me kawuka.

7 Yave, pesa munu mvutu na nswalu,

mu me lemba,

kupesa munu ve mukongo,

samu ti mu vwanda ve mutindu bantu yina ba ke na kutula na ndyamu.

8 Na suka-suka, lakisa munu bumbote ya nge!

Samu ti ni na nge mu me tula kivuvu ya munu!

Lakisa munu nzila yina mu fwana kulanda!

Samu ti ni na nge mu ke na kutula kivuvu ya munu.

9 Yave, kuula munu na maboko ya bambeni ya munu!

Mu me bumbama na sika ya nge.

10 Lakisa munu wapi mutindu mu ke sadila luzolo ya nge,

samu ti nge kele Nzambi ya munu.

Bika ti mpeve ya nge yina kele mbote

kutwadisa munu na nzila yina ba me yidika!

11 Yave, samu na Nkumbu ya nge, sala ti mu zinga!

Na kati ya kudedama ya nge, katula munu na mpasi!

12 Na kati ya bumbote ya nge, nge ke mwangisa bambeni ya munu,

nge ke zimbisa bantu yina ke kwamisaka munu,

samu ti munu, mu kele kisyelo ya nge.