Faulo ena leta vemagilafuna me Tesalonaika ʼidia
Leta ana alamani weaqina
Faulo be Sailasa ta wese taidi Timoti maega itauya me Tesalonaika ʼidia ta Ieisu Valena ineidi, ʼinega ivetumaqanea. Ta ʼabiboda Faulo me Tesalonaika valedi noqolia nuadi nawale ge daʼeqaʼui Ieisu ena ʼevivi mai bwaʼobwaʼoya weaqina, mana vaina tomotau iveʼita veifedi. ʼInega Faulo taha leta maduvetunei ʼidia, ta ʼabibodanaya wese edi leta baʼe vemagilafuna ʼabaga Kolinita ʼinega ʼwayavia be yaqisa ina alamani aqiaqiea tolaʼai naʼifoqe tuta ʼebeluʼovoa ʼinaya. Ta wese baʼe leta nana vetunea ʼidia edi vetumaqana ana givewaiwai weaqina.
Leta gamona
1:1-2 Vematamagilafu be venoqi
1:3-12 Awatubo be ʼawahaqiaqi
2:1-17 Veʼita Keliso ena ʼevivi mai weaqina
3:1-15 Vona waiwaina tovetumaqana edi ilivu weaqina
3:16-18 Vona veyoluba be lukafoi
1
1 Yaʼa Faulo taidavo Sailasa be Timoti maega atoatoa, ta emi leta baʼe aʼwayavia omiʼa toʼekalesia otoatoa ʼabaga qiduana Tesalonaika ʼinaya weaqimi. Omiʼa Yaubada Tamada be eda Kaiwabu Ieisu Keliso edi tomotauyavo.
2 *Lom 1:7 Nuanuagu ona toadaumwala Yaubada Tamada be eda Kaiwabu Ieisu Keliso edi veyoluba ʼinega.
Keliso nawale namai be tomotau naluvinedi
3 Emavo, tuta qabuna alulukaiwa Yaubada ʼinaya weaqimi. Ama luaqiaqi be ʼidewani ana viaqia, mana emi vetumaqana tuta qabuna veveʼenaʼi, ta wese emi veyoluba nuanimia veveʼenaʼi. 4 *2Kol 7:4; 1Te 2:19 Ta tuta nana atautauya diʼwe taha taha Yaubada ena tovetumaqanayavo ʼidia, ʼinega matadia ami wawa agigivaneyea ta avonevonedia, “Edavo me Tesalonaika taudi bibitaqo ʼavadi ta wese tovetumaqana aqiaqi. Adi aviayavo ʼidiega veilaqe be visiqa ilobelobedi, ta edi vetumaqana ge dadawalili, ta ʼesi nawale waiwaina.”
5 Vonahaqiaqi, omiʼa vevoalana qiduana niʼa olobea, ta Yaubada ena luvine ʼinega taudi voalamiavo naluvematasabudi. Ta baʼe luvematasabu nana ʼinega naveʼiteda tauna tuta qabuna luvine aqiaqina be tunutunuqina ʼinega luviluvine. Mana Yaubada ena viaqayavo tunutunuqidi tomotau qabuda ʼidaya. Ta vita diavona baʼitagana olobelobedi ʼidiega Yaubada ʼivaʼavaʼata vatayemi, ʼinega luaqiaqiemi be nawale me emi qaiawa ona toa ena luvine ʼayanaya. 6 *Lom 12:19 Tomeqabu baʼitaga vita ineineimi nawale Yaubada ʼinega taudi wese vita ina lobea. Tomotau edi ilivu luveifana adi veʼia tunutunuqina Yaubada naneidi, mana tauna ana ʼaidega Toluvine Aqiaqi. 7 *1Te 3:13 Ta tuta nana eda Kaiwabu Ieisu ena tovaleʼewayavo waiwaidi maega ina webui mai mahalega, e ʼinega Yaubada veyawai omiʼa be imaʼa naneida. 8 *Ais 66:15 ʼAiwe saesaelina maega ina mai, be tomotau Yaubada ivemwageyea naluvematasabudi. Ta wese taudi Vale Aqiaqina eda Kaiwabu Ieisu weaqina ge ida matayagea naluvematasabudi. 9 *Ais 2:10 Ta adi luvematasabu baʼe ʼidewana: Tuta qabuna ina toasiʼi Keliso ʼinega ta veilaqe vataya ina lobea, ʼinega ge wese ena simatala kaikaiwabuna ina ʼitei. 10 *Kol 3:4 Ta mai nana ʼinaya awatubo qiduana nalobea ena tomotauyavo gwalagwaladi ʼidiega, ta wese tovetumaqana ina nuavoqana tauna weaqina. Ta omiʼa me Tesalonaika wese taudi maega Ieisu ona awatuboya, mana lova Vale nana asimana ʼifoqeyea ʼimia ta ovetumaqanea.
11 *Kol 1:9; 1Te 1:2-3 Baʼe yani diavona nawale ina ʼifoqe, ʼinega imaʼa tuta qabuna weaqimi avevenoqi eda Yaubada ʼinaya. Mana lova nuaveʼavinimi be gabemi toa aqiaqina ana ʼeda ʼinaya. ʼInega avevenoqi ʼinaya naiulemi be yaqisa ʼeda nana ona ʼabibodea. Ta wese avevenoqi ʼinaya ena waiwaiega yani qabuna aqiaqidi nuanuami ona viaqidi emi vetumaqana ʼinega, e ami fata ona viaqa ʼovoidi. 12 Baʼe ʼidewani avevenoqi weaqimi be yaqisa eda Kaiwabu Ieisu ana wawa ana awatubo naveqidua omiʼa emi viaqayavo ʼidiega, ʼinega omiʼa wese awatubo ona lobea Keliso maega. Baʼe awatubo diavona ina ʼifoqe Yaubada be eda Kaiwabu Ieisu Keliso edi veyoluba ʼinega.