5
Bakala
1 Kibusi ya munu, kento ya munu ya dikwela, mu me kota na bilanga ya munu.
Mu ke na kubuka mile ya munu, na bima ya munu ya nsunga ya kitoko.
Mu ke na kudya kibaba ya munu ya mafuta ya nyosi, na mafuta ya yawu.
Mu ke na kunwa vinu ya munu, na miliki ya munu.
Bampangi
Beno kudya, bampangi,
beno kunwa, beno kukola, beno bayina me zolana!
Yandi me fungula mwelo, kasi ntangu me luta
Kento
2 Mu vwandaka lala, kasi ntima ya munu vwandaka lala ve.
Yayi ni ndinga ya ndiku ya munu ya luzolo yina ke na kukonkota na mwelo:
«Kibusi ya munu, kento ya munu,
fungudila munu mwelo.
Dibembe ya munu, kento ya munu ya kulunga.
Awa yintu ya munu me fuluka na kinoko.
Bansuki ya munu me bola na mabete ya maza ya mpimpa.»
Kento
3 Mu me katula yimeni kinkuti ya munu,
wapi mutindu mu ke lwata dyaka yawu?
Mu me sukula yimeni makulu ya munu,
wapi mutindu mu ke bebisa dyaka yawu?
4 Ndiku ya munu ya luzolo me kotisa diboko na dibulu ya mwelo.
Ntima ya munu me pasuka.
5 Munu, mu me telama, samu na kufungula mwelo na ndiku ya munu ya luzolo.
Maboko ya munu me tangisa mile.
Misapi ya munu me mwangisa mile na zulu ya kisimbulu ya kikangulu ya mwelo.
6 Munu, mu me fungudila ndiku ya munu ya luzolo mwelo.
Kasi ndiku ya munu ya luzolo vwandaka me kwenda, yandi me kwendaka ya yandi.
Yandi me kwenda mpe ntima ya munu me pasuka.
Mu me sosa yandi kasi mu me tala yandi ve.
Mu me bokila yandi kasi yandi me ndima ve.
7 Bankebi yina ke kwendaka tambula na mbanza nyonso me bwabana munu.
Bawu me bula munu, bawu me lwalisa munu.
Bawu me katula munu kitambala ya munu, bayina ke kebaka bibaka ya mbanza.
8 Beno bandumba ya Yelusalemi, mu ke na kubondila beno.
Kana beno tala ndiku ya munu ya luzolo, yinki beno ke zabisa yandi?
Beno zabisa yandi ti, mu ke na kubela kimbemvo ya luzolo.
Bantu ya nkaka
9 Ndiku ya nge yina ya luzolo, na yinki yandi me lutila babakala ya nkaka?
Zabisa beto yawu, nge yina me lutila kitoko na bakento nyonso.
Ndiku ya nge yina ya luzolo, na yinki yandi me lutila babakala ya nkaka,
samu ti nge bondila beto mutindu yayi?
Kento
10 Ndiku ya munu ya luzolo ke mbwaki, yandi ke na ngolo.
Ba lenda zaba yandi na kati-kati ya mafunda kumi (10 000) ya babakala.
11 Yintu ya yandi kele mutindu wolo ya mbote.
Bansuki ya yandi ke ya kukangama yawu na yawu.
Yawu kele ndombe mutindu nkwankwa.
12 Meso ya yandi kele mutindu mabembe yina kele pene-pene ya bamwila.
Yawu ke na kuyobila na kati ya miliki.
Yawu ke na kupemaka na kati ya kizinga ya maza.
13 Mabundi ya yandi kele mutindu bilanga ya nsunga ya kitoko.
Bilanga yina ke butaka matiti ya nsunga ya kitoko.
Bikoba ya yandi kele bifulu ya fyoti yina ke na kubasisa mile,
mile yango ke na kumwangana.
14 Maboko ya yandi kele mutindu mulunga ya wolo,
yina kele ya kufuluka na kizolite*Kizolite kele mosi na matadi ya ntalu.
Kivumu ya yandi kele mutindu meno ya nzawu, yina ba me bongisa,
yina kele ya kufuluka na safile†Safile kele mosi na matadi ya ntalu.
15 Makulu ya yandi kele mutindu makunzi ya malebe yina kele ya kutelema na zulu ya bisimbulu ya wolo ya mbote.
Kizizi ya yandi kele mutindu Libane,
yandi me lutila kitoko na bayinti ya sedele ya Libane.
16 Yinwa ya yandi kele kitoko,
yandi nyonso ke na kupesa kilengi.
Ni mutindu yina kele ndiku ya munu ya luzolo, ni mutindu yina kele mpangi ya munu, beno bandumba ya Yelusalemi.