1 O Anutu, kamke yo lak!

Pa yok ise ŋgureŋ kek ma iŋgi be ilol yo i.

2 Nio aŋdubup sula tiiŋgi biibi

ma kumbuŋ iteege toono mbolŋana sa som.

Nio aŋbot li biibi lukutuunu,

mi iŋgi be wo isur yo ma aŋla leŋ i.

3 Anutu, nio aŋsaana kek.

Tiŋiizi tio imama ku ma iŋgi be ŋgureŋ imun i.

Nio aŋurur motoŋ pu be uulu yo, mi som.

Tana mburoŋ imap.

4 Zin iwal, ta tiurur koi pio sorok.

Irao aŋnin zin na som. Pa tilip pa uteŋ runrun!

Koŋ koi bizin ta tisombe tipasaana yo na, zin mburanŋan,

mi tiŋgalŋgal sua pakaamŋana pio.

Tizzo be aŋpimiili koroŋ kizin.

Mi ko aŋpimiili be parei? Pa aŋkem koroŋ kizin sa som. ✡Yo 15:25

5 Anutu, mbulu tio kankaanaŋana mi zooroŋana tio, ina nu ute ma imap.

Mbulu boozomen ta aŋkam ŋoobo na, sa ike pa motom som.

6 Yooba, nu mburom keskeezeŋom.

Uulu yo lak!

Kokena zin wal ta tiurur matan pu mi tipase pu na, tire pataŋana tio mi kan miaŋ pa, to titop pa urlaŋana kizin.

O Anutu tiam Israel, nio aŋkam ŋgar biibi pa zin wal tau tikam kinkiini be tiute u mi timbot kolouŋana pu na.

Uulu yo: Kokena mbulu ta ipet pio na, ikam zin ma kan miaŋ.

7 Pa nio aŋbesmbeeze pu. Tamen tomtom tirepilpiili yo,

mi tikamam ma koŋ miaŋ mi aŋtuntuundu men.

8 Wal tio tire yo kembei nio ndelŋoŋ.

Mi toŋmatiziŋ tio ŋonoono ta noyam tamen na, tipizil ndemen pio kembei nio tomtom ki lele pakaana toro. ✡Mbo 31:11; Yo 7:5

9 Nio leleŋ pa urum ku ilip, mi aŋkamam kaisiigi pa be aŋurpe.

Tanata wal pakan ta tirepilpiilu na, tirepiili yo tomini. ✡Yo 2:17; Ro 15:3

10 Nio aŋtaŋtaŋ mi aŋgalsek ituŋ pa kini kanŋana bekena motoŋ iŋgal katu.

Mi ina ikam ma tomtom matan repiili yo.

11 Mi indeeŋe ta leleŋ ipata mi aŋgun muuŋgu na,

tomtom tikam seŋge pio.

12 Zin wal ta tiluplup zin su kar keteene na, tiwidit mbol pio.

Mi aŋwe ŋeu pizin wal winŋana kan be timbut len mboe pa.

13 Mi nio na, aŋzuŋzuŋ pu men.

Yooba, muŋai yo lak! Pa nu urur kat lelem pa wal ku mi toto sua ku mbukŋana.

Tana leŋ suŋŋana tio ti, mi swe kampeŋana ku pio. ✡2Kor 6:2

14 Tatke yo pa pataŋana biibi ti:

Kokena aŋdubup sula tiiŋgi mi sam ma aŋla leŋ!

Kamke yo pa koŋ koi bizin naman.

Tatke yo pa li biibi tiŋgi: Kokena aŋmon.

15 Uulu yo: Kokena wo isur yo ma aŋla leŋ.

Kamke yo: Kokena aŋmon sula mozo lukutuunu.

Maata yo ma aŋse pa naala ta usomŋana i:

Kokena toono ipol salakaala yo.

16 Yooba, nu ambaiŋom. Nu toto sua ku mbukŋana mi urur lelem pa wal ku. Tana leŋ suŋŋana tio mi uulu yo.

Muŋaiŋana ku na, biibi kat. Tana motom iŋgal yo mini.

17 Nio mbesooŋo ku. Piŋgis motom pio pepe.

Pa iŋgi aŋbot la pataŋana biibi kat leleene. Tana pekel kalŋoŋ karau men.

18 Mar lae tio, mi uulu yo.

Kamke yo pa koŋ koi bizin.

19 Mbulu ta koŋ koi bizin tikamam pio, ina nu ute lup kek.

Zin tirepilpiili yo, mi tipamiaŋ yo, mi tikototo yo.

20 Mi tipamiaŋ yo, mi tipasaana leleŋ ma isaana kat.

Tana aŋso ko tomtom sa imar mi ipotor leleŋ.

Mi som. Tomtom sa imar tio som.

21 Indeeŋe ta petel yo na, titooro koŋ kini raama koroŋ pakpakŋana.

Mi miri yo na, tikam koŋ yok pakpakŋana ma aŋwin. ✡Mt 27:34,48; Yo 19:29

22 Tana suŋŋana tio ima ku ta kembei: Mbalia ta kini kizin imbotmbot se na, ko iwe kembei ta napitpit pizin.

Mi guraaba kizin ko tiwe kembei ta kilis pizin. ✡Ro 11:9+

23 Kam zin ma matan ipis ma irao tire lele mini som.

Mi pamoto zin kat ma riŋriŋ ikam zin.

24 Mbooro ta ketem malmalŋana imbot sula na,

liŋ ma isalakaala zin be tiyamaana kat.

25 Kam ma lele kizin ta timbotmbot pa na, bilim.

Tomtom sa ko ilela beeze kizin mini som. ✡Ŋgo 1:20

26 Pa tomtom ta nu balisi kek na, zin tisu mi tiseeze mataana mini.

Tomtom ta nu puni ma ire yoyouŋana na, zin tininin kao pini.

27 Wal tana sanaana kizin na, motom mbeleele pepe.

Motom kiskis, mi pokot ma pokot kat! Muŋai zin risa pepe.

28 Mus zan pa ro ki mbotŋana mata yaryaaraŋana ma tila len.

Sombe beede wal ndeeŋeŋan zan ise, na wal tana zan ila raama pepe. ✡Kam 32:32+; Tur 20:12+, 21:27

29 O Anutu, iŋgi aŋbaada pataŋana mi aŋre yoyouŋana biibi.

Mar mi uulu yo. Wit yo mi ur yo sala kor. Naso aŋbot ambai.

30 Nio ko aŋbo mboe mi aŋpakur Anutu zaana. Pa nio leleŋ ambai kat pini.

Tana ko aŋwit uruunu ma isala kor! ✡Mbo 28:7, 34:3

31 Pa mbulu ta kembei, Yooba ko leleene ambai pa ma ilip pa makau ta tikamam pa patoronŋana i. ✡Mbo 50:9+, 51:16

32 Zin wal ta pataŋana ikam zin na, sombe tire Anutu iuulu yo, inako menmeen zin.

Mi zin wal tau tikamam kinkiini be tiute kat Anutu mi timbot kolouŋana pini, nako tikam pombolŋana. ✡Mbo 34:2

33 Pa zin wal ta timbot ŋoobo mi tiru zalan na, Yooba ileŋleŋ suŋŋana kizin.

Zin wal kini ta timbotmbot la pataŋana leleene na, ni irao ipizil ndemeene pizin na som.

34 Saamba ma toono mi tai, ramaki koroŋ boozomen ta tiwwa pa na, niom kamap ma kapakur Anutu zaana.

35 Pa ni ko ikamke kar Sion ma imbot ambai mini, mi ipamender zin kar ta timbot lele pakaana ki Yudea na.

Tonabe zin mbesooŋo kini tikam lele tana ma iwe len, mi timbot pa mini.

36 Mi kaimer, toono tana ko iwe popoŋana kizin len, be zin tomini timbot pa.

Tana zin wal ta so tiur kat lelen pini, nako timbotmbot ta tana.