9
Moroa Eburu Mi Limixin Me Judaia
1 Nenia at ne Karisito la nenia axo xaxarang. Loroonan Kaala ik lok tatao lodoxoma avukat tarak la ik lox axasep box ia do nenia axo xaxarang. 2 A paase ruturun i na dola lainbulu la lebelen tuntun tarak ti lubung mixin tarak i silok aleng. 3 * Pas 32:32La i epovo dola nenia gita xip tutu mi lebelemamao at ne Moroa la gita lox epeseves ia basinge ne Karisito, kusu ti lok tooro luvutnetak, nedi limixin axa rak me Judaia. 4 * Pas 4:22; Lal 7:6; 14:1-2Nedi limixin soksoxolik ka at ne Moroa, la ni ga lok li nedi ngan luvutnitna. Ni ga lok levenekabus eburu minedi la lisisixam teren ga nemen kantubu atdi, la ga raba nedi mi Laulis Linga. Diklen langas kusu dina lotu saparav i mi luruturun, la dira ruuna ka vam leveng kakaape ren. 5 * Mt 1:1-16; Jo 1:1; Ro 1:25Nedi lubung mixin diga ravasu at lempareme avolo megano. La ne Karisito, neni ga vot ngan laradi, neni atnedi na lubung mixin. Leemi asu ri ne Moroa neni ik lok tatao lempanga axap la kopmen taxavaxap teren! Tuturun.
6 * Kex 23:19; Ro 2:28Nia axo vaase dola, ne Moroa goxo lox epovo laxakaape ren. Atla kopmen limixin axap me Israel nedi limixin soksoxolik ka at ne Moroa. 7 Nedi livipisik li at ne Abaram, ketla kopmen nedi axap luvutnitna ne Moroa. Ne Moroa ga vaase ri ne Abaram keretna,
“Lubung mixin at ne Aisak kusuk mun dinabak lok ngan livipisik li ram.” Lur 21:12
8 * Ga 4:23Lavasuun at na xeretna, kopmen nedi axap livipisik li at ne Abaram di lok ngan lubung mixin tuturun, ketla nedi mun ne Moroa ga xaape midi ri ne Abaram di lok ngan lubung mixin tuturun at ne Abaram. 9 La ne Moroa ga lok mo laxakaape mi na levelinga.
“Ap mo laaleng mokmokso nia anabamlong la ne Sera naba ruuna ka tamdak temes.” Lur 18:10,14
10 * Lur 25:21Ketla kopmen neni xusuk mun na. Lumdak at ne Rabeka duga ruuna legese temen du, la neni lurubuno avolo atnedik ne Aisak. 11 Ketla avot at livipisik at na lumdak kopla du gita lok tempanga avukat kopla tempanga xapmek, ne Moroa ga lox avot be losoksoxolik teren kusu mo losoksoxolik teren naba tu at lodoxoma ren. 12 Losoksoxolik teren keretna, neni goxo ven ti lugugu atdu, ketla neni ga doma mu lorotoro ren. Kuren la ne Moroa ga lok ti nenen du xeretna,
“Lara avot naba gugu taba lara mumu.” Lur 25:23
13 I ngan Lovoang Kaala i tong i xeretna,
“A vara aleng ne Jakop, ketla axo mulus ka ne Esao.” Mal 1:2-3
14 Ataba tong ka la? Taba tong ka i do na levelinga at ne Moroa ixok mokso? Kopmen tinotno. 15 I ngan mo levelinga ne Moroa ga vaase i ri ne Moses keretna,
“Anaba lox asuusu lebelen tuntun tarak ti nege a doma i, la anaba lox asuusu labalamu rak ti nege a doma i.” Pas 33:19
16 * Ep 2:8Loklok at laradi noxo lox i xusu ne Moroa naba soxolik ka i, ketla lebelen tuntun kusuk mun at ne Moroa. 17 I ngan Lovoang Kaala i vaase mumu ne Parao xeretna,
“Nenia aga lok li u ngan loorong. Lavasuun teren keretna, kusu anaba lox asuusu lolos tarak keneng at lorongtonga xepe ram, la keneng at nai limixin at lavatbung menemen axap dinabaklen laasen tarak.” Pas 9:16
18 * Pas 4:21; 9:12; 14:4Kuren la ne Moroa i lox asuusu lebelen tuntun tinedi do neni i doma di, la i lox amer avavarang levendoxoma atnedi do neni i doma box i xuren.
19 Tara atnemi naba sue ia xeretna, “Dola kuren, Moroa naba sok taba taradi xereva? La nege i epovo xusu na esev eburu mi lodoxoma at ne Moroa?” 20 * Ais 29:16; 45:9Ketla nege nenu, laradi gamasa, u gagang linga ne Moroa? Ixo epovo do lavat sosopen kangka na susue laradi ik lox i do, “Tila u lox ia xeretna?” 21 * Jer 18:6Laradi ga lok mo lososopen kangka, neni xa i epovo xusu neni na lok mo loxompong kangka at langas ua i doma i xuren, la na lok bok tegepu sosopen mi mo mun legese xompong kangka, tara nunuan ti ove at levenaleng silok la tara diba vove min at levenaleng axap.
22 La ne Moroa i lok bok losoksoxolik teren kuren. Neni ga vara i xusu na lox asu lumukmusak teren la na lox ase lolos teren. Ketla neni move naba ke amulus nedi limixin dik lox abelemamao i, keke i dola nedi limixin kakapmek la i epovo xusu neni na sele utut nedi. 23 * Ro 8:29; Ep 1:3-12La ni ga vara box i xusu neni na lox asu lagale lisisixam teren, no ni ga soli asu i rinedik limixin ua neni ga belen tuntun tinedik. La ti nege atdik no neni gara gagas pam di xusu dinaba lok kaka lisisixam teren, 24 mo nabak lok tinedik na, neni gara ro ka vam nedik, kopmen do at limixin me Judaia xusuk mun, ketla boro bok at limixin kopmen di me Judaia. 25 I ngan neni ga vaase i ro xeneng at lubuk at ne Osea xeretna,
“Limixin di goxo ruuna ka ia ngan Lamgomgo atdi, nia anaba tong di do nedi limixin tarak. Lara lubung mixin no nenia a goxopara di, anaba tong di do nedi at laxat tinotno rak.” Ose 2:23
26 La neni ga lok bok,
“La to ap mo loxot tino neni ga tong i do, nemi xopmen limixin tarak, mo go neni naba tong di do nedi luvutnitna ne Moroa, Luntoo Avolo.” Ose 1:10
27 La ne Aisaia ga vaase mumu bok leme Israel keretna,
“Limixin bok me Israel di buaang aleng ngan levenit kangkaneng nou saparap laras, ketla teventaba mun atdi naba roo su. 28 Leeme Silok naba lok soso mun ti vorang laxakapmek at limixin at lavatbung menemen axap.” Ais 10:22-23
29 I ngan ne Aisaia gara tong pam i gano, ni ga lok keretna,
“Amo dola Leeme Silok, Lanaraavuk gi toxo ke xepe lavalabat atnedik, nedik na gitaba lok kapmek ngan limixin me Sodom, nedik gitaba uu ngan bok limixin me Gomora.” Ais 1:9
Lorongtonga Xepe At Leme Israel
30 * Ro 10:20Ataba tong ka toxolinga salai? Limixin kopmen di me Israel, nedi di goxok lok tong i xusu dinan manton at lemeren ne Moroa, ketla digan manton tino mumu lununu atnedi. 31 * Ro 10:2-3Ketla leme Judaia, nedi lavaanat soksoxolik ka at ne Moroa diga puse ri teventaangas kusu dina nemen manmanton at lemeren ne Moroa, la di goxo epovo. 32 Tila ba la di goxo epovo? Atla levempanga diga lox i goxo ru rinotno at lununu atdi, ketla at leven gugu mun atdi. Digak sak kikixin at Luuat Kis, 33 * 1 Pi 2:6; Ro 10:11no Lovoang Kaala i paase min keretna,
“Mina ven ba i, a lok li Luuat Kis to xeneng at lemenemen Saion ti lok limixin dinaba sak kikixin teren. Mo Luuat Kis naba lok nedi dina subu. Ketla nege do i nunu ren, neni noxo doma saasaa.” Ais 8:14; 28:16