1 Hao si Pablo ya minsoyat. Kamhan si Silas daw si Timotiyo ani ya iba nao dini. Na, wani ya soyat nami kamazo nga mga sakop ni Kristo nga nagatipon doro ka longsod nga Tisalonika kay si Hiso Kristo nga Ginoo daw ya Ama nga Diyos ani di ya insakopan mazo. Gosto nami nga tabangan kamo niran. Palinawen disab ya kamazong hinawa.

2 Kada pagpangamozo nami ka Diyos onay kami magtabang kamazo pagpangamozo hasta dakola disab ya pagpasalamat nami ka Diyos para kamazo. 3 Kay pagpangamozo nami ka Diyos nga kantang Ama wara kami magkalipat nga madazaw di ya batasan mazo kay minsakop di kamo kan Kristo. Kamhan nagapakalaki kamo paghinang ka madazaw kay nakaangay di kamo kan Kristo. Hasta nagaanget kamo ka mga nagaaway kamazo kay marig-en ya pagtagad mazo ka pagbalik ni Kristo.

4 Mga lomon nami dizan kan Kristo, mahagdam kami nga dakola ya kalooy na Diyos kamazo kamhan minpili iza kamazo dazaw kamo di ya toong kasakopan. 5 Kay pagdara nami ka sindo mahitenged kan Kristo doro kamazo wara kami maggamit ka mga panaba ka lamang basta kay ya Madazaw nga Ispirito nga garing ka Diyos ani ya minpatandeg ka kamazong hena-hena. Kamhan nakasabot gazed kamo nga matood gazed ini nga sindo. Mahagdam disab kamo nga madazaw ya batasan nami diton kamazo dazaw ani haodan mazo ka pagbatasan. 6 Kamhan minhaod di matood kamo ka batasan nami daw ya batasan na Ginoo kay bisan indaegdaeg kamo na mga tao mintoo kamo ka sindo mahitenged kan Kristo. Kamhan bisan nagalised kamo intagan kamo ka kasaza na Madazaw nga Ispirito nga garing ka Diyos.

7 Kamhan diton ka lopa nga Masidoniya daw Girika kamo di ya haodanan na tanan mga mintoo kan Kristo. 8 Kay pinaazi kamazo ya sindo na Ginoo mindateng di ka lopa nga Masidoniya daw Girika. Kamhan ya balita mahitenged ka kamazong pagtoo ka Diyos mindateng disab ka tanan dapit. Agon waray kinahanglan nami koman ka pagpanan-og ka mga tao mahitenged kaini nga sindo kay daan ding nakabati. 9 Kamhan siran hinoa ya minpanan-og kanami nga madazaw ya pag-abiabi mazo ka mahon-a pen pagdateng nami doro kamazo. Siran disab ya minpanan-og kanami mahitenged ka pagbiza mazo ka paghawag mazo ka mga diyosdiyos dazaw magahawag di kamo hinoa ka Diyos daw maga-alagad kay iza ya matood nga Diyos kamhan diri mapatay kawanihen ka. 10 Nagatagad disab kamo ka pagdateng na toong Maanak garing daked ka langit. Si Hisos ani ya Maanak na Diyos nga inbohi naiza pagbalik garing ka pagkapatay. Iza disab ya mintabang kanta dazaw kay-an ka tirmino na Diyos ka pagsilot ka mga tao ka kanirang mga sala diri gazed kita madateng ka toong dakolang kazehet.