7
Te haniani homu kolesaga dabe po
Te bidi dabego homugo nage wiegi yai bidi da
homu ebaso da,
teda te wiegi yai mu da,
te genuai mone mugo abelebo
wiegi yai denami ebo
tigide pibo wel aiyaba mu elaluali.
Me, nage isibo side,
tebogo te nago idago nage
ame nani sogo te aiyaba elalueibao. * Prs 22:1
 
Da te bidi isaide te bidi dabe gela wabo beba me paibaso, te wiegi yai kolesaga ebao, tama te genuai nai da tubo beba pabo kolesaga ebo te aiyaba elalubao. Magi baso meni, da tigidali bidi isaibao. Tialima, da tǫde bidibo sogo yaibaso, dago tede bugagia homu kone paliąo.
Te dago nai me delide haliga sęgę ebaso, te wiegi yai da, te gisugu wabo kolesaga aiyaba elalubao. Mu dao, te haliga sęgę ebaso, te dago gesabidi hulia sali, tiali goli te tama tebogo da tau sobaso, te tǫde kolesaga tigidali bugagia homu kone palumainu ebo dao.
Te nago wiegi yai homu kolesaga elalubaso, teda nage te isali bidide diligi weyu bidibo bidi dabe dali bidabo homu yali. Tialima, te wiegi yai homu elalusiąbo bidi dabe, augwali te haniani dobo kolesagade pemene ebo bidi dabe dali bidabo homu ebo dao.
Te wiegi yai homu kolesaga elalubo bidi dabego nage dali wado po weyu, te nage dodolobo po obaso da, teda te wiegi yai kolesaga ebao, tama te wiegi yai homu kolesaga elalusiąbo bidi dabego balia weyu, nageba mani genuai nogi te aiyaba elalueibao.
Te wiegi yai homu kolesaga elalusiąbo bidi dabego gisugu obaso da, teda augwaligo gisugu wabo te page meni yai elalubao. Awe, te kolesaga te sesane yai bono te siade ulali te podila sabo tiwai yali, tiali goli agai te sene sospen posolo mu ilabo usu egobeo.
Te wiegi yai homu kolesaga elalubo bidi bidali, tiali goli agai bomonama eyu, gasa bidigo mone sobaso da, teda aga te wabo pabo bidigo homu kolesaga tiwai elalubao. Me, te bidi mego te po tų odoyu, te bidi agai gasa bidigo nogode geme mone sabogo te kolesagago agai te wiegi yai homu kolesaga dolai dao.
Te bidi mego sę me deli hodolobaso da, teda te wiegi yai kolesaga ebao. Tialima, agai te yali sę siminibaso da, teda te sę uganu ela holali dao. Te magi nai pedalubo bugagia tonalubo bidigo ebo kolesagago te hagoma homu ebo kolesaga aiyaba elalubo dao.
Nago gasa bidi dali haliga sębę polo mu igio, magi baso meni, haliga sębę polo ebo te wiegi yai homu kolesaga elalusiąbo bidi dabego homu kolesaga dao. * Jer 1:19
10 Nago te po wagio, “Magi baso polobadu sogogo te megi sogo aiyaba elalubawe?” Nago te tobage po obaso da, te nago wiegi yai homu kolesaga elalubeo.
 
11 Te tǫde bidibo tigidali we bidigo
te wiegi yai homu kolesaga
elalubaso, te usu yaibao.
Te wiegi yai mu ebao,
te wiegi yai nai dabe te aya isainu
dabolo mabo tiwai ebo dao.
12 Wiegi yai homu kolesaga te mone tiwai elalu,
tama te dwai sogo pedalubaso, da tau saibao.
Tialima, wiegi yai koneani homu kolesagago
te mone aiyaba elaluali,
te da umabo sogo mu tau siyu,
te da bugagia bidibao.
 
13 Te Godigo yali sę tigidalide bugagia homu kone palao. Te Godigo nai me deli nigali te gagea pai elalubaso da, teda dego mu ma dodolaibawe? 14 Te nago bidibo ulade sę dabe te bugagia dolalubaso da, teda nage wiegi yai homu pemene yao. Te dwai sogo nageba pedalubaso da, teda nago te tama homu yao, Godigo te wiegi yai sogo dabolo tagala palu, te dwai sogo me dabolo asomainu tagala palaibao. Tibaso, magi sę nosali daba pedelabo, te dago konebe dao.
15 Eno bidibo ula te olo nai tiwai elalubao, tialima ena te tǫde bidibo sogo eno te haniani kolesaga ebo suali. Eno suali, bidi mebago doloba pai kolesaga wali pali, tiali goli te bidi dabe augwali isalio. Te bidi mebago dwai kolesaga ebo eno suali, tiali goli augwali bobage sogo sesabi elama, bidibo dao. 16 Tibaso, dago doloba pai kolesaga wali pabo bomo mu eyu, te wiegi yai homu kolesaga sabo sę igimio. Tiyu, dago dena digi dolobo dao. 17 Te me, dago te tobage dwai kolesaga me te wabo pabo bidi dabego ebo homu kolesaga wali pabo bomo mu igio. Tiyu, dago dena isabo sę asesa selebo sę bomo ebo dao. 18 Nage te tobage kolesaga si tomode bilao. Te God dologoba pelama bidibo bidi yaibaso da, teda agai te magi sę yali te tagalao, te wiegi yai naga pedelaibao.
19 Te taunde tobolu bidi nogo si elalubaso, augwaligo te taun bomo yai pedelabo tau somainu yaibao. Tialima, wiegi yai homu kolesagago te bidi me deli boma pai mu pedelama, te taungo tobolu bidi dabego bomo aiyaba elalubo usu yaibao.
20 Te doloba pai bidi me deligo wiegi yai kolesaga sesemane sogo me idugobeo. Menio. Me sogo agai me sęgę sabo dao.
21 Nago te we bidi augwaligo mibo po tigidali me odogio. Te nago augwaligo wabo poba bugagia olo mubaso da, te naga sę bidigo nage posobo po dwai wabo te nago odobo homu yaibao.
22 Magi baso meni, nago te tiwai koneao, hauwa sogo naga digi nago gasa bidi posobo dwai po wabo dao.
23 Eno te tama homu ebo tigidali bugagia homu kone palali, te aga page mu gegela suainu yali, magi baso meni, ena te homu kolesaga mu konea pabo bidi mu pedelainu yali. Tiali goli, eno homu kolesaga te usu ebeo. 24 Te tigidali nai pedalubo page hanilama gegainu ebo sę te genuai mu dao. Dago te digibulu uganu mu elalubo nai, ma te aiyanu mu elalubo nai, te dago sueinu gegebo tiwai ebao. Tialima, dego mu te nai dabe page elalubo gegelama sueibawe?
25 Tialima, eno sągą dili bomo mu selama dolalu, te eno sę bomo eyu, te tobage wiegi yai homu kolesaga tigidali sabo sę bomo yali. Tama eno te tobage dwai kolesaga page me gegelama, koneabo sę bomo eyu, te wabo pabo bidigo homu kolesaga tiwai ebo gegebo sę bomo ebo dao.
26 Eno te tiwai page gegelama suali, te isibo kolesaga te ha ebo nai tiwai dao. Tiali goli, te bidi dali dwai sę yainogo sinabo we te bidi bolo tubo kę tiwai dao. Te da te ha mu ebao. Te tobage we da, te sųgų hagane togobo wa tiwaigo da bidi tola sobao. Te agai nogo te sen tiwaigo da kalabus ebao. Godigo te bidi me deli godolo ebaso da, teda te bidigo te tobage hagane togobo wa gedelama, wi paibao. Tialima, te hagane togobo wago te sęgę sabo bidi dabe tola sobaso, te augwali me geda muyu, ela soagobeo. Mu menio. 27 Homu kolesaga mu konea pali bidigo te tiwai po wali, mu tamao, eno te tigidali sę page koneainu sę dua dua ela pelama, tama megi da, eno te we dabe sibigo kolesagade koneai dao. 28 Eno te wiegi yai we me deli gegebo sę yali, tama eno gegebo gegebo sę yali, menio. Te bidi sese umabo hauwa te tausen we bidi dabe tomode, eno suali, te deli deli wiegi yai bidi bidali. Tialima, eno te wiegi yai we deli bidibo me subeo. 29 Godigo te we bidi dabego sunumi dąį ilali, te augwaligo wali pabo sę dene ebeo. Tialima, augwa digi te tobage homu kolesaga hauwa pedelali, te tama teyu, te augwali bilibo sinabo sę mu ebo dao.

*7:1: Prs 22:1

*7:9: Jer 1:19