1 Te Josaia isai nosali badu, te Juda dabe augwaligo Joahas sali, te Josaiago ogwa, tama agai tobolude wel gelali, te agai augwaligo king pedalomainu sa muyu, te aga Jerusalemde king bidimainogo. 2 Te Joahas aga Juda dabego king pedelali sogo, agai kibu be 23 elaluali, tama aga Jerusalemde king bidibadi polua sela digi tama yali. 3 Tama te king Neko Isip king te Jerusalemba aselama, tama Joahasgo king sę sela sąyagasali, tama Joahas aga king ma bidibeo. Tama king Nekogo te Juda dabe augwaligo agabolo te takis mone te 3,400 kilogram silva mayu, me 34 kilogram gol mayu yao po wali. 4 Tama king Nekogo Eliakim, Joahas aga ama selama, tama Eliakim te Juda me Jerusalem dabego king nigilali. Tama Neko agai Eliakimgo nogi hasegelama, tama agai nogi Jehoiakim polali. Tama nosali Neko agai Joahas Isipba kalabus elama odasa pali. *Jer 22:11-12

5 Te Jehoiakim aga king pedelali sogo agai kibu be 25 elaluali, tama aga Jerusalemde king bidibadi kibu be te 11 kibu be bidali. Jehoiakimgo Godigo gedude dwai kolesaga iyu yali, te aga Genuai Bidi gedude. *Jer 22:18-19; 26:1-6; 35:1-19 6 Tialima king Nebukatnesar te Babilon bidigo te Juda dabe dali hwįagaselama, tama Jehoiakim kalabus elama, tama aga sengo haliga gebelama, tama Babilonba odasa pali. *Jer 25:1-38; 36:1-32; 45:1-5; Dan 1:1-2 7 Tama Nebukatnesargo te Genuai Bidigo tempel bede munalubo dis me plet dabe te Babilonba sela pali, tama aga kingo bede muani.

8 Te king Jehoiakimgo yali sę po dabe aga king pedelali sogo gagalama yali sę dabe me te buku augwaligo te Juda Me Israel Dabego King Dabego Po Buku wabo, te bukude te elalubao. Te bukugo te dwai damua pai kolesaga me dwai kolesaga te Jehoiakimgo yali po te bukude pusai te elalubao. Tama aga ogwa Jehoiakingo agai pesage selama, tama aga king pedelali.

9 Te Jehoiakin aga Juda dabego king pedelali sogo agai kibu be te 18 kibu be elaluali. Tama aga Jerusalemde king bidibadi polua sela olama, tama nogo si te 10 sogo aga te Jerusalemde king bidali. Jehoiakin agai Genuai Bidigo gedude dwai kolesaga mu yali. 10 Te kibu bede te kedau sogo silainu ebadi, king Nebukatnesargo te ami bidi dabe tagala palama, Jehoiakin kalabus igi pelama, tama Babilonba odasa pali. Tama me te ami dabe augwaligo te Genuai Bidigo tempel bede munaluai te dis dabe me plet dabe te Babilonba sela pali. Tama Nebukatnesargo te Sedekaia, te Jehoiakin aga ama, te Juda dabego king Jerusalemde bidimainu magi ilali. *Jer 22:24-30; 24:1-10; 29:1-2; 37:1; Ese 17:12, 13

11 Te Sedekaia aga king pedelali sogo agai kibu be 21 elaluali, tama aga Jerusalemde king bidibadi nogo si olama deli tama kibu be bidali. *Jer 27:1-22; 28:1-17 12 Sedekaiago te Genuai Bidi aga Godigo gedude dwai kolesaga yali. Tama te profet Jeremaiago te Genuai Bidigo po agabolo pusa mabo sogo, agai aga digi aiyaba elaluama tama agai po odobeo. Menio. 13 Sedekaia aga sębę mu elama, tama aga homu begelebo hagela elama, tama aga Genuai Bidi te Israel dabego Godiba ma asobo hagela mu yali. Nebukatnesargo Sedekaiabolo te Godigo gedude te ugwa dagalu bidigo gedude tigidali sogo Nebukatnesar agai po naga wali paibao po dąų omainu ilali. Tiali goli Sedekaia aga tobolu gagea pelama, tama aga Nebukatnesar dologode munu me bidibeo. *Ese 17:15 14 Tama me te pris dabego tobolu bidi dabe me te we bidi augwaligo Genuai Bidiba tudi ola mabo genuai mu elama, tama dwai damua pai gasa we bidigo ebo kolesaga wali pali. Tama augwaligo te dwai kolesaga ebogo te Genuai Bidigo te Jerusalemde te aga be dao olama sa muani, te be agai gedude dwai meda yai mu pedelali. 15 Tiali goli Genuai Bidi augwa wąįgo God agai aga we bidi me aga be dali dolobo hagela yali. Tama tibaso, agai te profet dabe hauwa mu agai po te we bidi dabebolo pusumainogo tagala palidu geani. Magi baso meni, agai augwali hobede mu ebaso. 16 Tiali goli te we bidigo te augwaliba tagala palali te bidi dabe posobo po weyu yali, tama augwaligo homugo tiali augwaligo po te olo nai tiwai dao homu yali. Tama augwaligo te profet dabe olo nai gagaliyu yali. Tama tibaso, Genuai Bidigo aga we bidi dabe hagela mu elama, tama augwali dali sębę genuai mu yali. Tama augwaligo agai augwalibolo tagala palainu ebo te dwai sę geda muabo usu egobeo.

17 Tialima Genuai Bidigo te Babilon king aga ami bidi dabe dali augwaligo te Juda dabe dolomainu tagala palali. Te Babilon dabe augwaligo te Juda dabego gesi bidi te tigidali Jerusalemde ela siliyu, me te Genuai Bidi aga bede ela siliyu yali. Kingo Juda dabe hobede dwasianu me ebeo. Mu menio. Te Babilon dabe augwaligo te Juda dabe gesi bidi me gesi wegi sese tama, me monu dabe, me te mosi dabe mu yai bage pąde tama te isabo ąǫ yai bage te Genuai Bidigo te Juda dabe sese tama te Babilon kingo nogoba muani. *Jer 21:1-10; 34:1-5 18 Tama te Babilon kingo te haniani genuai me dwasianu dis dabe, me Genuai Bidigo tempel bede plet dabe, me Genuai Bidigo bede wiegi wiegi yai nai dabe siyu, me Juda dabego kingo doado bage, me aga ofisa bidi dabego doado bage siyu yali, te king aga ofisa dabego nai dabe sali, tama agai sese tama Babilonba selasa pali. 19 Tama te Babilon ami bidi dabego Genuai Bidigo be sia uluyu, me kingo be me sia uluyu, me Jerusalemde genuai genuai be dabe sese tama isi ulali. Tama augwaligo te taunde tigidali wiegi wiegi yai nai dabe sese tama dolama tagaliyu, me te taungo obo aluama tagaliyu yali. *1 Kin 9:8 20 Tama te Babilon kingo te we bidi te boide elisąma yali we bidi sese tama te Babilonba kalabus elama selasa pali. Tama te Juda we bidi augwali te Babilon king dabego olo sę ebo bidi we bidada pidubadi, te kantri Persia boma pai mu pedaliyu, tama te kantri Babilon aiyaba elalubo sogoba usu nagasali. 21 Te Israel dabe augwali augwa tǫde bidibo sogo, augwaligo augwa tǫ tigidali namba 7 wabo kibu bede augwaligo olo me tagalai menio. Tama tialima, augwali te Babilonde kalabuside bidibadi augwaligo tǫ olo bugagia toma tuyu, kibu be 70 olo toma tuali, te Genuai Bidigo te profet Jeremaiago pedauwalidu pusali po usu nigi pali. *Jer 25:11; 29:10

22 Te Sairus aga kantri Persia king bidibadi kibu be deli wabode, Genuai Bidigo Sairusgo homu hogodolama, tama agai po me wali. Agai te po asęnama, tama agai te tonalubo tǫ tigidaliba tolali. Tama te po sela pabo bidi dabego te po augwaligo te we bidibolo neda mao wali. Te sę pedelali te polobadu Genuai Bidigo profet Jeremaiabolo menama, tama Jeremaiago te Israel we bidibolo pusali poba usu nagasali. 23 King Sairusgo te po e dao, “Genuai Bidi God da, te tigidali dagalude elalubo nai tonalubo God dao. Tama agai ena Sairus te tigidali tǫ tonalubo bos bidi nigilai dao. Megi agai enabolo agai be me deli Jerusalemde sę yao po wali, te Juda bulu distrikde. Genuai Bidi dage Israel dabego God aga tigidali aga we bidi dage dali tigidali sogo bidaibao. Tama megi da, dage duga buluba ma piagameo, te Jerusalemba,” te Persia dabego king Sairusgo te po asęna tolali. *Ais 44:28