2 Timoti
Lovoang Sepsev Agepura At Ne Pol
Saparap Ne Timoti
Saparap Ne Timoti
Levelinga Loklox Axasep
Levenmaares 67–68 A.D.
Anai ni lovoang sepsev agepura ri ne Timoti. Pol ga malagan i na lovoang to Rom ap mo levenaleng neni ga nemen at loogu xokoxo. Diga lok li i at loogu xokoxo atla neni ga vavang mi ne Iesu Karisito. Pol ga doma i do noxo lox abao la dina sev amer i. Kuren la ap mo levenaleng neni ga malagan i na. Timoti neni laradi loklok tooro at ne Pol la nedu duga gugu buru la neni bok gamgomgo rinedi luvuttadi nunu mo digak lok to Epesas. Timoti mi ne Pol du buru duga nunu at ne Karisito. Kuren la ne Pol ga so asen ne Timoti do lamdak teren. At nai lovoang Pol ga paase mumu labalamu ren ti ne Timoti la ni ga vara i do neni na tu atmatkun tip kip mo levesongsongot neni ga ven i xeneng atnedi di munepen mi ne Iesu Karisito. Pol ga vara box i do ne Timoti na raba axap lorooro ren ti levenanasa mokmokso.
Lengkot silok keneng at na lovoang
1:1-5 Pol ga tong avukat ti ne Moroa mumu ne Timoti.
1:6–2:13 Timoti na tu atmatkun la na visik asu leven gugu nunuan.
2:14-26 Leveloklok katling ti lox ase dik mi luvuttadi gugu at ne Karisito.
3:1-9 At laxavaxap laxakapmek at limixin naba suu silok aleng.
3:10–4:5 Pol ga vaase alolos ne Timoti ri lugugu ren.
4:6-18 Lusumsuma at ne Pol mi lavavara ren.
4:19-22 Pol ga vaase abeese lentaba at lempapaase momo.
1
Lavapaase Axasep
1 *Ep 1:1Nenia ne Pol, lun pavang at ne Iesu Karisito. Moroa ga soxolik ka ia xusu ana tong asu levelinga at lorooro keneng at ne Iesu Karisito.
2 *1 Ti 1:2A malagan na levelinga ru ne Timoti, nenu lamdak orong tarak.
Letaba nabalamu, lebelen tuntun, la lenmila bok tu boro at ne Moroa ne Temen dik la ne Iesu Karisito, Leeme Silok atdik.
Levelinga Emi Asu La Loklox Alolos
3 *Pl 3:5; Gu 23:1Nenia a tong avukat ti ne Moroa. Nia a gugu rin ngan lavalabat tarak diga gugu rin la kopmen taxapmek i nemen keneng tarak. Nia a emi asu amisik mi ne Moroa at levenaleng kangking la levenaleng kanimin keneng at levesingising tarak. 4 A doma su bok ap mo laaleng aga on basinge u la ugang teng. La monga a vara i do ana ven box u xusu lorooro rak naba umsu mi lomomo. 5 *Gu 16:1A doma su bok at lununu ram. Lununu lolos bok ga nemen at lorooro at ne tubum tixin ne Lois la at lorooro bok at nenam ne Iunis. La nenia aklen i do lununu lolos kerepmo ik lok bok at lorooro ram.
6 *1 Ti 4:14Na mun i lavasuun teren la nia a vaase alolos u xusu unam tebeng alolos nom laramtaba ne Moroa gara raba vam u min ap mo loxonaleng nenia aga sa li lukngak mavana ram. 7 *Ro 8:15Atla Loroonan ne Moroa ga raba dik min kopmen nak lox araut lanmarat keneng atdik. Ketla mo Loroonan teren ik suxa aumsu dik mi lolos, labalamu la lodoxoma avukat.
8 *Ro 1:16Kuren la nemen uta lok mamangan ti paase asu levelinga at Leeme Silok atnedik. La nemen uta lok mamangan mu box ia atla nenia a nemen at loogu xokoxo mumu ne Karisito. Ketla atap kip levesongsongot mumu Lagale Lavavang mi lolos ne Moroa im taba dik min. 9 *Ep 2:8-9; Ta 3:5Neni ga lox arooro dik la ga xuruse ka dik kusu ataba lok ngan limixin teren. Kopmen mumu levempanga dik gara lok pam i. Ketla at lavavara ren, i lok ngan letaba nabalamu ren tidik keneng at ne Iesu Karisito. Ni ga raba dik mi na letaba nabalamu avot ti luruntudum li at na lavatbung menemen.
10 *1 Ko 15:55-57; Ib 2:14Ketla ne Iesu Karisito ga rupot pam de at na lavatbung menemen, la ga lox asuusu vam nom letaba nabalamu ren ngan Laradi Loklox Arooro atdik la ni ga lox axap lolos at lanmet. La at na levelinga at Lagale Lavavang ni ira lox asuusu vam lorooro avolo. 11 *1 Ti 2:7Ne Moroa gara soxolik ka vam ia ngan lun pavang la laradi loklox ase ri paase asu Lagale Lavavang. 12 Ni lavasuun teren la nia arap kip levesongsongot. Ketla nia move a tu atmatkun mila nia a nunu at ne Iesu Karisito. La akleklen tinotno i do neni i epovo na lok tatao ia la na lok tatao bok mo lugugu ne Moroa ga raba ia min, se ap mo laaleng neni nabamlong teren.
13 *1 Ti 1:10; 4:6; 6:3; Ta 1:9; 2:1Unam tebeng alolos nom levelinga ruturun at ne Moroa, nia aga anasa u min gano. Ni lampoovo una mumu asu i, la una nemen alolos at lununu ram. La labalamu ram saparap ne Iesu Karisito na nemen lolos. 14 *1 Ti 6:20At lolos at Loroonan Kaala nom i nemen keneng at lorooro atnedik, una lok tatao avukat nom levelinga ruturun uga lok ka i.
15 Uklen i do nedi axap limixin nunu boro at lenep silok Asia eburu mi ne Pigalas la ne Eremogenes diga on basinge vam ia. 16 *2 Ti 4:16Ketla a sing Leeme Silok do ni naba lox asuusu lebelen tuntun teren ti ne Onisiparas midi loxoetemen. Atla neni gak lox alolos amisix ia la neni goxo lok mamangan do nia aga nemen at loogu xokoxo. 17 Se neni ga rupot de Rom, neni ga puse ria se ni ga vuse ka ia. 18 *Ju 1:21A sing Leeme Silok atdik dola neni na lox asuusu lebelen tuntun teren ti ne Onisiparas ap mo laaleng at Leeme Silok. Nenu u xasep nunuan do ne Onisiparas gak lok tooro aleng ia ro Epesas.