5
1 King Solomon dali aga sę bidi dabe augwaligo Genuai Bidigo tempel bede sę dabe sese tama elama silali. Tialima Solomongo aga aya king Devitgo te silva dabe me gol me dis pou dabe me selama, te Genuai Bidi mawainu sa muani nai dabe augwaligo sali, tama augwaligo te nai dabe sese tama selama, te tempel be tomoba pelama, tama te wiegi yai nai muabo be habuba mugi pela silali. *2 Sml 8:11; 1 Sto 18:11
Augwaligo te Dąų Wali Bomai Po Munalubo Halobage te Genuai Bidigo tempel beba muani
(1 Kin 8:10-11)
2 Te king Solomongo te tigidali genuai wąįgo hani tobolu bidi dabeba, me te dwasianu hani wai dabebolo me, agai augwali te Jerusalemba sisinagasao po wali. Agai homugo augwali te Devitgo hanu Saionba painogo homu yali, te da te Jerusalem hanu pedai me deli dao. Tama te Dąų Wali Bomai Po Muani Halobage, te selama tama Genuai Bidigo tempel beba sesemainao homu yali. *2 Sml 6:12-15; 1 Sto 15:25-28 3 Tialima sese tama te namba 7 poluade augwali sisinagasali. Te da te genuai sogo te Osogo Bidabo Bede Bidibo Genuai Sogo. 4 Te polalubo bidi dabe me tigidali hetman dabe sisina silibo sogo da, teda te Livai dabego te halobage tolali. 5 Tama te Livai dabe augwaligo te Dąų Wali Bomai Po Muani Halobage dali, te Godigo ugwa be lotu be dali, te aga tomode elalubo nai tigidali me, te Godiba sa muani nai dabe dao, te nai sese te Livai hani pris dabego selama, tama te tempel beba selasa pali. 6 Tama augwali teba sabolama, tama tede king Solomon dali, te Israel we bidi dali, augwali tigidali deliba sisinama, tama te Godigo Dąų Wali Bomai Po Muani Halobage pąde dolaluali. Tama augwaligo kau kibu omai dabe me sipsip kibu dabe augwaligo elama, Godiba ofa yali. Te ofa yabo hasa dabe augwaligo hauwa mu elali, tama te bidi mego augwaligo te ofa yainogo elali hasa dabe nedabo usu meni yani. 7 Augwaligo te hasa dabe ofa ela silama da, teda te pris dabego te halobage te tempel be tomoba augwaligo te Tedali Gasagi Yai Mu Be Habu me elaluali te Be Habu dodolagalai elaluali teba sela pali, te Genuai Bidigo be tomode, te ensel bidi sigo bogo si dologode muani. 8 Te bogo si dinigaluali. Tama tialima augwaligo te halobage dali te halobage tolobo ni dabe bobobage sigo haluali. 9 Te ni dage si te bobobage mu si dao. Tama tialima, te bidi te Tedali Gasagi Yai Be Habude dolaluyu da, teda te ni dage si sabi si suaibao. Tiali goli, bidi te be habu bulu badu dolaluyu da, teda agai te ni dabe sabi sugobeo. Tama te ni dage si me tama elalubao. 10 Te halobage tomode te nai dabe hauwa tomode meni yani. Te Godigo bomai po asęani te masigi si naga munaluali. Polobadu Israel dabe augwali Isip tagalama augwali bulu du Sainai bidagasali, tama tede Genuai Bidigo augwali dali po dąų walai dao. Te kontrak iyu, te dąų wali po te masigi side elalubadi Mosesgo te halobage tomoba muai dao. *Bom 10:5
Godigo genuai ulago Genuai Bidigo tempel be pągąna sagasali
(1 Kin 8:10-11)
11-13 Te augwaligo te Genuai Bidigo be tomoba te Dąų Wali Bomai Po Munalubo Halobage te muabo sogo bubuga isąbadi, te tigidali haniani pris bidi hani sibi augwa te Godigo gedude wiegi yai pedalobo kolesaga wali pelama yali. Tama te we bidi polo sisinagasai madi da, te Asap, me Heman, me Jedutun, te hani sela augwa wai puluba dabe dali, me augwa deli hani dali, augwali te wiegi yai nala ugwa gudama, tama augwali te giliga asobo badu elalubo alta pąde dolaluali, te tempel be mesalode. Te bidi dabe augwaligo te Livai dabego bidi hani dao, tama augwali te tęąbi po weyu musik elebo bidi dabe dao. Augwaligo haniani gita me bras plet dabe todolaluali. Tama te 120 pris bidi dabego te bu wabo nai biugel nogo tolaluyu, augwali dali dolaluali. Te bidi dabe augwali te musik elebo mu konea pai bidi dabe mu dao. Tama mena sogo augwali sisinama Genuai Bidigo nogi ugwaba siyu, buba hwi po olama tęąbi wabo sogo, te tęąbi po wabo bidi dabe me te biugel bu wabo bidi dabe augwali deliba taluama augwaligo tęąbi po wiegi yai mu wabo dao, tama te dogoni deli mu pedalobo tiwai ebo dao.
Te pris bidi dabe augwaligo te Dąų Wali Bomai Po Munalubo Halobage te Genuai Bidigo tempel be tomoba polo muani, tama augwali buluba ma teda soabo sogo da, te musik elebo bidi hanigo biugel bu weyu, te plet bras tama elebo gagalali. Tama augwaligo Genuai Bidigo nogi ugwaba sabo tęąbi po tama wali. Augwaligo tęąbi po e tama tiwai wali, “Dago Genuai Bidiba buba hwi po wainao. Magi baso meni. Aga da, te da dali wiegi yai kolesaga ebo bidi dao. Agai da godolo mu ebo kolesaga te gamonaibao,” wali. Te augwaligo tęąbi po wabo si, polo tama te genuai pǫgo te Genuai Bidigo tempel be pągąna sagasali. *1 Sto 16:34; 2 Sto 7:3; Esr 3:11; Tib 100:5; 106:1; 107:1; 116:1; 136:1; Jer 33:11 14 Tama Genuai Bidigo ula te pǫde ula genuai mu elama, tama aga te be tomo mu tama pągąna sali. Tialima te pris dabe augwali te be tomoba pelama augwa sę dabe igi pabo usu meni yani. *Sai 40:34-35