Yipurampa wulu nyinangu wan yantartan japanti payip yiiya, nyukurnijanu, palunyangka miturringu. Palukurnu kujarralu kaja kujarralu mankulapula katingu pirnkikarti junu. Julyju junu Yipuramju palumili nyupa yini Jaara pirnki palunyangka, yini Makapilangka.

Julyju Yajikpa rawa nyinapayi puutiyi yiiya nyupaparni. Palujanuyila manu Ripika, nyupakurlurringu. Rawapula nyinapayi jijiparni. Palunyajanulu Yajikjura japirnu Mama ngarnawarrapurluka, “Jijiparniliju nyinin, kajirnin jiji yungku?” Mamalu ngarnawarrapurlukalu kulirnu, palujanu yungura Ripikaku. Mamalura wajarnu Ripikaku, “Kuwarrin kaja kujarra manku. Jii kaja kujarralupula ngula kajakamu yurntalkaja manku. Palujanuya jiikajajanu marlajanukaja laltu nyinaku. Murrkangunyawanpara wirrilyi nyinaku marlajujaraku. Marlajura kurtaku maaja nyinaku.” Palunyajanulu Ripikalu karrpu kujungka manu kaja kujarra. Murrkangunyajara ngarripayi mijimiji. Palu yini junu, “Yiiju.” Jiji jina ngalura wanarnu marlakartilu, kujungka karrpungkalu. Palunya kaja yini junu, “Jayikappa.” Yajikpa rawa nyinapayi jikijiyi yiiyangka kayilapa palu kujarrapula kaja kujarra yutirringu, Yiijukamu Jayikappa.

Yiijukamupula Jayikappa majurringu. Yiijunga kukakarti yankupayi. Mamara Yajikku pukurlpa nyinapayi jumaji kuka ninti. Ngurrapurluka nyinama Jayikappa, Ripikara wirla kunyjunyu nyinama.

Jayikapju mirrka mijimiji ngurrangka kujalpayi. Wartiljanu Yiijulu kalyparturringu, ka yanurnilu Jayikapja japirnu, “Mirrkarni ngaa mijimiji marra yuwa!” Jayikapjura wajarnu, “Wanyuka ngara! Mama-limpa pakirriku ngulampa. Palumili jantulkaja, ngurrakaja jiipukaja kamalkaja manikaja nyuntulu kanyilku. Palukajarnin yarnnga ngula yungku?” Yiijulura wajarnu, “Yuu, kanyilkun nyuntulu. Mirrkarni yuwa walalu!, ngayurna miturrijaku, kalypartu.” Jayikapjura mirrka yungkukijalu ka wanyu ngarangu, kara wajarnu, “Kajirnin yiltalu palukaja yungku. Mamangka ngarnawarrapurlukangka kurungka jungalurni wajala!” Yiijulura wajarnu, “Yiltarnanta yungku Mamangka ngarnawarrapurlukangka kurungkarnanta wajani. Yiltalun kanyilku.” Jayikapjura wajarnu, “Yuu, mirrkarnanta yungku, ngalkun munkurriku.” Palujanura Jayikapju manu yungu mirrka.