1 Mu kele kifulu ya mudimba ya Salone.

Mu kele kifulu ya fyoti ya kitoko ya midimba.

2 Mutindu kifulu ya fyoti ya kitoko na kati-kati ya bansende,

ni mutindu yina kele nkundi ya munu ya luzolo na kati-kati ya bandumba.

3 Mutindu kele yinti ya pome na kati-kati ya bayinti ya mfinda,

ni mutindu kele ndiku ya munu ya luzolo na kati-kati ya matoko.

Mu ke na nsatu ya kuvwanda na yisi ya mpewo ya yandi.

Bambuma ya yandi kele kitoko mingi na zulu ya ludimi ya munu.

4 Yandi me nata munu na yinzo ya vinu.

Yandi me tula na zulu ya munu kidimbu ya yinsi, ya kele kidimbu ya luzolo.

5 Beno kindisa munu na maboke ya bambuma ya kuyuma ya vinu.

Beno syamisa munu na bapome,

samu ti, mu ke na kubela kimbemvo ya luzolo.

6 Bika ti diboko ya yandi ya lumoso kuvwanda na yisi ya yintu ya munu.

Bika ti diboko ya yandi ya lubakala kuzunga luketo ya munu.

7 Beno bandumba ya Yelusalemi,

mu ke na kubondila beno na nkumbu ya bansyesye na bankabi yina kele na matiti.

Beno vumbula ve luzolo ya munu,

beno lemisa ve luzolo ya munu, ntete ti yandi mosi kuvumbuka.

8 Beno kuwa! Yayi ni nkundi ya munu ya luzolo,

yandi yayi ke na kukwiza.

Yandi ke na kudumuka na zulu ya myongo.

Yandi ke na kukima mbangu na zulu ya myongo ya fyoti.

9 Nkundi ya munu ya luzolo kele mutindu nsyesye.

Yandi kele mutindu nkabi.

Yandi yayi, yandi kele na manima ya kibaka ya beto.

Yandi ke na kutala na nela.

Yandi ke na kutadikila na mwa mabulu ya banela.

10 Nkundi ya munu ya luzolo ke na kuzonza.

Yandi ke na kutuba na munu:

«Ndiku ya munu ya kitoko, telama, kwiza ya nge!

11 Kisiwu me luta,

bamvula kele dyaka ve, yawu me kwenda ya yawu.

12 Bifulu ke na kubasika na yinsi.

Ntangu ya kuyimbila me kuma.

Ndinga ya biduka ke na kuwakana na yinsi ya beto.

13 Bambuma ya ntete ya bayinti ya fike ke na kuyela.

Bayinti ya vinu me basisa bifulu ya yawu.

Yawu ke na kubasisa nsunga ya yawu.

Telama, nge ndiku ya munu ya kitoko,

kwiza ya nge.

14 Aa, dibembe ya munu, yina kele na kati ya dibulu ya ditadi!

Aa, dibembe ya munu, yina kele ya kubumbama na mabulu ya bibaka ya matadi!

Talisa munu kizizi ya nge.

Wakisa munu ndinga ya nge.

Samu ti, ndinga ya nge kele kitoko,

kizizi ya nge kele kitoko.»

15 Beno simbila beto mibaku,

mibaku ya fyoti yina ke na kubebisa bilanga ya bayinti ya vinu,

na ntangu bilanga ya bayinti ya vinu ya beto me basisa bifulu.

16 Nkundi ya munu ya luzolo kele ya munu.

Munu, mu kele ya yandi.

Yandi ke na kudikila bibulu na kati-kati ya bifulu ya fyoti.

17 Tekila bwisi kuyila,

tekila kitombe kumanisa,

vutuka, nkundi ya munu ya luzolo.

Vwanda mutindu nsyesye,

mutindu mwana ya nkabi,

yina kele na zulu ya myongo ya kutelama.