6
Tama Genuai Bidi Yawego Moses dali te po wai, “Megi nago eno te tuni bidi dali ebo sę suaibao. Te eno bomogo yaibao, tama tibaso agai te dage Israel hani gasaba tagala palaibao. Mu tama, te eno aga selebo sę eyu, aga mu doloyu, tama agai dage agai tǫde bidibo sela sąnama, tama dage paibao,” wali.
Godigo Moses i ma wai
Godigo Mosesbolo te po wai, “Ena digi ena te Genuai Bidi Yawe dao. Polobadu kibu be hauwa ena te Abraham, Aisak, Jekop, te bageba pedelali, te augwaligo koneai, ena te Tigidali Bomo Elalubo God dao. Tiali goli, eno te tama po augwali dali wabe, Genuai Bidi Yawe te eno nogi da, te po wagi sogo da, teda te nogi page augwaligo konegi dao. * Sai 3:13-15 Tama eno bomo yai po augwali dali dąų weyu, te tǫ Kenan augwali mawaibao, te po wai. Augwali te bulude te tǫ page bidi hani bidisiąwai goli, eno te tǫ augwalibolo mabo homu yai. Te me elalubo, te Isip bidi dabe augwaligo te Israel hani kalabus sę ebo tiwai sę menama yai, tama te Israel hani augwali moni gela wai. Tama megi augwali gela wabo eno odai, tama eno homugo polobadu eno te bomo yai po dąų wali, te eno ma koneai.”
“Tama tibaso, nago te po Israel hani dali wao, ‘God agai te po wai, “Ena digi ena Genuai Bidi Yawe dao. Eno dage te Isip hanigo nogode selama, tama te augwaligo sęgę dagebolo mabo tede me eno selama, tama dage olo mu bidimainogo yaibao. Tama eno bomogo augwali dene mu somainogo menama, tama dage eno genuai bomogo dobola ma saibao. Te dage selama, tama dage ena we bidi mu pedelama, tama ena te dagego God bidaibao. Nosali dage te Isip bagego kalabus sęde bidali tagalama, tama dage olo mu bidaibao. Tama te sogo dagego mu koneyu, ena te Genuai Bidi da weyu, tama ena dagego God da, te homu yaibao. Eno dage te tǫ Abraham, Aisak, Jekop, augwali dali bomo yai po dąų weyu, te tǫ mawaibao wai. Tama te tǫ eno dagebolo menama, tama te dagego tǫ mu elaluaibao. Ena da, te Genuai Bidi Yawe dao,” God agai te po wai,’ nago te po augwalibolo pusao,” wali.
Tama Mosesgo te po Israel hani dali wai, tiali goli augwaligo agai po odobeo. Magi basowe, te sę dene yaligo augwali homu aiyaba mu tula palai.
10 Nosali Genuai Bidigo Moses dali te po wai, 11 “Nage pelama, te Isip tuni bidibolo te po wagi pelama, te Israel hanigo agai tǫ mu taga pomainao, te po omainao.” 12 Tiali goli, Mosesgo te po wei ponoyu, te po wai, “Te Israel hani augwaligo eno po odobo menio. Tama tuni bidigo eno po mena tama odogowe? Eno pedauwali sęgę ebao. Eno po te tuni bidi dali bugagia dolo wainogo ebo te usu egobeo.” 13 Tialima, Genuai Bidigo Moses de Aron si te Israel hani bidibo, teba me, te Isip tuni bidi bidibo digi me, te tagala palali, augwali sigo te Israel hani te Isip tǫ tagalama, augwali odasa asomainogo yai.
Moses de Aron sigo hani
14 Te bidi hani augwali te Moses de Aron sigo hasia wąį dabe te bidi hani nogi e dao. Ruben, te Jekopgo gomunai ogwago wai dabe nogi e dao. Te ogwa me si me si, me nogi Hanok, me Palu, me Hesron, me Karmi. Te Rubengo hani me si me si te hani me si me wąį si tomode te Ruben pedelai. 15 Simeon, te Jekopgo tomo ogwa, agai wai ogwa te a naga olama me badu nogo deli, gomunai ogwa Jemuel, me Jamin, me Ohat, me Jakin, me Sohar, me Saul. Saul aga ida te Kenan we me deli dao. Simeongo hani a naga me badu nogo deli, te hani tomode Simeon aga wąį pedelai. 16 Livai, te Jekopgo ogwa me, agai wai ogwa sela, gomunai ogwa Gerson, me tomo ogwa Kohat, sabi ogwa Merari. Tama Livai agai kibu be 137 bidilama, isai. 17 Gersongo ogwa si ame nai, me ogwa Lipni, me Simei. Te ogwa si wąį te Livaigo hani tomode elaluai. 18 Kohat agai wai ogwa me si me si, Amram, Ishar, Hebron, Usiel. Tama Kohat kibu be 133 bidilama, isai. 19 Merarigo wai si, Mali me Musi. Te bidi hani tigidali augwali te Livaigo wai hani augwali dao. * Nam 3:17-20; 26:57-58; 1 Sto 6:16-19 20 Amram agai we Jokebet sai, te aga ayago amago wegi, tama Jokebetgo Aron de Moses si ame nai. Tama Amram kibu be 137 bidilama, isai dao.
21 Ishargo wai sela, Kora, me Nefek, me Sikri. 22 Usiel agai wai sela, Misael, me Elsafan, me Sitri. 23 Arongo we Eliseba sai, te Aminadapgo wegi, te Nason aga abe dao. Tama Elisebago wai me si me si ame nai, Nadap, Abihu, Eleasar, me Itamar. 24 Korago ogwa sela, gomunai ogwa Asir, me Elkana, me Abiasap. Te bage sela augwaligo hani wąį Kora dao. 25 Eleasar te Arongo ogwa, agai te Putiel te bidigo wegi selama, agai wai te Finias ame nai. Te megi nogi nogi yali bidi hani augwali da te Livai hani sibi deli deli augwaligo tobolu bidi dabe dao. 26 Nago te bidi hani augwali tomode te Aron de Moses si nogi elalubo suai. Genuai Bidigo te bidi sibolo naga po weyu, te po wai, “Dage sigo te Israel hani dabe augwali te Isip tǫde bidibo tagalama, augwali odasa asao,” te po Genuai Bidigo augwali si dali wai. 27 Te bidi augwa sigo digi te Isip tuni bidi dali, te Israel hani tagala palaibao, te po wai. Tama te bidi sigo naga te sę yai.
Genuai Bidigo po Moses de Aron sibolo mawai
28-29 Genuai Bidigo Moses dali Isipde po wali sogo, agai te po wai, “Ena digi ena te Genuai Bidi dao. Tigidali po eno nagebolo mabo, te po nago Isip tuni bidi dali wao.”
30 Tialima, Mosesgo Genuai Bidi dali te po wai, “Nago koneani, ena po wabo bidi menio. Tuni bidigo eno po odogobeo.” Mosesgo te po wai.

*6:3: Sai 3:13-15

*6:19: Nam 3:17-20; 26:57-58; 1 Sto 6:16-19