1 Iti ta sombe urlaŋana kiti imbol na, takam ŋgar pa itundu men pepe. Takam ŋgar pizin wal ta urlaŋana kizin imbol zen na, mi takam mbulu ta irao pa lelen mi ŋgar kizin.✡Ro 14:1; Ga 6:1+; 1Tes 5:14 2 Tana itundu tataŋa irao tu'uulu zin toŋmatiziŋ kiti ta ki Krisi i, mi takam mbulu ta irao pa lelen mi ŋgar kizin. Naso topombol zin pa urlaŋana kizin.✡1Kor 10:24; Pil 2:4+ 3 Kakam ŋgar pa Krisi. Ni ikam ŋgar pa itunu men som. Pa sua ki Merere iso ta kembei:

4 Sua boozomen ki Merere ta tibeede se ro na, ina imbot be ipaute iti, mi ipotor lelende, mi ipombol ti be temender mbolŋana mi tabaada pataŋana. Naso lelende iwe ru som, mi tombotmbot mi tazza koroŋ ambaiŋana tabe ni ikam piti pa kaimer i.✡Ro 4:23+; 1Kor 10:11; 2Tim 3:16+

5 Anutu ta ipombolmbol ti be temender mbolŋana mi tabaada pataŋana na, ni itunu ko ikam yom ma kaparlup leleyom mi ŋgar tiom ma iwe tamen, mi kototo Yesu Krisi.✡Ro 12:16; 1Kor 1:10; Pil 2:2 6 Naso kulup leleyom, kulup kwoyom, mi kapakur Anutu tau Merere kiti Yesu Krisi Tamaana na.✡Mbo 34:3; Ŋgo 4:24

7 Tana nio aŋso piom ta kembei: Niom ta boozomen na toŋmatiziŋ ki Krisi. Tana leleyom ambai par piom mi kaparkam yom, kembei ta Krisi leleene ambai piom mi ikam yom na. Naso kakam ma Anutu zaana iwe biibi.✡Ro 14:1+ 8 Pa Krisi, ni iwe mbesooŋo pizin Yuda bekena ikam ma sua ta muŋgu Anutu imbuk pa tumbun bizin na, iur ŋonoono.✡Mt 15:24+; Ŋgo 3:25+; 2Kor 1:20 9 Naso tomtom tikilaala kembei Anutu itoto sua kini, mi zin wal ta Yuda somŋan i tiwit Anutu uruunu pa muŋaiŋana kini tomini. Mi ina ito sua ta tibeede muŋgu kek. Sua ta kembei:

13 Anutu ta tu'urur matanda pini i, ko ikam yom ta kuurla na ma leleyom ambai, mi kombot ambai kat. Mi Bubuŋana Potomŋana mburaana ko ipombol yom be kombot, mi kazza koroŋ ambaiŋana kat tabe Anutu ikam piti i. Ŋonoono.✡Ro 14:17; 1Kor 4:20

14 O niom toŋmatiziŋ tio, nio aŋute: Niom karao kat pa mbulu ambaiŋana, mi ŋgar matakiŋa ta boozomen. Mi niom ituyom karao be kaparpaute yom pa sua ki Merere.✡2Pe 1:12; 1Yo 2:21 15-16 Sua pakan ta aŋbeede se ro ti, ina mbolŋana. Tamen leleyom isaana pa pepe. Pa iŋgi aŋso bekena aŋpei ŋgar tiom pa mini. Pa Anutu ikampe yo, mi iur yo ma aŋwe mbesooŋo ki Yesu Krisi be aŋsoyaara uruunu ambaiŋana ki Anutu pizin wal ta Yuda somŋan i. Mi leleŋ be aŋkam zin ma tiwe Anutu lene, mibe Bubuŋana Potomŋana ikam uraata pizin ma tiwe potomŋan. Naso tiwe kembei patoronŋana ta Anutu leleene pa ilip.✡Ŋgo 9:15; Ro 11:13; Ga 2:7+

17 Nio leleŋ ambai mi aŋpakur Yesu Krisi. Pa ni ipombolmbol yo pa uraata ta aŋkamam pa Anutu na.✡Kol 1:29 18 Nio leleŋ be aŋso pa wal pakan uraata kizin na som. Leleŋ be aŋso men pa ituŋ uraata tio ta aŋkamam bekena aŋyaaru zin wal ta Yuda somŋan i ma tila ki Anutu mi tito mbulu kini. Mi ituŋ tamen na, aŋrao aŋkam kosa sa som. Krisi ta ipombolmbol sua tio mi uraata tio.✡Ŋgo 15:12; 2Kor 3:5, 10:15; 1Tes 1:5 19 Mi Bubuŋana mburaana ta izze tio. Tanata ikam ma aŋtortooro mos ma uraata bibip. Tana indeeŋe ta kar Yerusalem, mi imar imar ma ipet lele pakaana ki Ilirikum na, aŋwwa mi aŋzzo uruunu ambaiŋana ki Krisi pizin ma tileŋ lup kek.✡Ŋgo 19:11; 1Kor 2:4; 2Kor 12:12 20 Pa nio ti, leleŋ ilip be aŋkam uruunu ambaiŋana isu lele pakan tau tiute Krisi zen na. Pa nio zoŋ pa uraata ta kembei. Naso kembei ituŋ aŋpo kat ruumu ma imap. Pa leleŋ be aŋpo ruumu sala kitiimbi ta tomtom toro ipaaza na som.✡2Kor 10:15+ 21 Tana iŋgi aŋtoto zaala ta kembei. Mi ka sua imbot se bude pataaŋa kek:

22 Nio, gorgori aŋkamam ŋgar be aŋma Rom ma aŋre yom. Mi tamen som. Pa aŋkamam ŋgar biibi pizin wal tau tileŋ sua zen na.✡Ro 1:13 23-24 Tamen buri na, aŋre kembei zin lele boozomen ta muŋgu aŋkamam uraata pizin na, leŋ uraata sa pizin mini som. Mi iŋgi aŋso aŋla pa lele pakaana ki Spen. Tana ko aŋma ma aŋre yom, mi itiŋan tombot risa mi tozzo lende sua muŋgu, tona ku'uulu yo pa pai tio, mi aŋmaŋga mini mi aŋla pa Spen. Pa ndaama ndaama ta leleŋ aŋso aŋma ma aŋre yom.✡1Kor 16:6

25 Tamen iŋgi ko aŋla pa Yerusalem muŋgu, mi aŋuulu Anutu wal kini ta timbot su tana.✡Ŋgo 19:21, 20:22, 24:17 26 Pa zin wal ki Masedonia mi Akaia na, zitun lelen mi tilup pat pakan, mi tiur mar nomoŋ kek, be aŋkam ma aŋla, mi aŋur la ki Anutu wal kini ta timbot ŋoobo su Yerusalem a.✡1Kor 16:1+; 2Kor 8:1, 9:2,12; Ga 2:9 27 Mbulu kizin tina, zitun lelen mi tikam. Mi ina indeeŋe men. Paso zin Yuda ta tiwe zaala pizin wal ta Yuda somŋan i ma tikam koroŋ ambaimbaiŋan ta ki kunundu i. Tana zin wal ta Yuda somŋan i, na kembei len mbun biibi imbot kizin Yuda. Mi sombe tipimiili koroŋ ambaimbaiŋan ta ki toono i ma ila be iuulu zin, ina ambai.✡1Kor 9:11; Ga 6:6 28 Tana nio aŋso aŋboro kat pat ti ma irao aŋur se zin Yerusalem kan naman muŋgu, tona aŋma ma aŋre yom, mi aŋla pa Spen.✡2Kor 8:20+ 29 Mi nio aŋute: Sombe aŋma, nako itiŋan taparpombol ti, mi kampeŋana ki Krisi ko ise kiti ma biibi.✡Ro 1:11

30-31 O niom toŋmatiziŋ tio, itiŋan tuurla ki Merere kiti Yesu Krisi, mi Bubuŋana ikam ti ma lelende par piti kek. Tana nio aŋtaŋroro yom pa Merere kiti Yesu Krisi zaana. Kuzuŋzuŋ mbolŋana pa Anutu be iporoukaala yo pizin Yudea kan ta tiurla ki Krisi som na, mibe aŋkam kat uraata tio ma ambai men pa Anutu wal kini ta timbot Yerusalem a matan. Naso kagaaba yo ma kembei itiŋan toporou pa uraata ki Yesu Krisi.✡2Kor 1:11; Kol 4:3 32 Mi kaimer, sombe Anutu leleene, inako aŋma mi aŋre yom raama leleŋ ndabok. Tona keteŋ su, mi itiŋan tombotmbot mi taparpombolmbol ti.

33 Anutu ta ikam ti ma tombot ambai, na ni itunu ko imbot raama yom ta boozomen. Ŋonoono.