3
Tapase pa Yooba men
1 Lutuŋ, sua ta nio aŋkam pu na, motom mbelele pepe.
Motom iŋgalŋgal tutu tio ta boozomen mi kiskis la lelem.
2 Pa ina ko ikamu ma mbot ambai,
mi iseeŋge mbotŋana ku ma molo.
3 Mbulu ki tu'urur lelende pa Anutu mi zin tomtom mi tototo sua kiti mbukŋana na, zem pepe.
Mbulu ru tana, kiskis la lelem mi zzwe totomen. Pa ina ko iwe kembei aigau ta imbot la ketem na.✡Tut 6:21, 7:3
4 Tana kiskis mbulu ru tana. Naso ndeeŋe kampeŋana biibi,
mi Anutu ziŋan zin tomtom tire u kembei nu lem ŋgar ambaiŋana.
5 Re: Kokena pase pa itum ŋgar ku.
Ur lelem imap ila ki Yooba, mi pase pini men.
6 Mi so zaala i ta lelem iur pa be to, na kam ŋgar pa Yooba muŋgu, mana kam.
Naso ni ikam peeze piwi mi iso u pa ka zaala.
7 Re itum kembei nu rao kat pa ŋgar pepe.
Moto Yooba, leŋleŋ la kalŋaana, mi pizil ndemem pa mbulu sananŋan ta boozomen.✡Tut 28:26; Ro 12:16
8 Pa mbulu ta kembei ko iuulu kulim ma imbot ambai,
mi ikam ma kulim iŋgeeze mi nim se pa uraata.
9 Yooba, ni ikam lem koroŋ boozo kek. Tana pimilmiili koroŋ pakan ma ilala kini bekena pakuri pa.
Koroŋ ku paazaŋan ta boozomen na, motom iŋgal be pazas mataana kana ma ilala kini.✡Kam 23:19
10 Naso Anutu ikam ma mokleene ku ipiyooto kini boozo, mi diditu ku bokbok men.
Mi baen ku ko ipiyotyooto ŋonon ta sorok som, mi baen piiziŋana muriini bokbok kat pa yok baen popoŋana.
11 Lutuŋ, sombe Yooba ikam mbulu sa pu bekena ipazalu pa, na parsiki pepe.
Mi sombe iyaambu, na lelem iŋgis pa pepe.✡Ibr 12:5-7,10; Tur 3:19
12 Pa zin wal ta Yooba leleene pizin na, ni ipazalzal zin,
kembei ta takamam pa lutundu bizin tau lelende pizin ilip na.✡Tut 13:24
Ŋgar ambaiŋana iuluulu iti pa zaala matakiŋa
13 Tomtom ta so iru ŋgar ambaiŋana ma indeeŋe, mi ikilaala ŋgar iŋgoi ta ambai ma ilip,
nako leleene ambai kat, mi kampeŋana ki Anutu imbotmbot se kini.
14 Pa ŋgar ambaiŋana ipiyotyooto ŋonoono ambaimbaiŋan boozomen piti.
Ilip pa silba ma gol.✡Mbo 19:10, 119:72,127; Tut 8:10+
15 Mi ilip pa pat milmilŋan pakan ta ndabokbokŋan kat.
Tana koroŋ boozomen ta nu lelem pa i na, sa irao kembei ŋgar ambaiŋana na som.✡Mt 13:45
16 Ŋgar ambaiŋana namaana ru iteege koroŋ boozomen be ikam piti.
Namaana woono irao iseeŋge swondo ma molo.
Mi namaana ŋas na, irao ikam lende koroŋ boozo, mi ikam ma zanda iwe biibi.✡Tut 4:10, 8:18, 9:11, 10:27, 22:4
17 Zin wal ta so titoto zaala ki ŋgar ambaiŋana, nako tiyamaana ambai.
Pa mboti kizin ko ndabok kat.
18 Ŋgar ambaiŋana, ina iwe kembei ke ki mbotŋana mata yaryaaraŋana.
Pa zin wal ta so tikami ma iwe len mi tikiskisi, nako timbot ambai, mi kampeŋana ki Anutu imbotmbot se kizin.✡Un 2:9; Tut 11:30; Tur 2:7
19 Muŋgu kat Yooba ito ŋgar kini ambaiŋana, mi iur toono uunu ma imbol.
Mi ikam kat ŋgar, mana iur saamba.✡Mbo 136:5
20 Muŋgu kat yok ta imbot meleebe na, ise raama mburaana biibi. Ito ni ŋgar kini.
Mi ŋgar kini, ta izzo i pa mbulu tabe ikam ma yaŋ izzu pa gubur tiene, mi tolou iwedet.
21 Lutuŋ, motom iŋgal be kiskis ŋgar ambaiŋana.
Ŋgar ta iurur ŋonoono na, zem pepe.
22 Pa ina ko ikamu ma mbot ambai,
mi ipeŋgeeze mbulu ku, kembei aigau ta imbot la ketem na.
23 To pa pai ku ma ambai men.
Pa kosasa ko ipasaanu som, mi irao tutkat kumbum na som.✡Mbo 37:24; Tut 4:12
24 Mi sombe su murim be keene, nako moto som.
Ko keene kat lem.✡Mbo 4:8, 91:5+; Tut 6:22
25 Tana pataŋana biibi tabe ipamurur zin wal sananŋan mi ipasaana zin i, nu ko irao moto na som.✡Mbo 112:7+
26 Pa Yooba ko imbotmbot zilŋom uunu mi imborro u.
Tana kilis sa ko irao ikeene kumbum na som.
Sua tutŋana pakan
27-28 Sombe pataŋana indeeŋe tomtom sa mi nu lem uraata be uuli, na titi pepe. Sombe rao be uuli, na kam pataaŋa.
So pini be ila ma gaaga to imiili mini pepe. Sombe lem koroŋ imbot, na kam pini pataaŋa.✡Ŋgo 9:36; Ga 6:10; 1Yo 3:17-18
29 Tomtom ta so ruumu kini igarau u, na kam ŋgar be pasaani pepe.
Pa ina ni indemeere kembei nu ko kam mbulu ambaiŋana men pini.
30 Mi tomtom ta so ikam ŋoobo mbulu som,
na maŋga mi kam sorok sua pini pepe.
31 Zin wal ta tikamam zaaba pizin tomtom na, motom berber pa mburu kizin pepe,
mi to zin pa zaala kizin pepe.✡Mbo 1:1, 37:1,7; Tut 4:14-15
32 Pa zin wal ta tikamam ŋoobo mbulu na, Yooba leleene pizin ri sa som kat.
Tamen zin wal ta mbulu kizin iŋgeeze men na, Yooba igabgaaba zin mi izzwe leleene mi ŋgar kini pizin.✡Mbo 101:4, 25:14
33 Wal sananŋan ziŋan wal kizin na, Yooba kete malmalŋana kini imbotmbot se kizin.
Mi wal ndeeŋeŋan ziŋan wal kizin na, kampeŋana kini imbotmbot se kizin.
34 Zin wal ta tipakurkur zitun mi matan pasom ŋgar ambaiŋana na, Yooba irepilpiili zin.
Mi zin wal ta tikototo zitun na, ni leleene pizin mi ikampewe zin.✡1Pe 5:5+; Yems 4:10
35 Zin wal ta len ŋgar ambaiŋana, nako zan iwe biibi.
Mi wal kankaanaŋan ta tizorzooro, nako kan miaŋ biibi.