Nkembo na Yave, yandi kele ditadi ya nene ya munu.

Ni yandi ke lakisaka maboko na misapi ya munu

mutindu ya kunwana mvita.

2 Nge yina ke sadilaka munu mambu ya mbote,

nge kibaka ya munu ya lukengolo,

kiswamunu ya munu, kikuudi ya munu,

kinwanunu ya munu ya kisengo yina ke kebaka nzutu, nge kibumbamanu ya munu.

Nge tula bantu ya munu na yisi ya lutumu ya munu!

3 Yave, muntu kele nani samu ti nge kuzaba yandi?

Mwana ya muntu kele nani samu ti nge kubanzila yandi?

4 Muntu kele mutindu mupepe,

bilumbu ya luzingu ya muntu kele mutindu mpewo ke na kuluta.

5 Yave kulula mazulu mpe kulumuka,

simba myongo mpe samu ti yawu kubasisa mulinga.

6 Sala ti balusyemo kulezima mpe mwangisa yawu!

Losa madyonga mpe kotisa bawu na mvwanzi.

7 Katuka kuna na zulu, lambula maboko ya nge,

vuukisa munu na maza ya nene,

kuula munu na maboko ya banzenza.

8 Bayinwa ya bawu ke basisaka mambu ya luvunu,

maboko ya bawu ya lubakala ke salaka kaka mambu ya kulunga ve.

9 Nzambi, mu ke yimbidila nge mukunga ya malu-malu,

mu ke sika nsambi yina kele na basinga kumi samu nge:

10 «Nzambi ke pesaka mpulusu na bantinu,

yandi kuulaka Davidi kisyelo ya yandi na mbele ya mvita yina ke pesaka lufwa.»

11 Vuukisa munu, kuula munu

na maboko ya banzenza,

bayinwa ya bawu ke basisaka mambu ya luvunu,

maboko ya bawu ya lubakala ke salaka kaka mambu ya kulunga ve.

12 Bana ya beto ya babakala kele mutindu mwa bayinti,

yina me kula na buntwenya ya yawu.

Bana ya beto ya bakento kele mutindu makunzi,

yina ba me fikula na kati ya yinzo ya ntinu.

13 Bibumbulu ya beto ya bambuma ke fuluka,

yawu ke fuluka na madya ya mutindu na mutindu,

mameme na bankombo ya beto ke butana na mafunda,

mpe na makumi ya mafunda, yawu ke vwanda na matiti ya beto.

14 Bangombe ya beto ya nkento ke vwanda na mafuta,

makubu ke vwanda dyaka ve, bawu ke nata dyaka ve bantu na ngolo na yinsi ya nzenza,

na bisika ya beto yina bantu ke yonzamaka kuyawula dyaka ve.

15 Kyese samu na bantu yina kele mutindu yina!

Kyese samu na bantu yina Yave kele Nzambi ya bawu!