44
Genuai Bidigo aga we bidi dabe tonalubao
1 Genuai Bidigo te po wali, “Awe, eno dage
dolomainu yaibao.
Tiali goli, dage Israel dabe,
dage Jekopgo hani, dagego odiąo.
Ena digi eno dage dąį ilama,
te dage eno sę bidi bidibao.
2 Eno dage te deli hani we bidi pedalumainu ilali.
Eno dage sisi ilama, dage dąį iliyu,
te dage tǫde pedalisiąbadi,
te sogo te dage ena hani da olama,
dąį ilibo tiwai yali.
Te eno dage negeyu, tonalua asali,
te megi e sogoba usu nagasobao.
Ena digi eno dage dąį ilama,
tama dage eno doloba pai sę bidi bidibao.
Tama tialima, ena Genuai Bidi, eno te po obao,
dage wi me elamu dao.
3 Te ąį sǫą pabo tǫba eno te ąį gelaibao,
tama te wa pai tǫde te ąį somainu ilaibao.
Te eno mobo bidi te dagego wai dabeba gelaibao.
Te eno dagego waigo ame nabo wai dabeba
wiegi yai bugagia ilaibao.
4 Tama augwali te wę ili hauwa elalubo nosai
bugagia holobo tiwai yaibao,
te ąį sesegede ni dabe holobo tiwai puapi holaibao.
5 Te meba gasa Israel hani isąwai we bidigo
konealubo homu enaba dąų waibao.
Augwali mebago te tiwai po waibao,
‘Ena Genuai Bidigo bidi dao,’ waibao.
Te mebago te po weyu,
‘Ena te Jekopgo hani da,’ waibao.
Te me badugo eno nogi te augwa nogode asęaibao.
Te me badugo te po weyu, ‘Ena te Israel hani da,’
po waibao,” wali.
Te tibo god nigibo bidi dabe, augwali te kolesaga umuna sai bidi mu dao
6 Tigidali Bomo Elalubo Genuai Bidi,
aga te Israel king da,
te dage tudibadu pogalu, te dage
tau sabo bidi, agai te po wai,
“Ena Genuai Bidi, ena hasia polasa mu bidali,
tama ena nosali te sabi badu mu bidaibao.
Te gasa god munu me bidibeo,
enaduba deli naga bidibo dao.*Ais 48:12; Ped 1:17; 22:13
7 Te ena tiwai god me deli bidibawe?
Te aga bidiba wida, teda aga digi te daba pedalubo
sueibao.
Tama agai me dabolo te aga polobadu polobadu mu
yali sę po omainu yaibao, te eno gagalama,
te we bidi pedelali po tiwai wabo odaibao.
Tama agai te nosali pedelabo sę po me omainao.
Awe, te aga hanilama pusao,
te da tigidaligo te nosali yabo sę po
hania pusubo odaibao.
8 Eno we bidi dabe, dage wi elama, dili tidibi igio.
Polobadu digi eno dageba weyu,
te sę pedelaibao po wali.
Tama dage te eno ebo sę po te mu po da wabo bage
dao.
Te ena tiwai gasa god me bidiba homu eba, agawe?
Eno te me deli munu me konebeo.
Ena deli naga te dagego toma nabo bomai pesage tiwai
elalubo dao.”
9 “Te tibo god piksa noma nigibo bidi dabe,
augwa digi te dwai mu ilibao.
Te sawi wiegi yai piksa augwa wiegi yai pemene ebo,
augwali te olo nai tiwai ebao.
Te tibo godiba lotu wabo bidi dabe, tiwai bidibao.
Tiali goli, te augwali hale mu yaibao, magi baso meni,
augwaligo te tibo godigo magi sę me deli ebo
me sugobeo.
Augwali te homu kolesaga mu umuna sai bidi tiwai dao.
10 Augwaligo mena tobage homu kolesaga elalubo,
augwaligo te tiwai tibo godigo piksa nigibawe?
Te tibo god dabego augwali dwasianu munu me
tau sogobeo. Mu menio.
11 Te tibo godiba lotu wabo bidi dabe te hale dwai
mu yaibao,
magi baso meni, te bidi dabe augwa digi te tibo god
nigibao.
Eno homugo te augwa tigidali sisinagaselama,
te augwa dolugulama,
te augwa tibo godigo mena sę ebo po te pusumainu
yaibao.
Mu tama, te eno augwali wi mu ilibaso,
te augwali hale dwai mu yaibao.” Te po wai.
12 “Te aingo nai nigibo koneai bidi dabego te ain
selama,
siaba munama, nagamea pabo si,
tama augwa te tibo god piksa nigibo dao.
Augwa te hama nogogo tulama, te ainba elibaso,
te augwa bomogo digi te piksa nigilama pedelali.
Te augwa sę ebo sogo, te augwa nai me wę tusiąwani
da,
te augwa bomo tigidali sia sabo dao.”
13 “Te nigo piksa noma nigibo koneai bidi dabego,
augwa te wiegi yai ni dage selama, usu selama,
te bugagia mu dodolama, te piksa nigainu ebo dao.
Tialima, te pensilgo te piksa noma asęnama,
te piksa togwabo bugagia usu nama usu sali.
Nosali augwa te ni togobo nai sisel selama,
te asęani dąįdu wali pelama,
te piksa togoyu, sawi mu elama,
te sawi gesi ogwa bidi me deli tonobo tiwai ebo dao.
Tialima, augwa te nigo dulama nigali tibo god,
te augwa lotu be tomoba muyu ebo dao.
14 Augwa te sę yainogo te dwagi yai ni sida togwali.
Tama augwa te busi tomoba pelama,
te wiegi yai ni kali dabe gegegi pelama, habu
selama,
dąį ilali, augwa te ni genuai igulubo sogo togwainu
tiali.
Te augwa te ni wuli wai me bulali,
te tulubagego te ni genuai ilibo tonaluali,
augwa te ni selama, te sę yainu tiai dao.
15 Augwa te ni dabe togolama,
te me badu togwa sabo ni dage te tigi posolo ilabo
nogabo sia sali,
tama te togwa sabo delage me badu te bret ulabo sia
sali.
Tiali goli, te ni dage me deli augwa selama,
te augwa tibo god piksa nigilama,
augwa lotu po teba wai dao.
16 Augwa te tama kolesaga te ni dabede yalio.
Augwa te sia nogolama,
te nai me hasa ula tuainu yali,
te augwa nai tulama, haliga pągąnani.
Tama me, te augwa tigi posolo iliyu,
te po wali, ‘Sia wiegi yai mu dao,
te eno tigi bugagia mu posolo ilibo dao,’ wali.
17 Tama te ni dabego naga te augwa tibo god nigiyu
yali.
Te augwa kidu sugunama, te augwaliba lotu wabo dao.
Te augwa te tiwai gedu haluasa po weyu,
‘Nago ena tau sao, magi baso meni,
nage eno god dao,’ te po wabo dao.”
18 “Mu tamao, te tobage we bidi dabe
te homu kolesaga mu umuna selama,
te augwa homu kolesaga mu meni yai.
Te magi nai me deligo augwa gedu paliama,
te augwa tonono bilibo usu isąbo tiwai ebo dao.
Te magi nai me deligo augwa homu kone tuą palobaso,
tama augwa te homu kone tuą pabo kolesaga ebo
dao.
19 Te homu kolesaga elalubo bidigo da,
te kolesaga dagalama, te po weyu,
‘Eno te ni delagego te sia me badu nogoyu,
te eno bret me kibu mi ulama tubao homu igi dao.
Magi elama eno te ni dagego me deli selama,
te piksa dwai nai me deli nigilama,
kidu sugunama, teba lotu oba, agawe?’ te po wagi
dao.
Tiali goli, te homu kolesaga kone tuą pai
we bidigo homu kolesaga menisąyu,
tama te tobage po augwaligo me wagobeo.
20 Augwa homu kolesaga te mu kone tuą palio,
tama augwa te geda mubo homu kolesaga mu eyu,
te bidigo sia keli tubo tiwai yalio.
Te we bidi dabe me deligo homu kolesaga dolo ma siyu,
te po wabo sunumi deli me menio,
‘Te eno dolo nogode tolalubo nai, te ni dage naga,
te god meni,’ te po wagobeo.’ ” Te po wai.
Te agai genuai bomogo Genuai Bidigo te Israel dabe ma sali
21 Genuai Bidigo te tama po wali,
“Dage Israel, dage te Jekopgo hani,
dage eno sę bidi dao, dagego ena homu kone gegeda
paligio,
te eno dage deli hani we bidi pedalumainu ilama,
te dage eno sę ebo we bidi bidibao.
Tama eno dage homu kone me gegeda palogobeo.
22 Eno dagego dwai sę yali sęgę sela sąwanio,
tama augwali te pǫ waligo selasa pabo tiwai yalio.
Te dagego yali dwai sę te kigamu pǫ te giliga
pedalubode sia sabo tiwai yalio.
Eno dage ma salio, tama tialima,
dage enaba ma asiąo,” wali.
23 Dagalu, nage wiegi yai pemene elama, i wao,
tama te tǫ dologode aiyadu elalubo nai dabe,
dagego i waiąo.
Dage bulu du dabe me, dage te genuai ni silide elalubo
tigidali ni dabe,
dagego wiegi yai pemene elama, i wao.
Tigidali nai i wao, magi baso meni,
Genuai Bidigo bomo me genuai nogi
te dage Israel dabe ma sali sogo ola mawai dao.
24 “Ena Genuai Bidi, ena dage tudibadu pogwalu,
te dage ma dobola sabo bidi,
eno naga eno sisilama, dage dąį ilali,
te ena hani da olama,
te dage e tǫba pedalisiąbadi tama tiali.
Eno te tiwai po dageba wainu ebao.
Enaduba deligo naga eno te tigidali nai
pedela silimainu ilali.
Eno naga eno te dagalu me tǫ nigilama,
te augwali bidabo pesageba munama,
te megi elalubo dao.
25 Eno te magi nai me deli te nosali pedelaibao po
wabo bidi dabego po te homu kone tuą palama,
tama te augwaligo po geda mueibao.
Tama te mena sę aga nade konea pai bidigo po homu
kone tuą palaibao.
Te po page konea pai bidigo homu kolesaga te eno
umuna palobo bidi tiwai pedalumainu ilibo dao.*1 Ko 1:20
26 Te eno sę bidigo magi sę yabo po me deli pusubo
sogo,
tama te sę nosali badu pedelaibao,
te po eno wabo sogo da,
teda eno te po mu naga pedalumainu ebo dao.
Te megi eno te tiwai po obao.
Te we bidi dabe te Jerusalemde ma bidigi pelama,
bidaibao.
Me te Juda dabego taun augwa ma nigaibao.
Te megi dolama elalubo hanu dabe
te eno ma wiegi yai nigilaibao.
27 Eno te po wabo sogo, ‘Tamu ąį,
nage sula sao,’ obaso da, teda aga te sula sabo dao.
28 Tama eno te tiwai po wali,
ena digi eno te Sairus te Persia bagego king tiwai
nigilali,
te eno homugo emainu ebo sę tigidali agai emainu
homu yali.
Agai te po obaso, augwaligo te Jerusalem ma nigaibao,
me augwaligo eno be sę yabo sę gagalaibao,” te po
wali. *2 Sto 36:23; Esr 1:2