Taitas
Lovoang At Ne Pol
Saparap Ne Taitas
Levelinga Loklox Axasep
Lamaares 67 A.D.
Taitas neni xopmen laradi me Judaia, ketla mumu mun levenanasa at ne Pol, neni ga nunu at ne Iesu Karisito. Ap mo lavatpas at ne Pol ti tong asu Lagale Lavavang, ne Taitas neni lara atdi la nedi diga emu tangtagap amisik. Pol ga riki ne Taitas la ni gat pas uto Korin ga gepura nga. Melemu ne Pol ga tong i ri ne Taitas la neni ga ravasu ngan laradi gomgo mavana at luvuttadi nunu diga nemen to at losoxan Krit.
Lengkot silok keneng at na lovoang
1:1-4 Lavapaase momo at ne Pol ti ne Taitas.
1:5-16 Lempapaase mumu luvuttadi amgomgo at limixin nunu.
2:1-15 Levenanasa mumu leveloklok i nunuan.
3:1-11 Leveloklok nunuan ti lorooro at luvuttadi nunu.
3:12-15 Lentaba lempapaase bok at ne Pol la lavapaase abeese.
1
Lavapaase Axasep
Nenia ne Pol, lasaxaruki at ne Moroa la lun pavang at ne Iesu Karisito. Nenia a gugu rik lox alolos lununu at lavaanat soxolik at ne Moroa. Nia a vanasa nom limixin mi levelinga ruturun at ne Moroa xusu lorooro atdi nan manton tino, * Kl 1:27la dinam doma voovo ri lorooro avolo. Na lorooro avolo ne Moroa ga tong ali i ganoxa at lereot. La levelinga ren i ruturun tinotno, neni xopmen laradi xaxarang. * Ep 1:9-10; Ta 2:10; 3:4; 1 Ti 1:1,11La neni ga lok katling na levenaleng kusu neni na lox asuvos na levelinga mumu lorooro avolo ri limixin. La neni ga soxolik ka ia xusu nenia ana tong asu nom levelinga ren. Neni ne Moroa la neni Laradi Loklox Arooro atnedik.
* 2 Ko 8:23; Ga 2:3; 2 Ti 1:2; 4:10; Ro 1:7Nenia a malagan na levelinga ru ne Taitas. Nenu u lok ngan ne nuruk tino, mila nenu u nunu at ne Iesu Karisito xerekngan ia.
Letaba nabalamu mi lenmila tu boro at ne Moroa ne Temen dik eburu mi ne Iesu Karisito, Laradi Loklox Arooro atnedik.
Lugugu At Ne Taitas To At Losoxan Krit
Nenia aga lok li u, ne Taitas, to Krit la aga on basinge u. Lavasuun teren keretna. Leventaba leven gugu at lotu to Krit kovisi na sixit avukat. La a vara i do una gugu axap nom levempanga nenia goxo epovo na gu axav i. Una soxolik ka tuvuttadi mukun ti lox ase limixin at laraogu lotu keneng at levenmenemen getgesara. Una lox i na, kerekngan nia aga tong i ru gano. * 1 Ti 3:2-7; 2 Ti 2:24-26Loklok ap mo luvuttadi mukun na lok nunuan la nedi getgesara dina epot ka leges atkin mun, la laxamdak mi laxaalik atdi dina nunu at ne Iesu, la loklok atdi nan manton kusu limixin petpes noxo epovo na tong i do nom laxamdak mi laxaalik di lox amisik laxakapmek, la kopmen dinang tonga res.
* 1 Ko 4:1Nedi nom luvuttadi amgomgo dina lok tatao lugugu at ne Moroa maxeneng at lotu ren. Kuren la lorooro atdi nan manton at lemeren limixin. Di noxo paase xuxurung. Nemen ditak musak soso, di noxo inin tangtangku mi lengkadan lolos. Nemen dita vesep. Nemen dita vavara pilas solo. Ketla nedi dina lok maraose mi limixin boro vetpes. Dina mumu asu loklok i nunuan ti lok tooro limixin. Lodoxoma atdi na lox avukat mun. Dina mumu asu loklok i nunuan. Loklok atdi xopmen taxakapmek teren. La di epovo ri lok tatao avukat luruptuvuk atdi basinge lempanga ua xopmen na lox avukat. * 2 Ti 4:3; Ta 2:1Nedi dinam tebeng lolos levelinga ruturun at ne Iesu, kerekngan nia aga lox ase vam di min. Dina nemen kuren kusu dina lox alolos lununu at limixin mi levelinga ik mokso, la kusu dina lox akmokso lodoxoma atnedi limixin di xopara na mumu asu levelinga at ne Iesu.
10  * 1 Ti 4:7Una soxolik ka nedi, loklok atnedi in manton kerepmo, kusu dina sep pepe buaang nedi limixin nunu ro Krit ding tonga xepe levelinga ruturun. Mo limixin di paase gamasa mun la di babala arup limixin. Nedi limixin me Judaia, mo dim tebeng alolos levelinga at ne Moses. 11  * Jo 10:12; 1 Pi 5:2; 2 Ti 3:6Una sep pepe di xusu di noxo vaase bok ba ro xeneng at laraogu lotu, mila dik lox ase limixin mi levelinga xopmen nak mokso la kerepmo dik lok kapmek lununu at limixin la dik lok kapmek bok lixitkis koetemen. Di lok na lavanga xusu dina lok kaka levempilas la na loklok atdi i lok kapmek tinotno.
12 Lara leeme vapaase me go Krit ga lok keretna, “Limixin me Krit nedi limixin kaxarang, loklok atdi i lok kapmek ngan lababo sio la nedi dik molo at lugugu la di xoxo anan amisik.” 13  * 2 Ti 4:2Na levelinga ren i ruturun. Kuren la una vaase sok di, kusu dina tu atmatkun at lununu atdi. 14  * 1 Ti 4:7Una paase lolos bok tidi xusu di noxo mumu asu leventetere at lubung mixin me Judaia, la kusu di noxo mu asu levelinga atnedi ding tonga aie levelinga at ne Moroa. 15  * Mt 15:11; Ro 14:20Di lok do leventaba leveluxa i xaala. Ketla i lox avukat do limixin nunu dina anan leveluxa axap. Nedi limixin kakapmek kopmen dina nunu at ne Iesu Karisito la di ke xepe leventaba leveluxa mila lodoxoma atdi xopmen na lox avukat la loklok atdi i lok bilinga. 16  * 2 Ti 3:5; 1 Jo 1:6; 2:4Di tong i do di nunu at ne Moroa, ketla kopmen na ruturun. Mila levempanga nunuan kopmen na ravasu at lorooro atdi. Loklok atdi i lok kapmek at lemeren ne Moroa la at lemeren limixin. Nedi limixin tongtonga xepe mun, la dixo epovo na lok tevempanga i nunuan.

*1:2: Kl 1:27

*1:3: Ep 1:9-10; Ta 2:10; 3:4; 1 Ti 1:1,11

*1:4: 2 Ko 8:23; Ga 2:3; 2 Ti 1:2; 4:10; Ro 1:7

*1:6: 1 Ti 3:2-7; 2 Ti 2:24-26

*1:7: 1 Ko 4:1

*1:9: 2 Ti 4:3; Ta 2:1

*1:10: 1 Ti 4:7

*1:11: Jo 10:12; 1 Pi 5:2; 2 Ti 3:6

*1:13: 2 Ti 4:2

*1:14: 1 Ti 4:7

*1:15: Mt 15:11; Ro 14:20

*1:16: 2 Ti 3:5; 1 Jo 1:6; 2:4