1 Timoti
Lovoang Avot At Ne Pol
Saparap Ne Timoti
Saparap Ne Timoti
Levelinga Loklox Axasep
Levenmaares 63–67 A.D.
Timoti neni boro at lenep Asia. Ne temen neni boro Grik la nenen neni latkin boro Judaia. At lavatpas sepsev agepura at ne Pol neni ga soxolik ka ne Timoti ngan laradi loklok tooro rin la duga gugu buru. (Gu 16:1-3) Melemu Pol ga raba ne Timoti mi lentaba leven gugu kusu neni naba lok tatao lotu ro Epesas. At nai lovoang Pol ga vaase aronga ne Timoti mumu luvuttadi loklox ase xaxarang. Lavanga dina lok lununu at luvuttadi nunu dina subu. Neni ga vaase alolos box i mumu lotu at luvuttadi nunu. Melemu neni ga vaase mumu mo leventaangas ua i nunuan kusu luvuttadi amgomgo dinak lox i. Neni ga vaase alolos bok ne Timoti mumu leveloklok ua in manton ti ne Timoti, atla neni laradi gugu at ne Karisito kantubu at limixin nunu.
Lengkot silok keneng at na lovoang
1:1-2 Pol ga tong avukat ti ne Timoti.
1:3-20 Lempapaase mumu levenanasa nunuan.
2:1-15 Lempapaase mumu leveloklok at lotu.
3:1-16 Lempapaase mumu nedi luvuttadi amgomgo at lotu.
4:1-16 Timoti na lok tatao avukat lorooro ren la levenanasa ren.
5:1–6:21 Lempapaase mumu lugugu at ne Timoti la lurutu migo ren ti limixin nunu.
1
Lavapaase Axasep
1 *Kl 1:27Nenia ne Pol, lun pavang at ne Iesu Karisito, mo nedik ta doxoma voovo rin. Nedu mi ne Moroa, Laradi Loklox Arooro atdik, duga soxolik ka ia ri na lugugu.
2 *Gu 16:1-3; Ta 1:4Nia a malagan na lovoang ti ne Timoti, lamdak tinotno rak maxeneng at legesa nunu.
Letaba nabalamu, lebelen tuntun, la lenmila bok tu boro at ne Temen dik la ne Iesu Karisito, Leeme Silok atdik.
Levempapaase Aronga Mumu Leveloklox Ase Xaxarang
3 *Pl 2:24Nia a vara i do una nemen go Epesas, kerekngan aga tong i ru ap mo laaleng nia aga vas kaxat uto Masadonia. Leventaba luvuttadi me go Epesas di vanasa limixin mi levenanasa xaxarang. Kuren la una tong i ridi do dina xap ta ap mo loklok. 4 *1 Ti 4:7; Ta 1:14La una tong i ridi do dina xap ta ap mo laxampapaase solo mumu leventetere, la levenasen at lavalabat, mila nai ik lox asu mun levenedak. La ik lox asi lugugu at ne Moroa, mo lugugu i lox alolos lununu at limixin. 5 Lavasuun at nai levelinga rak, ti lox axatu labalamu xantubu at limixin nunu. Nom labalamu i ravasu boro xeneng at lorooro kopmen taxakapmek teren la boro bok at lodoxoma, kopmen tusumsuma mamangan teren la boro bok at lununu ruturun.
6 Leventaba luvuttadi digara rem gili su vam basinge i na la dira domampe vam langas at lununu la di tong asu mun levelinga kopmen tavasuun teren. 7 *1 Ti 6:4,20; Ta 1:10Di vara i do dina anasa limixin mi Laulis Linga at ne Moroa, ketla dixo xasep teren la dixo xasep bok ap mo levelinga di anasa limixin min.
8 *Ro 7:12,16Nedik ataklen i do Laulis Linga i lox avukat, mo do tara im tebeng avukar i. 9 Ataklen box i do Laulis Linga at ne Moroa, kopmen tinedi limixin avukat. Ketla tinedi limixin di los polo Laulis Linga, la tinedi limixin tongtonga xepe, la tinedi limixin kopmen dina lotu saparap ne Moroa, la ti luvuttadi xapmek, la tinedi bok kopmen dina lok ngangao at ne Moroa la levempanga at lotu, la tinedi dip sev amet luvuttemen di mi luvutnen di, la tinedi dip sev amet limixin petpes, 10 *Ta 1:9la tinedi bok di lok laxakapmek maxamang at lixitkis epot, la tinedi lavatlok di velongka, la tinedi bok di babala ka limixin kusu dina gugu taba di. La tinedi bok di xaxarang la di tong asu levelinga xaxarang mumu laradi i tu at lavapaase. Tinedi bok di lok levempanga xerepmo xopmen na epovo mi levelinga ruturun at ne Moroa. 11 *1 Ti 6:15Na levelinga ik lok to xeneng at Lagale Lavavang, mo ne Moroa ga raba ia min, kusu ana tong asu i. Lagale Lavavang boro at ne Moroa, ni lagale lo Moroa la i epovo rinotno do limixin dina emi asu min.
Pol Ga Tong Avukat Mumu Labalamu At Ne Moroa
12 *Gu 9:15; Ga 1:15-16; 1 Ko 15:9-10A tong avukat ti ne Iesu Karisito, Leeme Silok atdik, ni gara raba vam ia mi lolos ti lok lugugu rak. A tong avukat tinotno rin mila ni ga ven ia do nenia laradi ruturun tin, la ni ga soxolik ka ia xusu ana gugu rin. 13 Keke i do gano migomgo aga paase vupu rin, la agap sep limixin teren, la agak lox asongot di. Ketla ne Moroa ga lox asuusu lebelen tuntun teren tia, mila nenia agoxoklen levempanga salai gak mokso la goxopmen tununu rak. 14 La Leeme Silok atdik ga sobang asi mo letaba nabalamu ren mavana rak la ga raba box ia mi lununu la labalamu, no i ravasu at ne Iesu Karisito.
15 *Lu 15:2; 19:10Anai levelinga ruturun tidik, ata siam ka i la ata nunu bok teren. Iesu Karisito ga si ude xopok at na lavatbung menemen kusu ti lox arooro limixin kakapmek. Loklok kakapmek tarak ga silok aleng ti loklok kakapmek atnedi. 16 Ketla ni lavasuun mun teren la ne Moroa ga lox asuusu lebelen tuntun teren tia, kusu ne Iesu Karisito na ngangais aleng tia ri leeng basinge leveloklok kakapmek tarak, keke i do nenia laradi aga lok kapmek aleng ti limixin axap. La nai loklok at ne Iesu Karisito, ni lampoovo rinedi limixin axap diba nunu ren melemu la dina lok ka lorooro avolo. 17 *Ro 16:27Kuren la ata emi asu mi Loorong Silok naba rooro amisik, la kopmen noxo met la dik taxo epovo ri ven i. Neni xusuk mun ne Moroa. Ata lox asuusu amisik lasinorong la leemi asu rin la kopmen taxavaxap teren! Tuturun.
18 *1 Ti 6:12; Ju 1:3Timoti, nenu lamdak tarak. Ana raba u mi na levelinga ik sixit emu mi levelinga vapaase ali at lugugu ram saparap ne Moroa gano migomgo. Do una mumu asu i, naba lox alolos u xusu unaba esep avukat ap mo leesep nunuan, 19 *1 Ti 3:9la unabam tebeng lolos lununu la u noxo suma loklok mamangan at lorooro ram. Leventaba luvuttadi diga ronga xepe na levelinga, la diga lok kapmek pam lununu atdi. 20 *2 Ti 3:17; 4:14-15; 1 Ko 5:5Kantubu atdi, ne Aimenias la ne Aleksanda, aga song araba vam du ri lekngen ne Satan, kusu dubaklen ka i do du noxo paase vupu ri ne Moroa.