Mu ke kembila nge Nzambi ya munu, nge yina kele ntinu!

Mu ke siika Nkumbu nge bantangu nyonso mpe ya mankululu.

2 Mu ke tonda nge bantangu nyonso,

mu ke kembila Nkumbu ya nge bantangu nyonso mpe ya mankululu.

3 Yave kele Nzambi ya nene, yandi kele ya kulunga na kuzwa nzitusu,

bunene ya yandi kele ve na ndilu.

4 Bambandu na bambandu, bika ti bantu kusiika nge samu na nyonso yina nge me sala,

bantu kuzonzila mambu ya ngitukulu yina nge me sala,

5 mpe bunene ya nkembo ya nge ya kulutila,

mu ke fyongonina mambu ya ngitukulu yina nge salaka.

6 Ba ke zonzila ngolo ya nge ya kulutila,

mu ke zonzila mambu ya ngitukulu yina nge salaka.

7 Ba ke bambuka moyo mpe ke zonzila mambu yina me tadila bunene ya bumbote ya nge,

bantu ke sala milolo ya nsayi samu na ludedomo ya nge.

8 Yave ke fwilaka bantu kyadi, yandi ke lembaka ve na kulemvokila,

yandi ke dasukaka mbangu ve, yandi kele ya kufuluka na bumbote.

9 Yave kele mbote samu na bantu nyonso,

yandi ke fwilaka bantu ya yandi kyadi na mambu nyonso.

10 Yave, mambu yina nge ke salaka ke kembilaka nge,

bantu yina kele ya kukwikama na nge ke tondaka nge.

11 Bawu ke zonzila nkembo ya kimfumu ya nge,

bawu ke zonzila lulendo ya nge.

12 Samu ti bantu kuzaba mambu ya nge ya ngitukulu,

mpe nkembo ya kulutila ya kimfumu ya nge.

13 Kimfumu ya nge kele ya bantangu nyonso,

nge ke yalaka bambandu na bambandu.

14 Yave ke simbaka bayina nyonso ke kubwaka,

yandi ke sungikaka bayina nyonso kele ya kukondama.

15 Bantu nyonso, na kivuvu nyonso ke na kutadila kaka nge,

ni nge ke pesaka bawu madya na ntangu ya kufwanakana.

16 Nge ke fungulaka diboko ya nge

mpe nge ke fulusaka bantu ya moyo na nyonso yina bawu ke vwandaka na yawu nsatu.

17 Yave kele ya kudedama na banzila ya yandi nyonso,

yandi kele ya kukwikama na mambu nyonso yina yandi ke salaka.

18 Yave kele pene-pene ya bayina nyonso ke bokilaka yandi,

bayina ke bokilaka yandi na butsyelika nyonso.

19 Yandi ke lungisaka bansatu ya bantu yina ke zitisaka yandi,

yandi ke kuwaka kuyawula ya bawu mpe yandi ke vuukisaka bawu.

20 Yave ke bumbaka bantu nyonso yina ke zolaka yandi,

yandi ke mwangisaka bantu nyonso ya yimbi.

21 Bika ti yinwa ya munu kuyimbila mikunga ya nzitusu na Yave!

Bika ti bantu nyonso kusiika Nkumbu ya yandi ya longo, bantangu nyonso mpe ya mankululu.