1 Wapi kisika me kwenda ndiku ya nge ya luzolo?

Zabisa beto yawu, nge yina me lutila kitoko na bakento nyonso!

Wapi nzila yandi me baka?

Beto ke kwenda sosa yandi kintwadi na nge.

2 Ndiku ya munu ya luzolo me kota na bilanga ya yandi,

bilanga ya yandi ya matiti ya nsunga ya kitoko.

Samu na kudya na kati ya bilanga, mpe samu na kubuka bifulu ya fyoti.

3 Munu, mu kele ya ndiku ya munu ya luzolo,

ndiku ya munu ya luzolo kele ya munu.

Yandi ke na kudya na kati-kati ya bifulu ya fyoti.

4 Nkundi ya munu ya luzolo nge kele kitoko mutindu Tilesa, mbanza ya kintinu.

Nge kele kitoko mutindu Yelusalemi.

Nge kele nsisi mutindu binwani ya mvita.

5 Bika na kutala munu, samu ti meso ya nge ke na kulawukisa munu.

Bansuki ya nge kele mutindu nkonga ya bankombo yina ke na kukulumuka mongo ya Ngalaade.

6 Meno ya nge kele mutindu nkonga ya mameme yina ke na kutomboka.

Bawu me katuka na kuyobila.

Konso dimeme kele na dipasa ya yandi.

Ata mosi me kondwa yawu.

7 Mabundi ya nge kele mutindu bibuku ya bangelenade na yisi ya kitambala ya nge.

8 Ntinu kele na bakento makumi sambanu.

Yandi kele na bakento ya nkaka makumi nana.

Yandi kele na bandumba ya mingi-mingi.

9 Kasi dibembe ya munu ke kaka mosi ya kulunga samu na munu.

Yandi kele mwana ya ntima ya mama ya yandi.

Yandi kele ya kulutila kitoko na meso ya mama yina butaka yandi.

Ntangu bandumba ke talaka yandi, bawu ke tubaka ti yandi kele na buyenge.

Bakento ya ntinu na bakento ya nkaka ya ntinu ke talaka yandi, bawu ke pesaka yandi masiika.

10 Yayi wapi kento ke na kukwiza mutindu bwisi ke na kutsya?

Yandi kele kitoko mutindu ngonda.

Yandi ke na kulezima mutindu ntangu.

Yandi kele nsisi mutindu binwani ya mvita.

11 Mu me kulumuka na bilanga ya bayinti yina ke butaka bambuma ya kilengi.

Mu me kulumuka na kutala mwa bayinti yina vwandaka mena na muzumba.

Mu me kulumuka na kutala kana bayinti ya vinu ke na kufula.

Mu me kulumuka na kutala kana bayinti ya bangelenade ke na kubasisa bifulu.

12 Mu zaba ve wapi mutindu mu me kwiza kuma awa.

Kaka luzolo ya munu vwandaka nata munu.

Mu me kwiza kuma na kati-kati ya bapusu-pusu

ya bantu ya mfumu ya munu.