3 Jon
Lovoang Sepsev Avantun At Ne Jon
Levelinga Loklox Axasep
Levenmaares 95–100 A.D.
Jon neni lun pinivu at ne Iesu, neni ga malagan i na lovoang ti lentangas teren ne Gaius. Anai ni lovoang tuturun. At nai lovoang ne Jon goxo tong asuvos laasen teren, ketla limixin diga doma i do ne Jon neni ga malagan i. Keneng at nai lovoang at lengkakan 9-11 neni levelinga matmatkun. Jon ga tong i ridi do dina gugu mi lodoxoma nunuan kusu ti soxolik ka luvuttadi loklok tatao ri lotu. Goxo lox avukat do dina soxolik ka luvuttadi amgomgo at na lavatkangka kusu dinam gomgo at lotu, atla ne Diotrepes ga lox axatu laxakapmek kantubu at limixin lotu, la lorooro atdi goxok mokso. Kuren la nedi dina soxolik ka nedi luvuttadi ua di vavara aleng ne Moroa, kusu dina lok tatao avukat ngan luvuttadi amgomgo at lotu, la kusu limixin diba mumu asu di.
Lengkot silok keneng at na lovoang
1:1-4 Lavapaase momo.
1:5-8 Lavapaase mumu asu ri ne Gaius.
1:9-12 Lavapaase mumu ne Diotrepes la ne Demitrius.
1:13-15 Lavapaase abeese.
1
Lavapaase Axasep
1 *2 Jo 1:1Nenia lamgomgo at lotu.
A malagan na lovoang ti lentangas orong tarak, ne Gaius. Nenia a balamu ruturun u.
2 Lentangas tinotno rak. Nia a sing ne Moroa do una momo mi lorooro avukat u ruuna ka i at labantuxu ram kerekngan loroonan taram i ruuna lorooro avukat. 3 *2 Jo 1:4Nenia aga lok momo aleng at loxonaleng leventaba at luvutneton dik diga rupot la diga vaase asuusu lorooro ram, do u ruturun amisik, i ngan do lorooro ram ik sixit emu mi levelinga ruturun at ne Moroa. 4 Ise nenia a ronga i do luvutnuruk di mumu asu luruturun, nenia a lok momo aleng.
Jon Ga Emi Asu Mi Ne Gaius
5 Lentangas orong tarak. At lugugu ram ti lok tooro luvutneton dik, uk lox ampana avukar i, keke i do nenu uxoklen di. 6 *Ta 3:13Diga vaase asuusu labalamu ram to melamgo at limixin at lotu nade. La naba lox avukat do una lok tooro nedi at lavatpas atdi, mila loklok kerepmo i epovo at lavavara at ne Moroa. 7 *1 Ko 9:12,15Diga on basinge lara menemen atdi ri vaase asu laasen at ne Karisito la di goxo lok kaka tevempanga anan kopla tevempilas boro at lavamolon. 8 Kuren la i epovo rinotno do nedik limixin nunu ata lok maraose mi nom luvuttadi kusu nedik axap ata gugu eburu ti tong asu levelinga ruturun.
Diotrepes Mi Ne Demitrius
9 Aga malagan pam lovoang tinemi limixin at lotu mumu i na lavanga. Diotrepes neni laradi i vavara aleng i do na lok ngan lamgomgo atnimi, ketla neni ixo mu asu levelinga atnama. 10 Kuren la do nenia ana vot saparap nimi, anaba tong asu axap lempanga neni ira lok pam i, mo i lok kapmek. Ik lok levempapaase ren mumu nama ua i lok kapmek aleng. Neni xopmen nak lok mene nga mo loklok, ketla neni ixok lok tooro bok luvuttadi vavang do dit pot to at lemenemen teren la neni ip sep pepe limixin at lotu mo di vavara nak lok tooro mo luvuttadi vavang. La ik lok kepe bok mo limixin basinge lixitkis keneng at lotu.
11 *1 Jo 3:6-10Lentangas tinotno rak. Nemen gat uguta mu asu loklok at luvuttadi xapmek. Ketla una mu asu leveloklox avukat. Do nege i lok leveloklox avukat, neni at ne Moroa. La do nege i lok laxakapmek, neni kovisi na ven kibis ne Moroa.
12 *Jo 19:35Limixin axap di paase levelinga avukat mumu ne Demitrius la lorooro ren ik sixit epovo mi levelinga ruturun. Nema bok ma paase levelinga avukat mumu i, la nemi miklen i do na levelinga atnama i ruturun.
Levempapaase Abeese
13 *2 Jo 1:12A ruuna laxalinga solo xusu ana tong i ru, ketla a xopara i xusu ana malagan i mi lempanga mamalagan. 14 Am doma ali i do aba ven ba u melemu la ataba epentu la ata epaase.
15 Lenmila na nemen eburu minu. Nedi larapen tangas axap taram nade di lox aonon levelinga momo ru. Nenu xa una raba levelinga momo ri larapen tangas atnama medo.