Yipurampa jirlpirringuka nyinama, Mama ngarnawarrapurlukalu wululu palu kanyilpayi. Manikurlu majukurlu nyinapayi, warta yarnngakurlu, puri yarnngakurlu nyinapayi Mamalura yungkupayi.

Yipuramjungku walyjalu kulirnu, “Ngayurna miturrikija nyinin. Mirrakurnara warrkamupurluka majuku.” Warrkamupurluka maju yanulu. Yipuramjalu ngarapayi. Wajarnura jilanya, “Ngulampa yarra marra tuju!, Yajikku. Mirta ngaamartaji Kayinanmartaji marra!, jurra! Yankun manku kakarramalu, tuju ngayumilingka ngurrangka. Mama ngarnawarrapurlukangka kurungka jungalurni wajala!, tuju kakarramalun mankuraku. Mararni jurra juntangka!, jungan wajalkijalu.” Murrarnilu-ngkuya juntangka junkupayi, junga wajalkuraku. Wangka palunya kulirnu, warrkamupurlukalu japirnu,

“Mayitpirna yanku kakarra purtu japilkurna-jananya tujuku. Wanyjalmankurna? Mayitpirna maa katiku Yajikpa, mayitpirna junku yanku?” Yipuramjura marrkunu, “Mirtan katiku kakarra Yajikpa. Mama ngarnawarrapurlukalurni ngurra ngaakutu wiyarnu. Jiilurni wajarnu ngurra ngaa yungkukijalu, ngayumili marlajanukajaku. Mirtan Yajikpa kangkuraku, kakarra. Marrkula Yajikpa jurra yarra!, ngurrangka walyjangka.” Wituka Yipuramjura wajarnu warrkamupurlukaku, “Mama ngarnawarrapurlukalunta wajalku wiyalku palumili wikarru. Jiilunta nintijunku palyan yankuraku kakarrara.” Yipuramju yarrarnu wajarnu warrkamupurlukangka majungka, “Nyunturan yanku palya mankuraku tuju. Yiipi tujulu paki wajalku, jurraka marlaku yarrarni ngurrakarti!” Jilanya Yipurammili warrkamupurlukalu kulinu kara wajarnu Yipuramku, nyupa kakarramalura mankuraku, Yajikku.

Warrkamupurlukalu-jananya jiilu manu murtitikirlpa tiin wulikajakamu, warrkamupurluka yarnnga. Ngurraya junu yanu kakarrakijalu, parna Mijuputamiyakarti, Niyuku ngurrakarti Jiingara Yipuramku ngurra walyja. Yanuya yanuya yanuya nyangu Niyuku tawunpa. Kaya katingu yitingka junuya-jananya murtitikirlkaja wiilja.

Ka nyangu-jananyaya tuju yarnngakuyarra. Kara japirnu warrkamupurlukalu majulu, Mama ngarnawarrapurlukalu nintijunkurakulu, Yajikmili tuju, jumajiya tujuparaku yarnngakuyarra yanurni kalyu mankukijalu. Jilanya japirnu, “Mama nintijularni!, tujurnara mankuraku, Yajikku. Wangka palunyarni wajanu Yipuramju, jilanyarnara tuju mankuraku. Tujuparakurna-jananya kuwarri kujunkujunpa japilku kalyuku, jilanya, ‘Pakiti tirrijula!, karni yuwa kalyu!, jikilkurarna marrkulu.’ Yiipi tujulurni wajalku, ‘Yuu, yintilkurnangku, karna-janampa murtitikirlkajakulurrju yintilku.’ Palujanurna jilanyalunga kulilku karna kuranarriku jilanya, ‘Yilta Yajikku nyupa ngaa wangkinpa.’ ”

Mamangkalu jiinya wangkangu wiyarringu, ka nyangu tuju warinykatingu, jarlijarra. Tuju jiinyanga yini Ripika, puntu Pijulaku yurntalpa nyinapayi, Niyuku nyami. Yirna Niyu Yipuramku marlangu nyinapayi. Ripika tuju palya nyinapayi juri, yirnakura ngurrpa. Jiilu Ripikalu yanu kalyu wiilja manu, ka kalyukurlu jarlijarra marlaku yankukijalu, ka jampa Yipurammili warrkamupurluka kinti warinykatingu. Japirnura, “Kalyurni yuwa marrkurna!” Palunyangka Ripikalura yitijunulu. Kara japirnu, “Murtitikirlkulurrjurna-janampa yintilku.” Jayilpayi-janampa ka yintilpayi yintilpayi kayilapaya jarrulyurringu.

Palunyangkayilapara Yipurammili warrkamupurlukalu ngangkunu jilanya, “Yilta ngaanyara Yajikku tuju, Mamalurni nintijunu.” Kayilara manu yungu riingu mulyapinti, kuulujanu. Mirna kujarrangkayilapalu jarrpajunu riingu maju kujarra, kuulujanu. Palunyangkayilapara japirnu, “Nganangku mama?” Jii tujulura wajanu, “Mamaju Pijulpa nyinin, Niyuku kaja, wanti Milkikurnu.” Kara Yipurammili warrkamupurlukalu japinu, “Kajilaju-nyurranya ngarriku marlpangka?” Ka tujulura wajanu, “Yuu palya, yarrarniya! Maya maju-lampaju ngarin. Jiingkaya ngurrangka yukuri ngalkunmalpa, murtitikirljunga.” Yipurammili warrkamupurluka pupatingu Mamangkalu wangkangu jilanya, “Mama! Nyuntu-lampajukun maaja nyininpa marninypunginparnanta. Palyalurnin katingu nintirnu Yajikmili nyupa.”

Ripika marlaku pinirringu ngurrakarti, palungkapula nyinapayi, palunyakurnu yakurtikamu kurta. Pukurljuyila-pulampa wajarnu, “Ngaarni yungu Yipurammililu warrkamupurlukalu.” Kulirnu-jananya Liipanju kayila-janampa yanu wiilkutu, mankura-jananya katikija ngurrakarti. Yanuyila-jananya winirnu jurntarnu. Yanuya tiputingu ngurrangka. Palunyangka-jananyaya murtitikirlpa jarrpajunu, mirrkakijalu.

Palunyajanuraya mirrkaku jarrpangu nyinatingu, ngalkukija. Wangkanguyila-janampa Yipurammili warrkamupurluka, “Ngaamparna yanurni wangkakurlu. Tiwajanulaju yankupayirni japilkijalurnanta, Ripika yungkurakurapulan. Katirakurnara yungku, Yipurammili kajaku nyupa nyinaraku. Wanyjalpa nyuntu kujarralupulan kulini?, yungkurakupulan.”

Palunyangkapula wajarnu, “Yuu, Mamalunta ngarnawarrapurlukalu katingurni nintijunu, japirakan katikijalu Ripika. Palyalun manku katiku Mama ngarnawarrapurlukakurnungka wangkangka.” Palunyangka jii wangka kulirnu pupatingu pukurlkurluyilapalu wangkangu Mamangka ngarnawarrapurlukangka. Pakarnuyilapa yanu manu, kayila-jananya kujunkujun yungu purli kuuluwanpakamu jilpawanpa, yarnngakuyarra.

Ngurra kakarra Yipuramku warrkamupurluka yanu ka Ripika mankula katingu yapurra parna Kayinankarti. Jirntu jarrpanyjangka rukarukaya warinykatingu, Yajikkurnungka ngurrangka. Yajikju-jananya nyangu murtitikirl laltu, ka pakara yanu ngatangata ngarangu. Palunyangkalu Yipurammililu warrkamupurlukalu wajarnu, “Nyuparnangku manu kakarra tiwa, ngurra kujupajanu kangkupayi.” Palunyangka pukurlarringu ka manu Ripika katingu kalikikarti. Nyinapayipula wulu pukurlpa.