1 Timbot ma mbeŋbeŋŋana, to zin bibip kizin patoronŋana kan ziŋan zin peeze kan mi zin ŋgarŋan ki tutu timap ma tilup zin, mi timbuk sua pa Yesu. To tipo i mi tikami ma tila tiuri la Pilatus namaana. 2 Pilatus ikami, to iwi i ma iso: “Parei, nu tana, ta king kizin Yuda?” Yesu ipekel kwoono ma iso: “Sua ta so na.” 3 To zin bibip kizin patoronŋana kan timaŋga mi tiŋgal sua boozo pini. 4 Tana Pilatus iwi i mini ma iso: “Parei, nu rao be pekel kwon som? Pa re. Zin timbel sua ŋgalŋana pu.” 5 Tamen Yesu ipekel sua sa som. Imaane men. Tabe Pilatus ikam ŋgar boozo.✡ Yesa 53:7

6 Lupŋana biibi tana iso iwedet, na gabana ki Rom ikamam mbulu ta kembei: Zin wal ta timbotmbot lela ruumu sanaana leleene na, sombe iwal biibi tiwi i pa kizin tasa be iyooto, to izemi ma ila sorok. 7 Indeeŋe mazwaana tina na, tomtom ta, zaana Barabas, ni ziŋan wal pakan timbotmbot lela ruumu sanaana tomini. Uunu kizin ta kembei: Muŋgu timaŋga ma tikam malmal be tiziiri zin Rom. Mi malmal tana na, tipun tomtom pakan ma timetmeete.

8 Tana iwal biibi tila tilup la ki Pilatus, mi timaŋga na tiwi i be ito mbulu tana mi ikam tomtom kizin sa ma iyooto. 9-10 Mi Pilatus, ni iute: Zin bibip kizin Yuda matan mburmbur pa Yesu, tanata tikami ma tiuri la namaana. Tana iwi zin ma iso: “Parei, niom leleyom be aŋzem king tiom Yuda ma ima?”

11 Tamen zin bibip kizin patoronŋana kan tikuru zin iwal lelen be tiyok la kalŋaana pepe mi tiwi i be izem Barabas ma iyooto.✡ Ŋgo 3:13+ 12 Tabe Pilatus iwi zin mini ma iso: “Mi parei pa tomtom ta niom kosombe ni king tiom Yuda. Ko aŋkam parei pini?” 13 To tiboobo mini mi kalŋan izalla ma tiso: “Puni sala ke pambaaraŋana!” 14 Tabe Pilatus iwi zin mini ma iso: “Mi ni ikam so mbulu i?” Mi zin kezen keke la pini ma tiso: “Puni sala ke pambaaraŋana!” 15 Pilatus leleene be ikam iwal biibi tina ma lelen ambai, tana izem Barabas ma iyooto. Mi Yesu na, iuri la zin malmal kan naman ma tibalisi, to tikami ma tila be tipuni sala ke pambaaraŋana.

16 Zin malmal kan tikam Yesu ma tilela gabana ki Rom ruumu kini leleene. Mi sua ikam zin malmal kan ta boozomen ma timar tilup zin, 17-18 to tikam mburu totoŋana kembei ta kizin king i, mi tigiibi se regeene. Mi tikam wooro matanmatanŋana, mi tital ma tiur sala uteene. To tiyotyooto pini ma tiso: “Aa, king kizin Yuda. Niam ampakuru!.” 19 Mi tiballis uteene pa teene, mi tipureskaali, mi tiŋgungun kumbun mbukuunu pini. 20 Tipeŋeu i makiŋ, to tikinke mburu totoŋana ma isu, mi tiur itunu mburu kini ila niini. To tikami ma tila be tipuni sala ke pambaaraŋana.

21-22 Tiwwa ma tila pa zaala, mi tindeeŋe tomtom ta, zaana Simon. Ni imbot pa su mi imar be ilela pa kar biibi. Ni tomtom ki kar Kairini. Mi lutuunu bizin ru, zan Alisande ma Rupus. Timar tindeeŋi, to tiyasasaari be ikwaara ke pambaaraŋana ki Yesu. Mi ziŋan tila ma tipet lele ta zaana Golgata (Golgata ka uunu ta kembei: Lele ki tomtom uteene putuunu).✡ Ro 16:13 23 Mi tisombe tikam Yesu ka yok baen ta titooro ramaki koroŋ ta tisombe mir * Mir na, koroŋ ta ipunmeete yoyouŋana. na. Tamen ni leleene be iwin som. 24-25 To tipuni sala ke pambaaraŋana. Indeeŋe tana, zoŋ mataana ikam kembei lamata mi paŋ. Mi tisombe tiparrai mburu kini ma irao zin. Tana tikam mbulu ta be tire so tomtom tabe ikam so mburu i.✡ Mbo 22:18 26 Mi uunu kini tabe imeete pa i, ina tibeede ta kembei: ‘Iŋgi king kizin Yuda.’ 27-28 Mi tipun tomtom kuumbuŋan ru tomen sala ke pambaaraŋana. Ta imbot la ki Yesu namaana woono, mi toro imbot la ki ŋas.✡ Yesa 53:12 29 Zin iwal ta tilala timarmar mi tire sala pini na, uten suksuk sala pini, mi tigibgiibi sua repiiliŋana pini ma tiso: “Ywee, kam kosa kusa tau. Nu sombe reege Urum Merere ma isu lene, to pamender mini pa aigule tel tau!✡ Mbo 22:7, 109:25; Yo 2:19 30 Mburom mi kamke itum ma su pa ke pambaaraŋana ku tina.” 31 Mi zin bibip kizin patoronŋana kan tomini, ziŋan zin ŋgarŋan ki tutu tipeŋeu i ma tiparzzo pizin ta kembei: “Ni imbot be iuluulu zin wal pakan. Mi parei ta irao be iuulu itunu som! 32 Ni isombe ni Mesia mi king kizin Israel. Ambai. Kozo tombot mi tere i ten. Sombe izem ke pambaaraŋana ma isu, nako tuurla kini!” Mi zin tomtom ru ta tipun zin raami na, zin tomini kwon pasomi.

33 Zoŋ mataana ikam kembei aigule palakuutu, to zoŋ mataana imeete mi zugut biibi izuk toono tana ma imap, mi imbot ma irao zoŋ mataana ikam tel. 34 To Yesu iboobo ma kalŋaana biibi. Iso: “Eloi, Eloi lama sabaktani!” Sua ti ka uunu ta kembei:

35 Tomtom pakan ta timbotmbot kolouŋana na, tileŋ sua kini tana, to tiso: “Aa keleŋ, ni iboobo Anutu kwoono Ilia.” 36 To tomtom ta iloondo ma ila ikam koroŋ ta izenzen yok na, ma itizik sula baen pakpakŋana, mi ipo la ke molo. To isara sala ki Yesu be isemsem. Mi iso ta kembei: “Tombot mi tere i ten. Ko Ilia imar mi ikinke i ma isu pa ke pambaaraŋana kini ma iŋgi.”✡ Mbo 69:21 37 Tona Yesu iyak ma kalŋaana biibi, mi iyataaŋa ma ka bolboolo ipol.

38 Indeeŋe tana, kawaala biibi ta imbot lela Urum Merere leleene na, rek sala ki kor mi tuŋ sula meleebe. 39 Beso biibi kizin malmal kan ta imendernder su Yesu kereene uunu na, ire Yesu iyataaŋa mi ka bolboolo ipol na, iso ta kembei: “Ŋonoono kat, tomtom ti ni Anutu lutuunu. Pa meeteŋana kini ipa ndel kat!”✡ Mk 1:24 40 Mi moori pakan ta timbotmbot molo ri mi matan lala pa Yesu. Zan ta kembei: Maria ta ki kar Magdala, Maria toro ta Yems ta naŋgaŋ i ma Yose nan na, mi Salume. 41 Indeeŋe ta Yesu imbotmbot Galilea mi ikamam uraata kini na, zin moori ti ta titoto i mi timbesmbeeze pini. Mi zin moori ta ziŋan Yesu tiwwa ma timar Yerusalem na, boozomen timbotmbot mi tire meeteŋana kini.

42-43 Aigule tana ina aigule tabe zin Yuda tiparaŋraŋ koroŋ kizin pa aigule potomŋana tabe keten su pa i. Tana timbotmbot ma rou, to Yosep ki Arimatea imar ipet. Tomtom tina, ni imbot la lupuuŋu biibi kizin peeze kan kizin Yuda, mi tomtom boozomen matan se kini. Mi ni tomini iurur mataana pa peeze ki Anutu be ipet mat.

Yosep tana imoto som mi ila ki Pilatus, mi iwi i be ikam Yesu ma ila itwi i. 44 Pilatus ileŋ kembei Yesu imeete karau men, to ikam ŋgar boozo. Tana iboobo biibi kizin malmal kan ma imar, mi iwi i pa Yesu: Ni imeete ma kup kat? 45 Biibi kizin malmal kan iso: “E.” Tabe Pilatus iyok pa Yosep be ikam Yesu ma ila. 46 Tana Yosep iŋgiimi kawaala kokouŋana ta, mi ikam ma ila. Mi ikam Yesu putuunu ma isu, to izuki pa kawaala tana, mi iuri lela naala lene ta tiurpe lela raŋ sumbuunu pataaŋa kek. To ipatimbil pat biibi ta ma ila isekaala naala kwoono. 47 Mi Maria ki Magdala ziru Maria ta Yose naana i timbotmbot mi tire la pa lele ta tiur Yesu ilela pa na.