16
1 Tialima augwaligo te Godigo Dąų Wali Bomai Po Munalubo Halobage muaiba olama Devitgo te sę yani sel ugwa be tomoba te Dąų Wali Bomai Po Muani Halobage teba muanio. Tama augwa te isiba tigidali ulama domainu ebo ofa dabe ebadi, te God dali deli haliga pedalubo ofa me yalio. 2 Devitgo te ofa dabe ela silama da, teda agai te tiwai po te we bidi dabeba wali, “Eno homugo te Genuai Bidigo wiegi yai sę dagebolo emainao,” wali. 3 Devitgo te tigidali we bidiba nai mani. Tigidali we bidi deli delibolo te bret deli selama, te augwa te iside ulali bulmakau kibu mi dali mena mena pelama, te olali wit meba dali mawai dao.
4 Tama nosali Devitgo te Livai meba dąį ilali, te Dąų Wali Bomai Po Munalubo Halobage pąba pelama, Godiba lotu wabo bidi meba dąį ilali, te Israelgo Genuai Bidi da. Augwa te Godiba buba hwi olama, gedu haluasa po weyu, usu da po olama, te agai nogi ugwaba somainao wali. 5 Devitgo te hanigo tobolu bidi te Asap dąį ilali, te Sekaraia te Asap tudi badu daganalubo si wali bidi da. Te gasa bidi meba nogi e tama da, Jeiel, me Semiramot, me Jehiel, me Matitia, me Eliap, me Benaia, me Obetidom, me gasa Jeiel da. Te bidi dabego sę da te gita elebo sę elaluali. Te Asapgo te brasgo nigali pou pletba elebo sę yai dao. 6 Tama Devitgo te pris Benaia me pris Jahasiel te pris si dąį ilama, te Dąų Wali Bomai Po Munalubo Halobage pageba pelama te biugel bu omainu yai dao. 7 Te hasia sogo mu tama Devitgo te Asapgo haniba te sę mayu, te Genuai Bidiba usu da po wabo tęąbi po omainu yai dao.
Augwaligo Genuai Bidiba usu da po wabo tęąbi yali
(Tib 105:1-15; 96:1-13; 106:1; 106:47-48)
8 Te Asapgo hani augwaligo te tęąbi yalio,
“Dago Genuai Bidi nogi olama, agaba i weyu
te agabolo usu da po wao.
Te dago po hanilama pusao, te tigidali we bidi haniba
te agai yali genuai sę dabe po pusao.
9 Dago tęąbi po dabe agaba pemene elama weyu,
te agai nogi ugwaba sao.
Te agai wiegi wiegi yai sę dabe
yali po dago hanilama pusubaso usu dao.
10 Dago wiegi yai pemene elama,
te agaba genuai nogi mao.
Te Genuai Bidi pageba pabo bidi dabe
augwali te wiegi yai pemene mu emainao.
11 Sesemane sogo dago te Genuai Bidi pageba pelama,
te agabolo hanalu te da tau selama bomo momainao.
12-13 Dage te wąį nǫų Abrahamgo wai dabe,
aga te Genuai Bidigo sę bidi, dage Jekopgo hani,
dage we bidi dabe
Genuai Bidi aga da olama sa muani,
dagego homu kone ma palao,
te Genuai Bidigo bomai sę dabe
te bidigo isąwai noma sabo sę agai yalio.
Te dagego homu kone palao, agai yabo sę dabe
te dwai bidi dabeba te dwai dene mawaibao.
14 Genuai Bidi aga dago God tama da.
Agai e tǫde we bidi tigidali tonalubao.
15 Agai bomai po dąų wali kontrak
me deli da dali yali,
te dąų wali po te sesemane sogo elalueibao.
Tama sesemane sogo agai te dąų wali
poba homu kone paludubo dao.
16 Genuai Bidigo te dąų wali bomai po
Abraham dali yai.
Tama agai bomai po bodolu selama
dąų wali po Aisak dali weyu
te dąų wali bomai po wali pao wali. * Gag 12:7; 26:3
17 Agai Jekopba te po ma wali,
aga te Israel dabe wąį nǫų da,
te agade eno te dąų wali
bomai po sesemane elalua paibao.
18 Genuai Bidigo te tama po wali,
‘Eno te Kenan tǫ nageba mawaibao,
tama te tǫ te nago wąį nǫų dabe
augwali hani wai dabego tǫ elalueibao,’ wali. * Gag 28:13
19 Polobadu Israel dabe augwali
te dwasianu hani mu bidali,
tama augwali te bulu wau bilibo bidi
te tǫ meni yai bidi tiwai bidalio.
20 Augwali te gasa hani dabego tǫde subigila bilalualio.
21 Tialima te Genuai Bidigo gasa
hani bidi dabe mebago dage aiyaba
elalumainu me ilibeo.
Agai augwali tau siyu te augwaliba
dwai sę yainu ebo king dabe agai wado po wali.
22 Agai te tiwai po te king dabeba walali,
‘Eno te we bidi augwali dąį ilali, te eno sę emainu,
tama dagego augwaliba te dwai sę munu me igio.
Te dagego eno po pusubo sę ebo
profet bidi dabeba dwai sę me elamo dao,’ wali.* Gag 20:3-7
23 Dage tigidali tǫde we bidi, dagego tęąbi po
te Genuai Bidiba wao.
Te tigidali side agai dage
ma dobola sali po hanilama pusao.
24 Dagego te tigidali we bidi haniba
te agai genuai nogi po dagego te po walao,
te agai wiegi wiegi yai sę dabe yai dao.
25 Genuai Bidi te polalubo bidi mu da,
tama dago agai nogi ugwaba mu sinao.
Te gasa god dabe te Genuai Bidi tiwai me elalubeo.
Tama tibaso, da te Genuai Bidi dologoba pelama bidinao.
26 Magi baso meni, te gasa hani
we bidi augwaligo god dabe
augwali te tibo god naga da.
Tialima Genuai Bidigo naga te dagalu nigai dao.
27 Genuai Bidi aga bede bidibao,
te aga genuai nogi elalu te king bidibao.
Aga te tigidali bomo elalubo page bidi,
te tigidali wiegi yai pemene ebo kolesaga me te
tigidali sawi yai nai page bidi dao.
28 Dage tigidali hani we bidi,
dagego wiegi yai homu pemene Genuai Bidiba yao.
Dage te agai genuai nogi me
bomode wiegi yai pemene yao.
29 Genuai Bidi polalubao,
tama tialima dagego agai genuai nogi ugwaba sao.
Dagego te ofa sela asu, agai beba asiąo.
Genuai Bidigo kolesaga te wiegi yai
doloba pai mu elalubao,
te kolesaga aga wiegi yai au tiwai elalubao.
Tama tialima dagego te homu koneama
te agaba lotu po wao.
30 Dage tigidali tǫde we bidi da,
dage agade wi elama didibili yao.
Genuai Bidigo te tǫ dili ilama elalubao,
tama tǫ te kikilasa me biligobeo.
31 Tǫ me dagalu, dage si homu pemene elama
te we bidi hani dabeba te tiwai po walao,
‘Genuai Bidi king bidibao,’ te po wao.
32 Tamu ąį, nage pemene elama te ąį u genuai wao.
Te dage tigidali nai dabe te tamu ąį tomode bidibao,
dagego me wiegi yai pemene yao.
Dage gi dabe, dage te gide elalubo nai dabe,
dage tigidaligo wiegi yai homu pemene yao.
33 Genuai Bidi asama te king bidu,
te tigidali tǫ habu badu tonalueibao.
Tama tebo sogo te genuai bulu tǫ
tomode te tigidali nigo te wiegi yai pemene ebo
tęąbi po wabo dao.
34 Dago Genuai Bidiba usu da po wao,
magi baso meni, agai kolesaga
te wiegi yai mu da, tama sesemane sogo
agai da godolo homu mu ebo dao. * 2 Sto 5:13; 7:3; Esr 3:11; Tib 100:5; 106:1; 107:1; 118:1; 136:1; Jer 33:11
35 Tama dago te tiwai po me wainao,
‘Te we bidi dabe ma dobola sabo God,
megi nago da ma sao.
Da sisinama te gasa hani dabego nogode ma sao.
Tama tibaso dago nago genuai nogide
homu kone palama,
te nageba gedu haluasa po weyu usu da po waibao.
Tama dago wiegi yai homu pemene eyu
te nago nogi ugwaba saibao.’
36 Dago God nogi ugwaba sinao,
Israelgo Genuai Bidi da, megi me tigidali sogo nosali,
me bidada peyu bidada paiba.”
Te Asapgo hani augwaligo te tęąbi po ola silama da, teda te we bidi augwaligo te po wali, “Mu dao, te sę mu pedalumainao. Te Genuai Bidigo nogi ugwanu sao,” wali.
Asap aga deli hani dabe dali yali sę
37 Devitgo Asap aga deli hani dabeba dali te sę mayu, te Genuai Bidigo Dąų Wali Bomai Po Muani Halobage pagede bidao wali, te deli deli side lotu wabo tonalumainu yali. Augwa te sę sesemane sogo tonalumainu yai dao. 38 Tama Devitgo Obetidomba sę mani, te Jedutungo ogwa, te aga hani dabe te 68 bidi dabe, augwaliba dali te sę mawai, te Asapgo hani tau somainu yali. Tama Obetidom dali te Hosa siba te Dąų Wali Bomai Po Munalubo Halobage munalubo sel ugwa be tonalubo sę mawai dao.
Taun Gibeonde lotu wabo sę yali
39 Tama Devitgo te pris Sadok aga ama dali dąį ilali, te gasa pris dabe, te Gibeon taunde elalubo sel ugwa bede lotu wabo sę tonalumainu yalio. 40 Tigidali side kigamu me pio augwaligo te isiba tigidali ulama dela silibo ofa yao wali, te Gibeonde elalubo altade te sę yali. Augwaligo te ofa ebo bomai po wali piyąo te sę Genuai Bidigo Israel augwaliba mawai sę dao. 41 Tama Devitgo Heman me Jedutun dali te Livai meba te Genuai Bidiba tęąbi weyu usu da po wabo bidi meba agai dąį ilalio. Te tęąbi nogi e tiwai wali, “Sesemane sogo Genuai Bidigo da godolo umagi mu ebo dao.” 42 Heman de Jedutun sigo te biugel eliyu, te brasgo nigai pletba elali, te gasagi yai musik dabe te lotu tęąbi wabo sogo elalio. Tama te Jedutungo ogwa dabego te Gibeonde elaluali Genuai Bidigo sel ugwa be sunumi dabe tonalubo sę yalio.
43 Devitgo po silibo si da, teda te tigidali we bidi dabe augwa buluba pela silalio. Tama Devit aga beba ma peyu, te Godiba gedu haluasa po hanalu te aga we wai dabeba wiegi yai sę bugagia ilimainu hanalu wai dao. * 2 Sml 6:19-20