1 Singed kamo ka kanaong mga maanak agon minsoyat hao kamazo dazaw diri kamo magpakasala. Kon may makasala may antabang kanta dizan ka pag-atobang na Diyos ani si Hiso Kristo nga waray sala. 2 Iza gazed ya ihaladay dazaw inpasaylo di ya kantang mga sala. Diri kon kantang mga sala ka lamang ya inkaw-an naiza kay nakakawa disab iza ka mga sala na tanan mga tao.

3 Kon tomanen nita ya mga sogo na Diyos makapanigoro kita nga matood ya pagkilala nita kanangiza. 4 Kon may minlaong nga nakaangay iza ka Diyos piro wara iza magtoman ka mga sogo na Diyos bakaken ya tao hasta wara iza mahagdam ka sindo na Diyos. 5 Kamhan bisan sin-o ya mintoman ka mga sogo na Diyos iza ya matood nga may kaazak ka Diyos. Kon tomanen nita ya mga sogo na Diyos makapanigoro kita nga namag-angay kita daw ya Diyos ka hena-hena. 6 Bisan sin-o ya minlaong nga nakaangay iza ka Diyos kinahanglan magabatasan iza singed ka batasan ni Kristo ka dini pen iza ka kalibotan.

7 Mga kinaazak nao nga lomon dizan kan Kristo, diri kon bag-o ini nga sogo nga insoyat nao kamazo. Kay izang mahon-a pen ka anipen kamo magtoo kan Hiso Kristo nanalinga kamo ka toong sogo nga nagalaong nga mag-angay-angay kamo singed ka pagpakaangay nao kamazo. 8 Na, ya sogo nga insoyat nao kamazo ani ya intoman ni Kristo ka dini pen iza ka kalibotan. Intoman disab mazo koman. Kamhan singed ka bag-o di ini nga sogo kay nagaadang-adang di ya kadeglem kay si Kristo nga matood nga kapawa mindateng di iza.

9 Kon may minlaong nga makasabot iza ka sindo ni Kristo piro minkontara iza ka toong iba nagahela pen iza ka kadeglem. 10 Ya tao nga naazak ka toong iba nagahela iza hinoa ka kapawa. Agon dizan ka toong batasan waray makalit-ag ka iba ka pagpakasala. 11 Ya nagakontara ka iba nagahela iza ka kadeglem. Nagapanaw isab iza ka madeglem. Kamhan wara iza mahagdam kon ankar-in sa iza pasinged kay singed ka impakabota ya toong mata ka kadeglem.

12 Singed kamo ka kanaong mga maanak agon minsoyat di hao kamazo kay impasaylo di ya kamazong mga sala kay ani ya impakapatay ni Hiso Kristo. 13 Minsoyat hao kamazo nga mga malaas kay nakakilala kamo kan Hiso Kristo nga daan di iza sokad pen gazed ka sinogdan na kalibotan. Minsoyat hao kamazo nga mga batan-en kay nakadaeg kamo kan Satanas. Minsoyat hao kamazo nga mga bata maanak kay nakakilala kamo ka Diyos nga kantang Ama. 14 Minsoyat hao kamazo nga mga malaas kay nakakilala kamo kan Hiso Kristo nga daan di iza sokad pen gazed ka sinogdan na kalibotan. Minsoyat hao kamazo nga mga batan-en kay maheget ya pagsarig mazo kan Hiso Kristo kay ya sindo na Diyos dizan iton ka kamazong hena-hena. Kamhan nakadaeg kamo kan Satanas.

15 Wani ya baheg nao kamazo nga diri kamo mag-angay ka batasan na mga makasasala dini ka kalibotan. Kay kon nakaangay kamo kaniran nakaaway di kamo ka Ama nga Diyos. 16 Wani ya batasan na tao nga nakaaway ka Diyos nga onay iza magatoman ka naazakan na toong kaogaringen. Onay iza nagaarig ka bisan ono ya nakitan naiza. Kamhan ya pagkadato naiza ani ya insarigan naiza daw ya inhambogan. Ini nga tanan mga batasan diri kon garing ka Ama nga Diyos kay garing gazed ka maonga nga nagahari ka hena-hena na mga tao dini ka kalibotan. 17 Na, ya kalibotan daw ya mga in-azak na mga tao mangawara sirang tanan. Kamhan ya tao nga magatoman ka naazakan na Diyos hatagan hinoa iza ka bag-ong kinabohi nga diri mawara.

18 Mga maanak nao, mindateng di ya kataposan nga panahon dini ka kalibotan. Impanalingahan mazo nga may andateng nga kaaway gazed kan Kristo nga nagalaong nga iza si Kristo ambaza kay bakak. Mahagdam di kita nga mindateng di matood ya kataposan nga panahon kay mataed di ya mga tao nga minsopak kan Kristo. 19 Na, ya mga kaaway kan Kristo ani ya mga maistro nga namelag di kanta kay diri kon sakop ni Kristo siran. Kon matood ya pag-iba niran kanta diri gazed siran ambiza kanta. Madazaw kay makilala di gazed nga diri kon matood ya pag-iba niran kanta.

20 Basta kay kamo ya intagan ka Madazaw nga Ispirito nga garing kan Kristo. Agon nakasabot di kamong tanan ka sindo na Diyos. 21 Wara hao magsoyat kamazo ka bag-ong sindo. Hinoa minsoyat hao kamazo kay nakasabot kamo ka sindo na Diyos. Nahagdam disab kamo nga ya sindo na Diyos waray saket ka bakak. 22 Daw sin-o ya bakaken? Ya tao nga mintoldo nga nagalaong nga si Hisos diri kon iza ya hari nga impili na Diyos ani ya bakaken daw ya minsopak kan Hiso Kristo kay diri iza antoo ka kantang Ama nga Diyos daw ya toong Maanak nga si Hisos. 23 Ya tao nga diri antoo kan Hisos nga Maanak na Diyos wara disab iza magtoo ka Ama nga Diyos. Kamhan bisan sin-o ya andawat kan Hisos dawaten disab naiza ya Ama nga Diyos.

24 Kinahanglan maghena-hena kamo mahitenged ka sindo na Diyos nga impanalingahan mazo ka anipen kamo magsakop kan Kristo. Kay kon ani ya nataremdem mazo mamag-angay kamo ka hena-hena na Maanak nga si Hisos daw ya Ama nga Diyos. 25 Kamhan ya bag-ong kinabohi nga diri mawara ani ya toong saad kanta.

26 Ani ini ya soyat nao kamazo dazaw maregda di kamo ka mga antoldo kamazo ka bakak. 27 Intagan kamo ni Kristo ka Madazaw nga Ispirito. Kamhan nagapabilin iza dizan kamazo agon waray kinahanglan mazo ka mga iba pen nga tao ka pagsindo kamazo kay iza ya ansindo kamazo ka tanan. Polos matood ya toong insindo waray saket ka bakak. Agon hegeten mazo ya pagsarig mazo kan Kristo singed ka insindo naiza kamazo.

28 Kamo nga mga maanak nao, hegeten mazo ya pagsarig mazo kan Kristo dazaw waray kahaldek nita daw kasipeg kay-an ka pag-atobang nita kanangiza pagbalik naiza ngarimbaba ka kalibotan. 29 Mahagdam kamo nga madazaw ya batasan na Diyos, waray sala. Kamhan bisan sin-o ya minhinang ka madazaw singed kanangiza iza matood ya maanak na Diyos.