10
1 Luvutnetak mi luvurinuk. Lodoxoma rinotno ro xeneng at laxat tarak do limixin tinotno rak dinaba roo su. La a ngising amisik ne Moroa rinedi. 2 Nenia a epovo xusu ana tong i do nedi di lolos kusu ti lok lugugu ri ne Moroa. Ketla mo lavavara atnedi ri ne Moroa, kopmen na ru rinotno at lakleklen tuturun. 3 Nedi di goxoklen langas ne Moroa ga lok li i xusu tik lox asepmus di basinge laxakapmek, ketla diga puse ngas axa at levendoxoma atnedi. Kuren la di goxo raba axa di ri ne Moroa la langas ne Moroa ga lox i rik lox anmanton tino limixin. 4 *Mt 5:17; Jo 3:18La ne Karisito gara lox epovo vam Laulis Linga, kusu nege i nunu, neni laradi manmanton tino.
Langas At Limixin Axap Ti Linintoo
5 *Ro 7:10; Ga 3:12Moses ga malagan levelinga mumu langas ti lox anmanton limixin keneng at lorongtonga res at Laulis Linga, ni ga lok keretna,
“Nege do i mumu asu levempanga Laulis Linga i tong i, neni naba lox epovo axav i ri roo su ren.” Mas 18:5
6 Ketla anaa levelinga i paase mumu langas ti lox anmanton tino limixin at lemeren at ne Moroa mi lununu.
“Nemen gat uguta doma raba u mi lususue do, ‘Nege naba urut uto vana at laxalibet?’ ”Lal 30:12 (kusu ti lok ka ne Karisito ude xopok.)
7 La i paase bok keretna,
“Nemen gat uguta lok bok do, ‘Nege naba si uto xopok at lemenemen at labarongan?’ ”Lal 30:13 (kusu ti lox asu ne Karisito basinge limixin diga met pam.)
8 Ketla Lovoang Kaala i lok keretna,
“Levelinga at ne Moroa mo ik lok saparap nimi, nom ik lok at levenbulubun atnimi la no xeneng bok at levempeve atnimi.” Lal 30:14
Neni na, levelinga at lununu nema ma vavang min. 9 Do mina vaase asu mi levenbulubun atnimi do ne Iesu ni Leeme Silok, la mina nunu mi lebelen nimi axap do ne Moroa ga lox aroo amlong ne Iesu at lanmet, nemi minaba roo su. 10 Kuren la nemi do mina nunu mi lebelen nimi axap, nemi minaba sepmus. La do mina vaase asu i mi levenbulubun atnimi, minaba roo su. 11 *Ro 9:33Lovoang Kaala i vaase i xeretna,
“Do nege do i nunu ren, neni noxo doma saasaa.” Ais 28:16
12 *Gu 15:9Anaa levelinga i vung kimit limixin axap, atla kopmen tevereven petpes kantubu at limixin me Judaia la limixin kopmen di me Judaia. Moroa xusuk mun legese Eme Silok atnedik axap, la ik lox anarong aleng nedi di ngising ti loklok tooro boro ren. 13 I ngan levelinga at Lovoang Kaala i vaase xeretna,
“Limixin axap di toro ke at laasen at Leeme Silok, dinaba roo su.” Jol 2:32
14 Ketla dinaba sing kereva do nedi xovisi dina nunu? La dinaba nunu xereva do nedi xovisi dina ronga xaka levelinga? La dinaba ronga ka tavanga salai do kovisi tara na vaase asu tevelinga ridi? 15 La tevelinga naba ravasu xereva mo do dixo riki asu taradi ri vavang min? I ngan Lovoang Kaala i tong i xeretna,
“I lox avukat tinotno lavatpas atnedi di vot mi Lagale Lavavang.” Ais 52:7
16 *Jo 12:38Ketla limixin axap di goxo siam kaka Lagale Lavavang. I ngan bok ne Aisaia ga lok keretna,
“Leeme Silok. Goxo buaang nedi diga nunu at levelinga maga vaase asu i.” Ais 53:1
17 *Jo 17:20Kuren la lununu it pot do laradi ing tonga levelinga, la levelinga i laala boro at Lagale Lavavang at ne Karisito. 18 Ketla a sue xeretna, i ruturun do di goxo ronga levelinga? Laaba, diga ronga i, i ngan pam Lovoang Kaala i vaase i xeretna.
“Levempapaase atdi ga ravasu ri limixin at lavatbung menemen axap. La levelinga atdi gat pas ti latnese at na lavatkangka.” Sam 19:4
19 Nia ana sue bok lususue xeretna. Kereva, limixin me Israel di goxo xasep ap mo levelinga? Laaba, diga xasep teren. La ne Moroa ga lok tong i do na sar amlong di. Moses neni lara avot ga tong mo lodoxoma at ne Moroa xeretna,
“Anaba lok nemi xusu minaba reven peves at limixin kopmen dina ruuna toxot keneng at losoksoxolik at ne Moroa. La anaba lok bok nemi xusu mina belemamao mumu lara lubung mixin kopmen dinaklen ne Moroa.” Lal 32:21
20 La ne Aisaia ga vaase axasep tinotno xeretna,
“Lara lubung mixin di goxo puse ria ketla diga vuse ka ia, la nia aga vot saparap nedi di goxo susue vupuse ria.” Ais 65:1
21 Ketla ti limixin me Israel, Moroa ga vaase xeretna,
“At levenaleng axap agara gagas pam kusu ti siam kaka amlong nedi luvuttadi rongtonga xepe la luvuttadi gagang linga.” Ais 65:2