Ro Ki Petrus Ta Iwe Ru Pa
1
Nio Simon Petrus, mbesooŋo mi ŋgoŋana ki Yesu Krisi.
Aŋbeede ro ti ima piom wal tau kakam urlaŋana ŋonoono raraate kembei ta niam na. Urlaŋana tiom tana, mbulu ndeeŋeŋana ki Yesu Krisi ta Anutu kiti mi ulaaŋa kiti na, ina iwe zaala piom ma kakam. Ro 1:12
Niom tina ku'urur leleyom pa Anutu kiti mi Merere kiti Yesu, mi kuute kat zin. Ŋgar tiom tana ko iwe zaala piom be kampeŋana mi mbotŋana ambaiŋana ta Anutu ikamam piti na, izze tiom ma biibi. Ŋonoono.
Mbulu pakan tabe takam, to bobi ki Anutu iur ŋonoono piti
Iti tomtom ta tuur lelende pa Krisi mi tuute kati na, ni itunu mburaana ikam lende koroŋ ambaimbaiŋan boozomen kek, bekena iuulu iti ma takam mbotŋana kini mi mbulu ta ni leleene pa i. Pa Anutu, ni kampeŋana katuunu, mi zaana biibi pa mburaana mi mbulu kini ndabokŋana. Tanata iboobo iti ma tewe lene. Mi ipomoozo iti, mi ikam ti ma zanda pa koroŋ bibip mi koroŋ ŋonoono ta ni imbuk sua pa na. Sua kini mbukŋan tina, ina irao be itooro iti ma lelende mi ŋgar kiti iwe kembei ta ni itunu. Mi itatke iti pa mbulu sananŋana ki kulindi ta ikiskis iti tomtom ta tombot su toono ti na, mi ipasansaana iti. Yo 1:12; 2Kor 3:8, 7:1; Ep 4:24; 1Yo 3:2
Anutu ikam mbulu boozomen tana piti kek, tana kakam kinkiini be keseeŋge urlaŋana tiom pa mbulu ambaiŋana. Mi mbulu ambaiŋana na, keseeŋge pa ŋgar ambaiŋana. Tana kakam kinkiini be kuute kat Anutu mi sua kini. Ga 5:6; Kol 2:3 Mi ŋgar tiom tana na, keseeŋge pa mbulu ki tagabiizi itundu. Mi mbulu tana na, keseeŋge pa mbulu ki temender mbolŋana mi tabaada pataŋana. Mi mbulu tana na, keseeŋge pa mbulu ki tomototo Anutu mi tototo mbulu kini. 1Kor 9:25; Ga 5:22+ Mi mbulu tana na, keseeŋge pa mbulu ki tuur lelende pizin toŋmatiziŋ kiti ta ki Krisi i. Mi mbulu tana na, keseeŋge pa mbulu ki tuur lelende pa tomtom ta boozomen. 1Tes 3:12; 1Yo 4:21 Pa sombe mbulu ta boozomen tana izze be imbol piom, inako ŋgar ta kakamam pa Merere kiti Yesu Krisi na, iur ŋonoono ambaimbaiŋan boozomen. Yo 15:2; Tit 3:14 Tamen tomtom ta so itoto mbulu tana som, na ni mata pisŋana, mi mataana ilala pa koroŋ ki Anutu som, mi mataana mbeleele uraata biibi ta Krisi ikam pini kek na. Uraata ta kembei: Ni ipusi pa sanaana kini ta muŋgu ikamam na. Ibr 9:14; 1Yo 1:7, 2:9+
10 O niom toŋmatiziŋ tio, Merere ipeikat yom, mi bobi kini ikam yom ma kewe lene kek. Tana kakam kinkiini pa mbulu ta boozomen tana. Naso ituyom kuute kat kembei bobi kini ikam yom kek, mi bobi tana iur ŋonoono piom. Mi niom ko irao kotop ma kipizil kat ndemeyom pini na som. Som kat. Ibr 3:12,14; 2Pe 3:17 11 Mi kaimer, sombe kelela kar saamba, nako tikam yom ma tau lelen ambai kat piom. Kar tana, Yesu Krisi ta Merere mi ulaaŋa kiti na, kola ikam peeze pa ma alok.
Petrus iso sua pa meeteŋana kini
12 Ŋonoono, sua ti, niom kuute lup kek. Pa niom kikiskis sua ŋonoono ma imbol piom. Tamen nio leleŋ be aŋpototo sua tio. Naso motoyom iŋgalŋgal mi kikiskis kat. 13-14 Nio aŋute: Molo som to aŋzem beeze tio ta ki toono ti * Beeze ti, ina Petrus iso pa itunu kuliini. ma imborene. Pa Merere kiti Yesu Krisi iso yo ta kembei. Tana mazwaana ta so aŋbotmbot men su toono na, aŋre kembei ambai be aŋpeyei ŋgar tiom pa sua ti. Yo 21:18+; 2Kor 5:1+ 15 Mi nio ko aŋru zaala pakan. Beso aŋzem yom ma iŋgi, tona motoyom iŋgalŋgal sua ta aŋkamam piom. Kokena motoyom mbeleele.
Petrus ire kat Krisi mburaana, tanata ipombolmbol ka sua
16 Indeeŋe tau amso yom pa Merere kiti Yesu Krisi mburaana mi miiliŋana kini na, amto mbol soroksorok tau wal ŋgarŋan pakan tipakamkaam zin tomtom pa i na som. Niam amre kat mburaana mi azuŋka kini pa motoyam, tanata ampombolmbol ka sua. Mt 17:1+; Yo 1:14; 1Kor 1:17, 2:1 17 Pa muŋgu, niam ambotmbot, mi amre Tamanda Anutu ipakuri, mi ikam mburaana ma zaana biibi pini. Mi amleŋ kalŋaana ta imbot lela azuŋka mburaanaŋana ki Anutu leleene ma ipet, mi iso pini ta kembei: “Ina nio lutuŋ ŋonoono ta leleŋ pini ilip.” Mt 17:5 18 Ŋonoono kat. Niamŋan Krisi ambotmbot sala abal potomŋana, mi ituyam amleŋ kat Anutu kalŋaana ta imbot saamba mi isu. Mt 17:1+
Sua ta muŋgu Anutu kwoono bizin tibeede se ro na, iti bela tikiskis mi tototo
19 Mbulu boozomen ta ipet pa Yesu na, ipombol yam ma amurla kat ta kembei: Sua ta muŋgu Anutu kwoono bizin tibeede se ro na, sua ŋonoono men. Tana niom sombe kikiskis sua kizin mi kototo, mi ila ila ma irao pitik Birae Pitik Birae, ina imender pa Krisi mi miiliŋana kini. Re Tur 22:16 mi Nam 24:17. pok ma ise, mi iur mat pa leleyom, inako ambai. Pa sua kizin, ina kembei kai ta iyaryaara lela zugut leleene. Mbo 119:105; Yo 5:35; Tur 22:16 20 Mi kere. Koroŋ ta, ta biibi kat. Tana kakam kat ŋgar pa. Merere sua kini ta muŋgu kwoono bizin tiso mi tibeede se ro na, suruunu sa ipet pa tomtom zitun ŋgar kizin som. 21 Pa zitun lelen mi tiso sua tana som. Ina Bubuŋana Potomŋana ta isalakaala zin, mi ikam zin ma tiso Anutu sua kini, kembei ta miiri isala wooŋgo leŋana, mi ipusuk ma ila. Ŋgo 1:16, 3:18; 2Tim 3:16; 1Pe 1:10+

1:1: Ro 1:12

1:4: Yo 1:12; 2Kor 3:8, 7:1; Ep 4:24; 1Yo 3:2

1:5: Ga 5:6; Kol 2:3

1:6: 1Kor 9:25; Ga 5:22+

1:7: 1Tes 3:12; 1Yo 4:21

1:8: Yo 15:2; Tit 3:14

1:9: Ibr 9:14; 1Yo 1:7, 2:9+

1:10: Ibr 3:12,14; 2Pe 3:17

*1:13-14: Beeze ti, ina Petrus iso pa itunu kuliini.

1:13-14: Yo 21:18+; 2Kor 5:1+

1:16: Mt 17:1+; Yo 1:14; 1Kor 1:17, 2:1

1:17: Mt 17:5

1:18: Mt 17:1+

1:19: Pitik Birae, ina imender pa Krisi mi miiliŋana kini. Re Tur 22:16 mi Nam 24:17.

1:19: Mbo 119:105; Yo 5:35; Tur 22:16

1:21: Ŋgo 1:16, 3:18; 2Tim 3:16; 1Pe 1:10+