Profet Jeremaiago Po Elalubo Buku
Hasia nedebo tau sabo po
Profet Jeremaia te Jerusalemde bididuali sogo, te Babilon tǫ kantri king Nebukatnesargo ami bidi dabe dali aselama, te Juda hani dabe dolagasobo sogo elalubo pąde, aga bidali profet bidi dao. Te Jeremaiago pusali po hauwade te agai te po weyu, “Te dage Juda dabe me Jerusalem bage, te dage dua dao, bugagia kone palao,” po walio. Te we bidi dabe augwaligo te tibo god dabeba lotu wabo tagalisąma, tama te homu begelisąbaso da, teda Godigo augwali dolabo po odobo hagela homu yaligo da, tama agai te wali sę po dabe, augwali te mu pedelama, te aga digi sualio. Te profet Jeremaiago gasa dąų wabo po meba dabe pusali po te tiwai, te nosali Godigo te Juda hani dabe augwali hobede ma elama, te augwali tau ma sobaso, te augwa page bulu tǫba ma asela yabo po pusalio.
Jeremaiago buku da, te gasagi yai dwasianu tedali, te gasa profet dabego buku dabe tiwai si ebeo, magi baso meni, te Jeremaia aga po dabe digi hauwa pusali elalubao. Jeremaiago te Godigo agabolo wali po te agai te we bidiba pusainu ebo, te agai homu pemene isąwani, tiali goli aga homu kolesaga aiyaba elaluama, tama Godigo homu kolesaga doloba peyu yali. Te hauwa sogo aga hagela sęgę eyu, agade digi hobede yali. Tiali goli, agai aga te hagela sęgę ebo sę te geme dualobeo. Agai dolo tama pusalio, tama agai te po dabe te bukude elalubao. Jeremaiago te Juda hani dabe godolo homu yali, tama Godigo agabolo bomai po mabo sogo da, tama agai te po pusabo homu pemene meni yani. Tama te hani bidi dabe augwaligo agai pusubo po odobo hagela ebaso, te augwaligo aga dolainogo ebaso, agai te God dali po hauwa wai dao.
Jeremaiago pusali wiegi yai po me deli te Dąį 31:31-34 tede elalubao. Te po dagede Jeremaiago pusali po e tiwai, te gesi noma wiegi yai dąų wabo po Godigo aga we bidi dabe dali yabo sę pusali. Te dąų wabo po augwaligo te masigi pedai dagede, ma te buku me delide naga asębo sę egobeo. Menio. Te we bidi dabego haliga tomode elalueibao, tama augwa digi godolo homu eyu, wali paibao. Da te Godigo po mu odobo we bidigo homu kone palobo sęde, te Godigo Mobo Bidi Holi Spiritgo sę ebode dago homu koneao.
Godigo Jeremaia i olama, agai po pusumainu yai
1
(Dąį 1)
Te kibu be dabede Godigo po Jeremaiabolo mawai
Te e da Jeremaiago po, te Hilkiago ogwa dao. Hilkia te pris hani dabe me deli te Anatot taunde te Benjamin hanigo tǫde bidai. Te Josaiago kibu be nogo si, sągągo sela, 13 kibu be wabode, te Emongo ogwa, te Juda king bidali sogo, Genuai Bidigo po Jeremaiabolo mabo gagalai dao. * 2 Kin 22:3–23:27; 2 Sto 34:8–35:19 Te sogo gagalama, tama bidama nosali, Genuai Bidigo po meba te Jeremaiabolo mayu, te Jehoiakim, te Josaiago ogwa, te king bidali sogo te po mawai. Genuai Bidigo po te Jeremaiabolo maduali, te king Sedekaiago kibu be nogo si, sągągo deli teba usu nigi palio, te Josaiago ogwa dao. Te wabo kibu bede te a naga wabo poluade, te boi bidi dabego te Jerusalem we bidi dabe selama, te gasa tǫ kantriba kalabus sę igi pai dao. Te sę pedalisiąbadi, Genuai Bidigo agai po te Jeremaiabolo maduali. * 2 Kin 23:36–24:7; 24:18–25:21; 2 Sto 36:5-8, 11-21
Godigo Jeremaia i olama, te profet sę emainu yai
Genuai Bidigo ena, Jeremaiabolo te po mabo gagalali sogo, agai te tiwai po wali, “Te eno nage naga idago haligade ame nisąbo sogo, eno nage koneai. Te nage naga idago ame nisąbadi, eno nage sa munama, te gasa bulu tǫ kantri dabe tomode te profet sę ela bilabo bidi da homu yai dao,” wali.
Eno te Genuai Bidigo wali po odolama, te eno agai po wei ponoyu, te tiwai po wali, “Hobede ya, God, Genuai Bidi, ena gesi ogwa bidi mu elalubaso, eno te po pusabo kolesaga konebeo,” po wali. Tiali goli, Genuai Bidigo e tama po enabolo wali, “Nago te tiwai po weyu, nage gesi ogwa bidi mu naga da wagio. Menio. Te eno nage gasa bidi hani meba bidiboba tagala palobo sogo da, teda nage augwaliba pagameo. Te eno nageba maiabo po tigidali, te po nago pusao,” wali. “Nage augwalide wi me elamuo, magi baso meni, ena nage dali bidiyu, te eno nage augwaligo nogode ma saibao. Ena Genuai Bidi, eno po wai dao,” wali.
Te po olama, Genuai Bidigo agai nogo eno pedauwaliba munama, tama enaba te tama po wali, “Odao, megi eno po te nago pedauwaliba mubaso, te po nago pusaibao. 10 Megi e side eno nageba te gasa bulu tǫ kantri hauwa hani we bidi tonalubo bomo mobao. Eno nageba te kantri dabego gavman gudabo po wabo bomo, me te gavman dolabo po wabo bomo me mayu, te augwaligo gavman ma dodoluyu, ma bulabo po wabo bomo me mawaibao,” te po wai dao.
Godigo nai si te Jeremaiabolo ola mawai
11 Genuai Bidigo enaba te tama po hanalu wali, “Jeremaia, nago magi nai subawe?” Eno agabolo te tiwai po wali, “Eno te ni amon nologo subao.” * Te Hibru pogo, “Amon” wabo, te e tobage po pąde obao, “Te bugagia tonaluao,” wabo. 12 Tama Genuai Bidigo enabolo te tama po wai, “Nago po te dolo obao. Te tiwai naga, eno ena po te bugagia tonalu, te mu po naga pedalumainu ilalibao,” wali.
13 Tama Genuai Bidigo enaba te tiwai po ma hanalu wali, “Nago magi nai subawe?” Tama eno te po wai, “Eno te sene sospen me deli te not badu kulugulu weyu ebo subao. Tama te sospen sene te saut pedai badu gea palainu ebao,” wali. 14 Tialima, Genuai Bidigo enabolo te tiwai po wali, “Te dolabo genuai nai me deli te not badu tagalama asiyu, tama agai te e Juda dabego tǫde bidibo we bidi tigidali dolaibao,” te po wai. 15 “Magi baso meni, ena Genuai Bidi, megi da, eno te not badu tigidali king i olama, augwali te augwa ami bidi dabe dali asaibao. Te king dabe aselama, te augwa king dugabo sia sai te Jerusalem taun tomoba pabo sunumi pąba muagasaibao, tama augwaligo bomogo te taun bagua saibao. Tama augwaligo te tobage deli kolesaga naga te Juda dabego gasa taun dabeba me te tama tiwai yaibao. 16 Tama eno ena we bidi dabe po tų kot ilama, te augwali dene mawaibao. Magi baso meni, augwaligo ena tudiba munama, te augwa digi tibo god nigilama, te augwaliba ofa eyu, te lotu augwaliba wai. Te kolesagade augwaligo te dwai sęgę saibao. 17 Tiali goli, nage da, nage sisi elama, hogodama pao. Te tigidali po eno nageba mani, te nago augwaliba pusao. Nage wi me isiąma, augwalide habu bulu me kila sigio. Nage tama tiyu da, teda te ena digi eno nage wi iliyu, te augwali gedude habu bulu kila somainu yaibao. 18 Jeremaia, odao. Megi da, eno nage te bomai obo elalubo taun tiwai bomonama dolalumainu yaibao, te ain pos tiwai, me te brasgo nigali obo tiwai elalueibao. Te Juda king dabego, me te kingo ofisa dabego, me te pris dabego me, te tigidali we bidigo te nage aiyaba me elalugobeo. 19 Te bidi dabego nageba boi bidi ebadi, tiali goli, te augwaligo nage aiyaba me elalugobeo. Magi baso meni, ena digi ena nage dali bidiyu, te eno nage tau siyu, ma dobola saibao. Ena Genuai Bidi, eno te po wai dao,” wali.

*1:2: 2 Kin 22:323:27; 2 Sto 34:835:19

*1:3: 2 Kin 23:3624:7; 24:1825:21; 2 Sto 36:5-8, 11-21

*1:11: Te Hibru pogo, “Amon” wabo, te e tobage po pąde obao, “Te bugagia tonaluao,” wabo.