Danielgo Buku
Hasia nedebo po
Danielgo bukude te 6 po dabe elaluyu, me te na yali po me si me si elalubao. Te Juda dabe augwali genuai sęgę elaluyu bidibadi, te sogo bidigo e buku Daniel asęai dao, dago te homu ebo dao. Te buku da, te we bidigo Godigo augwali tau siyu, tama augwali dali dagana selama elalubo, augwaligo wiegi yai konemainogo yali. Tama nosali Godigo augwaligo sęgę sela sąna silama, tama augwali wiegi yai bidimainu ilaibao. Te Danielgo bukude bugai si elalubao.
(1) Dąį 1-6 te Daniel me aga abagi dede augwalide po elalubao. Hauwa sogo te boi bidi dabego augwali dali dwai sę yainogo yali. Tiali goli, augwaligo Godiba homu dąų olama, tama augwaligo doloba pai kolesaga naga yali, tama te boi bidi dabego augwali dali yainogo yali sę te augwaligo yabo usu ebeo.
(2) Te Dąį 7-12 te Danielgo nade suali nai po elalubao. Te sogo te gasa Godigo po odisąwai kantri dabe bomo elama mu bidali. Tama augwaligo Godigo we bidi mu silabo tonobo ąǫ yali. Tiali goli, te na yaligo ola mani, te Godigo aga we bidi tau selama, te kantri dabego bomo sia sąyabo homu yali. Tama nosali Godigo we bidi wiegi yai mu bidaibao.
Te Danielba me, aga abagi selaba dali pedelali sę dabe yali po
1
(Dąį 1–6)
Te Juda dabego ogwa bidi meba te king Nebukatnesargo bede bidali
1 Te Jehoiakim te Juda dabego tuni bidi king pedelai, tama kibu be sela bidai madigi, tialima Nebukatnesar te Babilon bulu kingo te Jerusalemba hwįagasainu aselama, tama agai ami bidigo te taun tigidali bagulali. * 2 Kin 24:1; 2 Sto 36:5-7 2 Godigo te Nebukatnesargo te Jehoiakim me te Juda we bidi hauwa somainu elama, tama te Godigo bede muani wiegi yai nai, te kap, me plet pou dabe meba salio. Tama agai te aga tibo godigo beba digibulu sela pali, te be te tǫ pedai Sinarde elaluali, te Babilon hanude digi dao.
3 Tama king Nebukatnesargo te Aspenasbolo walali, te aga bede sę ebo bidi dabego polalubo ofisa bidi dao, te Juda tomode te gesi ogwa bidi meba somainu yabo po wali. Agai te king Jehoiakimgo hani sibi, me te polalubo genuai bidi dabego hani sibi, te tomode gesi ogwa bidi dabe sao po wai dao. 4 Agai te gesi ogwa bidi dabe te wiegi yai gesabidi, me tigi wiegi yai yai naga sao po wali. Tama te tigi me badu dolali te me sigio, tama te wiegi yai kolesaga hauwa koneama, tama te wiegi yai skul olama, te kolesaga polo konea pabo bidi dabe naga sao, wali. Tama tiyu, augwaligo te kingo bede sę ebaso, usu yaibao. Tama Aspenasgo digi te augwaliba te nedebo me asębo sę te Babilon pode ola mayu, tama te Babilon bagego polobadu asęani wiegi yai kolesaga tigidali me ola momainogo yai dao. * 2 Kin 20:17-18; 24:10-16; 2 Sto 36:10; Ais 39:7-8 5 Tama kingo te tiwai po me wali, te tigidali side augwaligo te kingo bede nai sabo bidi dabego ebo kolesaga tiwai eyu, te nai me wain wę tumainu yaibao wali. Augwali te skul sabo te kibu be selade waibao, tama nosali augwali te kingo sę bidi pedelaibao, wai dao.
6 Te Juda hani gesi ogwa bidi dabe tomode te Aspenasgo te bidi me si me si sai elaluai. Augwa nogi e tiwai, Daniel, me Hanania, me Misael, me Asaria dao. 7 Tama Aspenasgo gesi noma nogi augwaliba mawai. Agai te Danielgo nogi te Beltesasar polali, te Hananiago nogi te Satrak poali, tama Misael agai te Mesak poali, tama Asaria nogi te Abetnego poai dao.
8 Danielgo te kingo bede te nai me wain wę te augwaligo mabo nai tubo te aga hagela yali. Te kingo bede elalubo tobage nai dabe, te Godigo Juda dabeba habu selai. Tama tiyu, Daniel aga te mabo nai me wę tuabo hagela homu yali, tiyu aga te God gedude meda idali homu yai. Tialima, agai te polalubo ofisa bidi Aspenasba hanalu wali, te augwaligo agaba te gasa tobage nai mobaso usu egowe po hanalu wai dao. 9 Tama Godigo te Aspenasgo te Daniel homu dene emainu ilali, 10 tiali goli Aspenasgo Danielba te tiwai po wali, “Ena te kingde wi ebao, magi baso meni, agai te dagego tuabo nai me wę te sa muani. Tama dage tigi nomona selama, tama te dagego te duga dali asali gesi bidi dabego tigi tiwai tobage pedalisąbaso da, teda te king bidigo po olama, augwaligo ena ela muaibao,” wali.
11 Aspenasgo te Daniel, me Hanania, me Misael, me Asaria, te me si me si bage tonaluabo bidi me deli nigilali. Tama Danielgo te tonalubo bidiba te tiwai po wagi pali, 12 “Nago da e tiwai usu sao. Dabolo te gide sabo tubo nai doanai dabe naga mao,” wali, “tama tuabo kedau yai wę mayu iduao,” po wali, “te nogo si sogoba usu nagasao,” te po wai. 13 “Tialima, nosali te nogo si wali side, te gasa gesi bidi dabe te kingo be tomode nai tuali bidi dabe sulama, te da me suagameo, tama te nago koneaibao, te dago tigi te augwaligo tigi tiwai wiegi yai pedalugowe, ma meniwe? Te sulama, tama nosali nago mena sę dabolo yabo homu ebaso da, teda te po menio, nago te sę yagameo,” wali. 14 Te tonalubo bidigo te Danielgo pode usu da po olama, tama agai te Danielgo wali po tiwai gilama te sę yai dao.
15 Tialima, te nogo si wali sogo te silama, tama te bage tonalubo bidigo te augwali tigi wiegi yai mu pedalubo sulama, tama augwaligo tigi te mu boma pelama, te kingo bede nai tumainu te sa muani gesi bidi dabego tigi mu edelai sualio. 16 Tama tibaso, te tonalubo bidigo te Daniel dali, te aga abagi sela bageba dali, te kingo wiegi wiegi yai nai te augwaliba me mabeo. Agai te doanai, te nai dabe naga augwaliba mawai dao.
17 Tama Godigo wiegi yai konebo homu kolesaga te Danielba me, te aga abagi sela daliba menama, tama augwaligo koneani kolesaga te genuai mu elalu, te bukude elalubo po dabe me te mu konea pelama elaluai, tama augwaligo gasa nai dabe konebo kolesaga hauwa mu elaluali. Tama me, te Godigo Danielba te na ebo page dabe pusa mabo konebo kolesaga wiegi yai mani.
18 Te tigidali gesi bidi te kibu be sela te skul wabo silali, te king Nebukatnesargo dąį ilali gilama yali, tama te Aspenasgo augwali te kingba odasa pepela yali. 19 Tama te kingo augwali dali po mibo sogo, te agai te tiwai suali, te Daniel, me Hanania, me Misael, me Asaria, te bagego koneani kolesagago te gasa gesi bidi dabego koneani kolesaga aiyaba elaluai. Tama agai augwali te kingo sę yabo bidi pedalumainu ilalio. 20 Kingo augwaliba te tobage hauwa naide po hanalu obadi, te agai te tiwai suali, te augwaligo koneani kolesagago te tigidali aga tonalubo tǫ pedaide bidali kolesaga koneani bidi dabe aiyaba mu elaluai suali. Te kolesaga koneani bidi dabego kolesaga dali, te Juda me si me si bidigo koneani kolesaga dali usu mu isiąbo ąǫ isąwai dao.
21 Danielgo te king bidigo aga nogoba muani sę bobobage sogo yalio. Aga te sę idubadi, te gasa tuni bidi nogi te Sairus te Babilon king bidi pedelali sogoba usu nai dao.