1 Tama te bidi te da tǫde bidi tiwai, agai te Danielba te tama po ma wali, “Te sogo te polalubo ensel Maikel te pedelaibao, te dage Israel dabe tonalubo ensel dao. Te sogo te genuai sęgę mu pedelaibao. Polobadu te tobage sęgę tiwai te bulu tǫ kantri me delide pedalubeo. Te sęgę pedalubo sogo, teda te Godigo dage te Israel we bidi tigidali dobola ma saibao, augwali nogi te agai bukude elalualio, tama te augwali bugagia bidaibao. * Mat 24:21; Mak 13:19; Ped 7:14; 12:7 2 Tama Godigo te genuai hani isali we bidi ma hodolaibao. Meba augwaligo te sesemane sogo bidada peyu, bidada pabo wiegi yai ula saibao. Tiali goli, mebago te hale genuai mu elaluyu, tama augwali te sesemane sogo bidada peyu, bidada paibao. * Mat 25:46; Jon 5:29 3 Te wiegi yai kolesaga koneai elaluai bidi dabe, te augwalide ula ebo te dagalu ula mu te hulide ebo tiwai yaibao. Augwaligo te we bidi hauwa te doloba pai kolesaga wali pomainu dodolali, tama augwa ula te sesemane elalu, te hǫ ula tiwai yaibao. 4 Tialima, megi da, Daniel, nago te po dabe elalubo buku te haluao. Tama nago dąį tede muao, te bidi dabego te buku habu seliyu, tama tiao. Te buku te halualudubadi, te tigidali dagalude me tǫde nai silibo si te pąba usu naibao. Tama we bidi hauwago te po page koneainu, iba soyu, eda soyu eyu, sę dene mu yaibao. Tiali goli, te augwali usu me egobeo,” te bidigo te po wali. * Amos 8:12 tede te tiwai po naga elalubao. Tiali goli, te Hibru pogo te page kuna konebeo. Mebago te homu yali, te po e tiwai wali homu yali, “Te we bidi hauwa te tigidali tǫ habu usu nama bilaibao, tama augwaligo te gasa tobage sę hauwa koneainogo yaibao.” * Ped 22:10

5 Nosali ena, Daniel, eno te gasa bidi si te wę sanede dolalubo suali. Me deli te ena dolalubo badu dolaluai, tama me deli te wę u badu dolalualio. 6 Te dolaluali bidi si te bidi me deligo te wiegi yai nami ugwa belama, te wę tomo daide ugwadu dolaluali bidibolo te po walio. Agai te tiwai po wai, “Nisu sogo mu te gasa tobage noma sabo sę dabe pedelama, te mu siligowe?” 7 Tialima, te wiegi yai nami ugwa beali bidigo, agai te aga nogo si dali te dagaluba nogo tų elalu, tama agai te tama po wali, “Te Sesemane Sogo Bidibo Godigo nogide, eno mu po obao, te gasagi yai pedelali te tobage nai dabe te elalua pidu, te kibu be sela olama, me kibu be pedaiba usu naibao. Tama te Godigo we bidigo bomo te mu sia sigi pabo sogo, te augwali mu dolobaso da, teda te sę dabe me te sia saibao,” wali. † Te Hibru pogo te vesde wali po kuna konebeo. Meba bidigo homugo te homu yai, agai te kibu be sela olama, me kibu be peda sigi pali homu yali. Tama meba bidigo homu te agai po geme dualama weyu, tama te nisu sogo te sęgę pedeliyu siligowe, te dago kuna konegobeo. * Ped 10:5; 12:14

8 Eno agai te po wabo odali, tiali goli eno kuna mu bugagia konebeo. Tama eno agaba te tama po hanalu wali, “Tiali goli, genuai bidio, te sę dabe te magi elama silaibawe?”

9 Tiali goli, agai po wei ponoyu, te tiwai po wali, “Daniel, nage pao. Magi baso meni, te buku te halualio, te ma dagabo te habu selali, magi baso meni, te po page te geme dualaludubadi, te dagalu me tǫ silibo sogoba usu naibao,” wali. 10 “Te sęgę dabe pedelali te hauwa we bidi dąų waliyu, te doloba pai kolesaga emainu yai, tama augwa te magi meda meni yai wiegi yai mu te God geduba pedalumainu yaibao. Tama te wiegi yai homu kolesaga koneai elaluali we bidi, te augwaligo naga te sę dabe page koneaibao. Tiali goli, te dwai we bidi dabego te sę page koneainu ebaso, usu me egobeo, tama te augwaligo dwai kolesaga hauwa mu ebo sę yaibao,” wali. * Ped 22:11

11 “Te boi bidi dabego te Israel dabeba te Godibolo tigidali sogo ofa ebo kolesaga tagala weyu, tama augwa te doado bage me nai dabe dolabo dwai nai mu te Godigo be tomode dodolobo side gagalama, tama te 1,290 bodolu sogo wali te siligi pomainao,” walio. * Dan 9:27; 11:31; Mat 24:15; Mak 13:14 12 “Tama te we bidi bomo elalu bidibaso, tama te God tonalu, te 1,335 bodolu sogode usu nama te siligi pabo side, augwa wiegi yai homu pemene emainao. 13 Tama Daniel, megi nage te bomo elama dolalu, te dagalu me tǫ silibo siba usu nao. Te nage isaibao, tiali goli nosali te nage ma hodaluama, tama te tigidali nai siligi pabo side, te Godigo nageba sa muani nai dabe saibao,” te wiegi yai name ugwa beali bidigo te po wali.