Dibuku ya
MUKUNGA YA KULUTILA KITOKO
NKOTOLO
Dibuku yayi ni Salomoni sonikaka yawu (Muk 1.1). Nkumbu ya dibuku yayi kele «Mukunga ya kulutila kitoko» samu ti yawu ke na kuzonzila mambu ya luzolo: «Luzolo ke na ngolo mutindu lufwa. Kimbanda ke na yintu ngolo mutindu yinsi ya bantu ya kufwa. Luzolo ke yokaka mutindu milaka ya tiya ya ngolo. Yawu kele tiya ya Yave (Muk 8.6).» Dibuku yango kele ya kufuluka na mikunga ya kitoko, mikunga yina ke na kulakisa luzolo ya bantwenya zole yina me zolana, bayina ke na kusolola. Na bisika ya nkaka dibuku ke na kuzonzila muntu kaka mosi, kasi na bisika ya nkaka yawu ke na kuzonzila nkonga ya bantu mutindu bandumba ya Yelusalemi. Ba-Zwife ke talaka ti dibuku yayi ke lakisaka mutindu kele luzolo ya Nzambi na bantu ya yandi, mpe ba-Klisto me bakula ti dibuku yayi ke na kulakisa wapi mutindu luzolo kele kifwani ya bumosi ya Klisto na dibuundu.
Dibuku yayi ya Mukunga ya kulutila kitoko ke talanaka mutindu mukunga yina ke na kulakisa kindiku na kati ya Nzambi na bantu ya yandi. Kasi yawu lenda kutalana mpe mutindu mukunga yina ke na kulakisa ngolo ya luzolo yina kele na kati ya kento na bakala ya yandi.
Mambu ya luzolo kele ya kukangama na kati ya bifwani mingi mutindu bilanga, bambuma, bifulu, mananasi, nzutu, bisika ya kudikila bibulu.
Dibuku yayi lenda kukabuka mutindu yayi:
- Mukunga ya ntete (Muk 1.2–2.7)
- Mukunga ya zole (Muk 2.8–3.5)
- Mukunga ya tatu (Muk 3.6–5.1)
- Mukunga ya yiya (Muk 5.2–6.3)
- Mukunga ya tanu (Muk 6.4–8.4)
- Mukunga ya sambanu (Muk 8.5-14)
1
1 Mukunga ya kulutila kitoko na mikunga. Yawu kele ya Salomoni.
Disolo ya luzolo ya kento na bakala
Kento
2 Bika ti yandi fiba munu, yandi kufiba munu na yinwa.
Luzolo ya nge me lutila vinu.
3 Nsunga ya mananasi ya nge kele ya mbote.
Nkumbu ya nge kele mutindu mananasi ke na kumwangana.
Ni yawu yina, bandumba ke zolaka nge.
4 Nata munu, beto kima!
Ntinu me kotisa munu na bivinga ya yandi.
Beto ke vwanda na kyese mpe na nsayi samu na nge.
Beto kembila luzolo ya nge kulutila vinu.
Ni na mpampa ve bandumba ke na kuzola nge.
5 Beno bandumba ya Yelusalemi,
munu, mu kele ndombe, kasi mu kele kitoko,
mutindu bayinzo ya mileba ya bantu ya Kedale,
mutindu balele ya myelo ya Salomoni.
6 Beno tala ve ndombe yayi ke na munu.
Ni ntangu me kumisa munu mutindu yayi.
Bana ya mama ya munu ya babakala dasukilaka munu.
Bawu tumisaka munu na kukengidila bilanga ya bayinti ya vinu.
Kasi, na yina me tadila bilanga ya bayinti ya vinu ya munu mosi, mu kengidilaka yawu ve.
7 Nge yina ntima ya munu ke zolaka,
zabisa munu wapi kisika nge ke kwenda dikila bibulu ya nge.
Zabisa munu wapi kisika nge ke pemisa bawu na ngunga ya midi.
Na yina, mu ke vwanda ve mutindu kento yina me bumba kizizi na kwendaka yima pene-pene ya bibulu ya bampangi ya nge.
Mivungi
8 Kana nge zaba yawu ve, nge yina kele kitoko kulutila bakento nyonso,
basika mpe landa makulu ya mameme na bankombo.
Kwenda dikila bana ya bankombo ya nge,
pene-pene ya bayinzo ya mivungi.
Bakala
9 Nkundi ya munu,
mu ke na kufwanikisa nge na mpunda ya nkento yina ke nataka pusu-pusu ya Falawo.
10 Mabundi ya nge me bonga na binzembele yina nge me lwata.
Laka ya nge kele kitoko na bampanga yina nge me lwata.
Mivungi
11 Beto ke yidikila nge misanga ya wolo.
Yawu ke vwanda na madoti ya palata.
Kento
12 Ntangu ntinu ya munu kele ya kulala na kisika ya yandi,
mananasi ya munu ya mbote ke na kubasisa nsunga ya yawu.
13 Bakala ya munu ya ntima kele mutindu diboke ya mananasi ya mile,
yandi ke vwandaka na kati-kati ya mabene ya munu.
14 Bakala ya munu ya ntima kele mutindu kikanka ya bifulu ya nsunga ya mbote
yina kele na kati ya bilanga ya bayinti ya vinu, kuna na Ene-Ngedi.
Bakala
15 Nge kele kitoko, kento ya munu, nge kele kitoko!
Meso ya nge kele mutindu mabembe.
Kento
16 Nge kele kitoko, bakala ya munu ya ntima, nge kele muntu ya kuzolakana.
Mfulu ya beto ni matiti ya mubisu.
17 Makunzi ya yinzo ya beto kele mutindu bayinti ya sedele.
Bibaka ya yinzo ya beto kele mutindu bayinti ya sipelese.