Leven Gugu
Leven Gugu At Luvuttadi Vavang
Levelinga Loklox Axasep
Lumaares 61–62 A.D.
Luk ga malagan na lubuk ti ne Tiopilas. Avot tinotno ri na lubuk, Luk ga malagan la ga lox axasep leventetere la levempapaase la lorooro at ne Iesu keneng at lubuk Luk. Nai lubuk ne Luk ga malagan i kusu ti lox axasep ne Tiopilas ti lempanga salai luvuttadi vavang at ne Iesu diga lox i melemu at lanmet teren. Lentaba leventetere at nai diga re i ri ne Luk, ketla lentaba neni ga xasep teren mila neni ga emu mi ne Pol. Kuren la keneng at luvut silok 16, ta ven i do Luk ga vot pasa ne Pol la ga emu min. Na lubuk i ruuna lavantun lengkot silok. Avot tinotno i lox ase dik mi luvuttadi vavang diga ruuna ka Loroonan Kaala ro Jerusalem la diga ruka lugugu. Melemu i lox ase dik do diga vavang la limixin diga beles keneng at luutus atnedi, limixin to at lengkot Judaia la Samaria. I lox ase bok dik do mo Lagale Lavavang mumu ne Iesu ga epeseves la buaang nedi limixin at na lavatbung menemen diga ronga i. Na lubuk i lox ase dik do Loroonan Kaala ga raba lolos ti limixin nunu kusu dina lok buaang lempanga sangsangu kusu buaang nedi limixin diba nunu at ne Iesu.
Lengkot silok keneng at na lubuk
1:1–5:42 Lurutu kaxat la lusuusu atnedi diga nunu.
6:1–9:31 Limixin nunu di ekip tangarang mi levesongsongot.
9:32–12:25 Lempapaase mumu levempavang at ne Pita.
13:1–14:28 Lavatpas avot at ne Pol.
15:1-41 Luvuttadi amgomgo diga vot buru ro Jerusalem.
16:1–18:23 Lavatpas sepsev agepura at ne Pol.
18:24–21:14 Lavatpas sepsev avantun at ne Pol.
21:15–28:31 Larangtanga alis la lavatpas at ne Pol uto Rom.
1
1 *Lu 1:3Saparap leeme silok ne Tiopilas.
At lovoang avot tarak aga malagan axasev u mi lempanga ne Iesu ga lox i la ga anasa min, ga ruka i ap mo laaleng ni ga vaxaru kaxat leven gugu ren, 2 *Mk 16:19; Lu 24:49-51se at laaleng ne Moroa ga lam kaka i uto vana at laxalibet. Goxovisi ni goxo urut uto vana la ni ga vaase mi levelinga at Loroonan Kaala rinedi luvuttadi ni ga soxolik ka nedi do luvuttadi vavang teren. 3 *Lu 24:36-49; Gu 10:41At lavanuet sangaun aleng melemu at lanmet teren, ni ga ru asuvos tinedi luvuttadi vavang teren ti lox asuusu i do ni i ruturun mo gara roo xat amlong pam basinge lanmet, la nedi axap diga ven i. La ni ga paase axasep limixin mumu Linintoo at ne Moroa. 4 *Lu 24:49; Jo 14:16-17; Gu 2:33At lara laaleng diga vot pasa i la ni ga raba nedi mi lavapaase ali la ga tong lolos i ridi xeretna, “Nemen mita vas kaxat basinge lemenemen Jerusalem. Ketla mina nemen tangais laramtaba ne Tamak ga vaase ali min tinimi, i ngan nia aga tong pam i rinimi xeretna. 5 *Mt 3:11Jon ga sep susu nimi mi ladan, ketla noxo lox abao bok ba la minaba lok kaka lesep susu at Loroonan Kaala.”
Moroa Ga Lam Kaka Ne Iesu Uto Vana At Laxalibet
(Mt 28:16-20; Mk 16:19-20; Lu 24:50-53)
6 *Lu 24:21At lara laaleng luvuttadi vavang digak lok eburu mi ne Iesu la diga sue i, “Leeme Silok. Kereva, uba riki xepe bok leme Rom, kusu nedik axa mede Israel ataba lok tatao nedik at na levenaleng?”
7 *Mk 13:32Iesu ga vorang i ridi xeretna, “Ne Tamak axa ga lok katling pam mo laaleng mo lavanga naba rupot teren, la ixo epovo xusu minaklen i do at ua laaleng. 8 *Mt 28:19; Lu 24:48; Gu 2:32; 3:15; 5:32Ketla nemi minaba umsu mi lolos at laaleng Loroonan Kaala na vubeles atnimi. La minaba paase katling mi lorooro rak tinedi limixin to at lemenemen silok Jerusalem, la to bok at lengkot axap at lunep silok Judaia la Samaria, la to at lengkot axap bok at na lavatbung menemen kopok.”
9 *Jo 6:62Melemu at na levelinga ren, Moroa ga lam kaka i upana la loxontakabu ga lok pe i basinge levereven atnedi.
10 *Lu 24:4Nedi move diga reven lolos mu at ne Iesu upana at lamavangkap la soso mun lura luradi duga siga levesingsiga bunbun duga ru saparap nedi. 11 *Mt 26:64; Lu 21:27La duga lok, “Luvuttadi me Galili, laai mo mi tu mu i la mia reven upana at lamavangkap? Na ne Iesu, ne Moroa i lam kaka i basinge nimi uto vana, ni nabamlong bok kerekngan tai mo nemi mi ven i, i urut uto vana at laxalibet.”
Diga Soxolik Ka Lara Ri Lok Kun Ne Judas
12 *Lu 24:50-53Melemu luvuttadi vavang digamlong uto Jerusalem boro at loxongkaana, laasen teren, Lakaana Olip, ik lok saparap lemenemen silok Jerusalem. 13 *Mt 10:2-4Diga rupot to at lemenemen silok Jerusalem la diga vubeles uto vana at loogu diga nemen teren. Pita, Jon, Jems la ne Endru, Pilip la ne Tomas, Batolomiu la ne Metiu, Jems nitna ne Alpias, Simon neni at lubung mixin me Selot. La ne Judas nitna ne Jems. 14 *Jo 6:42; 7:5Digat pot eburu amisik mi lentaba lavakin la ne Maria nenen ne Iesu mi luvutneton ngan loxonbinam tadi xusu dina ngising.
15 At lara laaleng Pita ga xatu kaxat kantubu atnedi legesa sangaun kobot mi legepu sangaun (120) luvuttadi nunu. 16 *Sam 41:9La ga lok tidi, “Luvutnetak mi luvurinuk, levelinga keneng at Lovoang Kaala migomgo na ira soorun, kerekngan Loroonan Kaala ga tong asu i at lengkompixan at ne Devit, mu ne Judas. Neni laradi gam gomgo rinedi luvuttadi xusu dina ranga alis ka ne Iesu. 17 Judas neni mo lara atnedik ga gugu eburu minedik.”
18 *Mt 27:3-10Ni ga lok ka luunun ti mo laxakapmek teren, la neni ga un kaka loxongkangka min. Ni ga subu go la lorongtong teren gara repagam la labantine ren ga sixisu nga ukamang. 19 La nedi limixin axap diga nemen go Jerusalem, diga ronga mo lavanga, la diga so asen mo loxongkangka at lavapaase axa atdi, do Akeldama, lavasuun teren keretna, “Loxongkangka at Lada.”
20 La ne Pita ga lok bok, “Keneng at levempikpixan (Sam) i lok keretna,
‘Mo loogu ren na nemen gamasa. La tara noxo nemen bok ba ren.’ Sam 69:25
Melemu bok,
‘Mo lugugu ren tara naba xip kaka i ren.’ Sam 109:8
21-22 *Jo 15:27Kuren la ata soxolik ka tara, kusu na gugu eburu midik la na tong asu laxakatu kaxat amlong at Leeme Silok ne Iesu. Ata soxolik ka tara atnedi luvuttadi diga nemen eburu midik ap mo levenaleng Leeme Silok ne Iesu ga emu eburu midik. Ga vaxaru ka i ap mo laaleng ne Jon ga sep susu ne Iesu se at laaleng ne Moroa ga lam ka i uto vana at laxalibet. La neni naba xip ka mo lugugu at ne Judas.”
23 Kuren la diga soxolik ka legepu radi. Josep, laasen bok teren ne Basabas, la lara laasen bok ne Jastas. La ne Matatias. 24 *Jo 2:25La diga sing keretna, “Leeme Silok, nenu ukleklen lodoxoma at limixin. Una lox ase nama mi tara atdu na luradi nu ura soxolik ka vam i, 25 kusu na xip ka mo lugugu at ne Judas ngan luvuttadi vavang la ni gat pas uto at lemenemen songsongot i epovo rin.” 26 La diga lu buru mi lengkonuat la mo loxonuat at ne Matatias ga subu avot to at laxangka, kuren la ni ga vubeles eburu minedi lasangaun legesara xusu tip kip mo lugugu.