1 Moses de Aron si Isipde bidibadi, Genuai Bidigo augwali sibolo te po wai, 2 “Te megi polua te hasia polua te dagego kalenda bukude elaluaibao. 3 Tama tigidali Israel we bidibolo te po wao, ‘Tama e polua dei nogo si wabode, te deli deli bidigo aga we waide te kibu sipsip wai sa muao, ma aga kibu meme wai me deli sa muao.’ 4 Tama te we bidi wai augwali hani dwasianu eyu, tama augwaligo te nai tula silabo homu isiąbaso da, teda ayago te aga pąde bidibo we bidi wai augwali asa olama, tama te hani augwa si te nai dobola selama tuao. Augwaligo homugo te we bidi wai bidibo usu nama, tama te kibu sipsip mi augwaliba dobayao. 5 Tama dagego kibu sipsip omai, ma te meme omai, te kibu be deli yai sa muao. Dagego te sipsip meme te tigide keni keni yai me selamo dao. 6 Augwaligo te kibu dabe bugagia tonaluama, te polua dei 14 wabode, tama pio mu tigidaligo te augwa kibu dabe elao. 7 Tama augwaligo te kibu dabe kaneme meba selama, tama mena bede te nai tubo te be tųde elalubo ni pos side me, te ugwadu me, te kaneme pipili pao. 8 Tama te sogo hulide dagego sipsip meme mi dabe siade ulao. Tama dagego te kibu mi dali, te bo disiąwai bret, me te ha yai donai dali tuao. 9 Tama dagego te kibu mi disiąwai tugio, tama dagego sęnęde ulama tulamuo. Menio. Dagego siade naga ulao. Tama te kibu tobolu me, te nogo sągą me, te tigidali haliga dabe, te kibu sipsip wai, ma meme wai, tigi sese elalubadi tama ulama, te mi tuao. 10 Dagego te kibu mi meba munalubadi kigamu elamuo. Tama te kibu mi meba kigamu munalubaso da, teda te siaba ulama, tama te siago tigidali dela silimainao. 11 Dagego te kibu mi tuabo sogo e tama tiao. Gudubo ugwa gudama, tama sągą nadoba mubadi, bilibo dono nogode tola sao. Tama dagego polo te kibu mi tuao, magi basowe, te nai tuali bodolude ena Genuai Bidi Yawe eno dage ela soaibao.” * Te Hibru pogo te Genuai Bidi Yawe agai augwali tagalama, ela soabo bodolu mani sogo, te sogo nogi Hibru pogo begelama tama Pasova, te tama wabo dao. * Prs 23:5; Nam 9:1-5; 28:16; Bom 16:1-2

12 “Tama te sogo hulide tama, ena te Isip tǫ tigidaliba pelama, tama te Isip we bidigo tigidali te gomunai ogwa ela muyu, tama augwaligo kibu dabe me elaibao. Ena digi ena te Genuai Bidi Yawe, tama eno te Isip bage augwaligo tibo god tigidali augwali te bomo meni yai bage mu dao hanilama, ola mawaibao. 13 Tama dagego te be pilali kaneme te dagego dąį tiwai elaluaibao. Tama eno te Isip bage augwali dene ilibo sogo, eno te kaneme sulama, tama eno dage ela soaibao.”

14 “Te sę yali sogo, dagego bodolu pedalobode, te dagego genuai lotu po wabo sogo yagasaibao, tama te sogo koneama, ena Genuai Bidi eno te sę yai. Tama dage hani nosali nosali pedalobo bage, augwaligo me te Godigo dage Tagalama Ela Soali Sogo pedalobode te nai tueibao,” wali.

15 Genuai Bidigo po ma weyu, te po wai, “Te nosali bidada peyu, tama dagego te Pasova bret tubosi da, teda dagego te a naga olama, me badu nogo si, te tama side te bo disiąwai nai bret tuao. Te hasia mu dagego bede munalubo te bret bo dabo nai yis tigidali selama, tagalao. Magi baso meni, niwai bidi me deli agai hasia sogo te bo dabo nai yis tudu pelama, te a naga olama, me nogo si usu nigi pobaso da, teda aga dagego te Israel hanide sela sąyao. 16 Te hasia deli sogo, me te a naga olama, me badu si sogo, dage sisinama, lotu po wao. Dagego te si sogo gasa sę me igio. Dagego duga tubo nai dabe naga dodolao. Te sę ebo naga te usu da.”

17 “Te hasia deli sogo te a naga olama, me badu si sogo wabode, te sogo digi eno dage hani tigidali te Isip taga peyu odasa paibao. Tama tigidali kibu bede dagego te wali peyu, te Bo Disiąwai Nai Bret Tuali bodolu muao. Tigidali sogo nosali dagego hani augwaligo te sogo te dagego genuai side tiwai dao. * Sai 23:15; 34:18; Prs 23:6-8; Nam 28:17-25; Bom 16:3-8 18 Tama dagego te bo disiąwai nai bret te polua dei 14, tede pio tubo gagalama, tama te polua dei 21, te tama te nai tuao. 19 Tama te 7 sogo elalubadi, te yis dagego bede me munaluamo dao. Tama dage hani bidi me deli, ma te gasa bulu bidi dage dali bidibo bidi, te niwai bidigo te yis elalubo bret te sogo tubaso da, teda te bidi aga te dage Israel hanide sela sąyao. 20 Odao. Te dage tedali tedali mena bidibo me, te Bo Disiąwai Nai Bret Tubo bodolu mani sogo, tede dagego te bo dabo nai yis tugio. Dagego te bo disiąwai bret naga tuao.” Genuai Bidi Godigo te po wai.

21 Tama Mosesgo tigidali Israel tobolu bidi dabe i olama asobode, augwalibolo te Israel hanibolo pusabo po weyu, te po wai, “Dage pelama, te ogwa bidi sipsip meme te dage dali duga we wai pulubade sa munama, tama te Godigo dage ela soabo Pasova side te sipsip meme dabe elao. 22 Tama kaneme te pouba gelama, tama te ni hisop dwasianu nologo selama, tama te kaneme munalubo pouba muao. Tama kaneme dwasianu me badu te be tųde elalubo ni pos side piliyu, tama te tų ugwadu podilali nide me, te kaneme pilao. Tama dage tigidali te be tomode bidiyu, tama buluba me soasiąma, tama kigamu be posaibao. 23 Tama nosali Genuai Bidi te Isip tǫ habu tigidali teba pelama, te Isip bagego gomunai ogwa dabe elaibao. Tama agai te kaneme dagego be tų sesegede elalubo sulama, tama agai dage ela soyu, tama te ensel mobo bidi dabe augwaligo te be tomoba pelama, dagego gomunai wai dabe elegobeo,” wali. * Hib 11:28

24 “Tama dage dali, tama dagego nosali ame nabo bulai wai dabe, augwaligo te tiwai kolesaga tigidali kibu bede yao. 25 Tama dage te Genuai Bidigo po dąų weyu, dage mawaiba wali te tǫba bidigi pabo sogo me, tama dagego te Godigo dage tagalama ela soali side te nai tuao. 26 Tama nosali dagego wai dabego dagebolo hanaluyu, te po waibao, ‘Magi po pagede te nai tubo dawe?’ 27 Tama dagego augwalibolo te po wao, ‘Megi da, te Pasova sogo dao. Dago te ofa Genuai Bidibolo ebo, te agai da Israel hani tagalama ela soali bodolu side te sę ebao. Dago te Isip hani augwaligo gomunai ogwa agai elali sogo homugo koneama tiwai. Tiali goli, agai da Israel bagego be tagalama, ela soai, tama dago wai dabe sula tagalama, bugagia bidai.’ ” Mosesgo te po te tobolu bidi dabebolo wai.

Tama nosali te we bidi augwaligo te po odoyu, tama augwali tobolu aiyaba munama, tama Godibolo lotu po wai. 28 Tama nosali augwali hodaloama peyu, tama augwaligo te Genuai Bidigo Moses de Aron sibolo wali po wali peyu, te sę igi pai.

29 Tama huli tomode mu, Genuai Bidigo te Isip dabego gomunai ogwa tigidali ela silai. Agai te tuni bidigo gomunai ogwade elebo gagalama, tama ela pelama, tama te kalabus bidi dabego gomunai ogwa dabeba me usu nigi pai. Tama agai te haniani kibu hani dabego gomunai wai dabe me elai. * Sai 4:22-23 30 Tama te sogo hulide naga, te tuni bidi aga dali, gavman sę ebo bidi dabe me, tama te Isip we bidi tigidali, augwali hodaloama, te wai dabe isai suai. Tama Isip tǫ tigidali habu badu tigidali we bidi genuai gela ola pali, magi basowe, tigidali be deli delide wai ogwa isasa pai.

31 Tama te sogo hulide naga tuni bidigo Moses de Aron si i olama, asobode augwali sibolo te po wai, “Dage pao! Dage si dali, te tigidali Israel we bidi, dage polo piąo! Eno hani we bidi taga pao. Dagego enabolo hanalu wali te dagego Genuai Bidi Yawebolo lotu po wagi pao. 32 Tama te kibu sipsip, me meme, tama te kibu bulmakau me selama, tama te Isip mu tagalama, dagego polobadu wali po tiwai eyu pao. Tama nago gedu haluasa po Godibolo obaso, agai ena dwagi yai ilimainao,” te Isip tuni bidigo augwali sibolo te po wai.

33 Tama Isip dabe augwaligo te Israel dabe augwaligo te Isip tǫ tagalama, polo pomainogo bomonama yai. Augwaligo te po wai, “Dagego da taga peyu, polo pesiąyu da, teda da tigidali isaibao,” wali.

34 Tama te Israel dabe augwaligo plaua te yis dali begelisiąbadi te pouba muai. Tama augwaligo te pou name ugwago haluama, tama augwaligo nagede tolasa pai. 35 Tama Israel hani augwaligo te Isip we bidibolo te gol, me silva, me ugwa dabe, te nai hanalu wai, Mosesgo te po augwalibolo polobadu wai. 36 Tama Genuai Bidigo te Israel hani augwalibolo genuai nogi te Isip we bidi augwaligo gedude mawai. Tama te Isip dabe augwaligo te Israel hanigo sainogo homu yali nai augwalibolo mawai. Tame te kolesagade Israel hanigo te Isip dabego nai umabo sai. * Sai 3:21-22

37 Te Israel bage augwali hogolama peyu, te Rameses hanu tagalama, tama te Sukot hanuba pai. Te sogo te Israel hani bidi te bidi sese hauwa 600,000 mu pali, tiali goli augwaligo te we wai dabe dali nedebeo. 38 Tama te Israel hani isiąwai we bidi hani hauwa, me te bulmakau, me sipsip, me meme dabe hauwa, te augwali dali pai. 39 Tama augwaligo bret te yis meni yai plaua te Isipdu sela asali tedali ulai. Augwaligo te yis te plaua dali musiąwai, magi basowe, te Isip dabego augwali polo mu sela sąyu, tama augwaligo te nai sisi yabo sogo meni yai.

40 Tama te Israel hani augwali Isip tǫde kibu be bidi sese hauwa 430 mu bidai. * Gag 15:13; Gal 3:17 41 Tama te sogo mu dolo augwali Isip tǫde bidali kibu be bidi sese hauwa 430 mu bidama, tama Genuai Bidigo Israel hani dabe we bidi augwaligo te Isip tǫ taga soai. 42 Tama te sogo hulide naga Genuai Bidigo te Israel hani bugagia tonaluai, tama augwali te Isipde selama odasa asai. Tama tibaso, tigidali sogo nosali kibu bede augwali te sogo hulide odasa asali sogo Genuai Bidi homugo koneama, tama bugagia tonaluyu, augwaligo agabolo lotu po wabo dao.

43 Genuai Bidigo Moses de Aron sibolo te po wai, “Odao, te Pasova nai dabego bomai po e dao. Te Israel hani isiąwai gasa bulu we bidigo te nai tugio. 44-45 Te augwali dage dali pęwadage sogo naga bidibaso da, ma augwali mone sabo sę eyu da, teda augwaligo te nai sela tugio. Tiali goli, dagego abelama te olo sę ebo bidi pedelali, tama dagego augwali tigiwali togwali, te bage augwaligo te nai tubo usu dao.”

46 “Te we bidi augwaligo te mi te nai sisi yali bede naga tuao. Augwaligo te nai meba te buluba sela pigio. Tama me te augwaligo te kibu sipsip dili dabe togogio. * Nam 9:12; Jon 19:36 47 Tama tigidali Israel hani augwaligo te nai tubo sę ilao. 48 Tiali goli, tigiwali togosiąwai bidigo te nai tugio. Tama gasa bulu bidi hani me deli te dagego bulu tǫba bidagasai yai baso da, tama te bidi agai te nai sela tuainogo yai, te Genuai Bidi Yawe eno dage tagalama ela soali sogo tubo nai, tama dagego te bidi aga bidi tigidali, me te mena bidi aga dali bidibo bidi dabe, te tigidali augwali tigiwali togwa. Tama nosali te bidi aga hani dali augwaligo te nai tumainao. Tama te bidi aga te dagego bidi me deli tiwai bidaibao. 49 Tama te gasa bidi hani te Israel hani augwali dali bidagasali bagego te Israel hanigo Pasova nai bomai po tiwai naga wali peyu, dage dali bidao,” wali.

50 Tama te Israel hani augwaligo te Genuai Bidigo te Moses de Aron sibolo po wali gilama te tiwai sę yai. 51 Tama te sogo naga Genuai Bidigo te Israel hani tigidali Isipde selama, tama augwali odasa asai.