1 Te Laban aga buluba ma geasa pelama, tama Jekop aga page buluba painu eyu, ma pali. Tama aga pidubadi, tama Godigo ensel mobo bidi dabe te sunumide aga pageba pedelai. 2 Agai augwali sulama, tama agai te po wai, “Te augwali Godigo ami bidi hani dao.” Tialima, agai te bulu nogi Mahanaim poai. * Te Hibru pogo te nogi Mahanaim te page elalubao, te “Hani si,” magi baso meni, te Jekopgo aga we bidi hani dali, te ensel mobo bidi hani, te si subaso, agai te bulu te nogi poali.

3 Tama Jekopgo bidi meba te polasa te Seir tǫ te Idom hanu tǫ pedaiba te aga ama Iso bidibo digi te po sela pomainogo tagala palai. 4 Tama agai augwalibolo te po sela pomainu ola mani, “Ena Jekop dao, ena te nago sę bidi dao. Eno ama Iso, nage da eno genuai bidi dao, te ena Laban dali osogo bidigi pai goli, tama ena bobage sogo tede bidama, tama megi ena ma asainogo ebao. 5 Eno hani sibi te hauwa elalubo, te kibu bulmakau, me donki, me sipsip, me meme, me sę bidi dabe, me sę ebo we dabe, te elalubao. Tama eno te po nageba ola tolobao, eno genuai bidi, tama eno homugo nago wiegi yai homu ena dali emainogo ebao, tama nago ena ma asomainu usu da po omainogo obao,” agai te po ola tolali.

6 Nosali te po sela pali bidi dabe augwali ma begasa asiyu, Jekopbolo te po wagasali, “Da te nago ama Iso bidibo digi sabolalio, tama agai nage te sunumi tiąba asainu sisi iduali. Aga dali asabo bidi dabe te hauwa, 400 bidi elaluali,” wali.

7 Jekopgo te po odama, tama aga wi genuai mu elama, tama aga homu sęgę elama, tama homu hauwa yali. Tialima, agai te aga we bidi hani bugulali, te sipsip hani dabe, me te meme, me bulmakau, me kamel dali, tama hani si pedelali. 8 Agai te tiwai homu yali, ‘Te Iso asiyu, tama te polali hani dali wąbi hwįnama, tama augwali dolobaso da, teda te nosali yali hani te sana pelama, wi paibao,’ te homu yai. 9 Tama Jekopgo gedu haluasa po wali, “Te eno wąį Abrahamgo God, te nage eno aya Aisakgo God, nago eno po odao! O Yawe, nago enabolo te tiwai po wai, ‘Nage te naga tǫba ma peyu, tama naga deli kaneme bidibo digi pao,’ wali, ‘tama eno nage bugagia tonaluaibao, wai dao. 10 Ena nago sę bidi da. Ena wiegi yai bidi meni goli, tiali goli nago wiegi yai kolesagago ena olo tau sali, tama nago ena dali homugo kęą pai kolesaga eyu, tama enade wiegi yai sę mu yai. Te polobadu ena te wę Jordan nogeali sogo, te eno nogode magi nai me elalubeo. Eno peyu tolasa pabo dono naga elaluali. Tiali goli, megi ena te e hani si dali ma asobao. 11 Eno nageba gedu haluasa po obao, nago ena tau selama, te eno ama Isogo bomo aiyaba tamunao. Magi baso meni, ena wi ebo, tiyu agai da dali wąbi hwįagasiyu, tama da tigidali silama, te we wai dabe dali silaibao. 12 Ena tau mao. Nago naga dąų wali bomai po te ma homugo koneao. Polobadu nago te po wali, ‘Te eno nage bugagia tonaluaibao,’ wai. ‘Tama eno te nago wąį te wai dabe hauwa menama, tama te bidi dabego augwali nedebo usu me egobeo. Te augwali te węde te masigi sane tiwai pedelaibao,’ nago te po wali,” Jekopgo te po wai. * Gag 22:17

13 Jekop te hulide bididu, tama aga ama Iso homu nagame iliyu maiabo nai te kibu dabe meba dodola muai. 14 Agai e tama tiwai sa muani, 200 meme so kibu, te omai kibu bidi sese deli te 20, te 200 sipsip so, me te omai kibu bidi sese deli 20, 15 te 30 kamel so augwa wai elalubadi, te 40 bulmakau so, te omai bulmakau nogo si, te donki 20 so kibu, te omai kibu donki nogo si dao. 16 Agai te kibu dabe tonalubo sę bidi dabe deli deli nidigili pali, tama augwalibolo agai te po wali, “Dage polasa peyu, ena nosali ilao. Tama me kibu hani te gasa kibu hani pabo digibulu bidaluao,” wali. 17 Tama Jekopgo te polalubo sę bidibolo te po wali, “Te eno ama Isogo te nage sunumide sulama, tama nagebolo hanalu, ‘Nage dego sę bidi dawe? Tama nage mena sobawe? Tama e te kibu hani dabe dego dawe?’ te po hanalu waibao. 18 Teda nago e tiwai po wei ponao, ‘Te e kibu hani dabe te nago sę bidi Jekopgo dao,’ te po wao. ‘Genuai bidi, te Jekopgo te olo maiabo dwagi yai nai te nageba tagala palai. Tama Jekop digi aga te nosali asobao,’ nago te po Isobolo wao,” Jekopgo te po wai. 19 Tama Jekopgo te po naga te tomo me sę bidibolo wali, tama te sela wali sę bidibolo me, tama te kibu dabe tonalubo tigidali sę bidi dabebolo te po naga wai. Agai te po wali, “Te dagego aga subo sogo, te po naga agabolo wao. 20 Tama dagego te tiwai po ma naga weyu yao, ‘Awe, nago sę bidi Jekop te da tudibadu nosali asobao,’ po waiyąo.” Jekopgo te tiwai homu yai, ‘Eno te ena ama homu nagame ilibo nai te polasa tagala palaibao,’ te homu yali, ‘tama eno aga gesabi subo side, teda agai eno aga dali polobadu yali sę te agai homu gegeda palaibao,’ te homu yali. 21 Agai te maiabo nai dabe polasa tagala palama, tama aga bidali pesagede te sogo hulide bidai.

22 Tama te sogo hulide Jekop hogodama, tama aga we si selama, tama augwali sigo sę ebo we si me sobadi, te aga wai dabe nogo si olama, sągągo deli selama, tama agai te wę Jabok nogelama pali. 23 Agai augwali tagala palama, tama agai aga doado bage me tigidali sela pela silai. 24 Tama agaduba deli naga bididuai. Tialima, hulide bidi me deli pedelama, tama aga dali nogogo pelegebo hwįdubadi, be posobo siba usu nani. 25 Augwali si tama tiwai hwįdubadi, tama te bidigo koneani, agai aga aiyaba elalugobeo, te homu yai. Tama agai Jekop te sili dili dali, te tudi dili dali si ununani si tede elali. Tama te sili dili ununani te guda pali. Te augwali si usu siyu hwįdubadi, 26 tama te bidigo Jekopbolo te po wai, “Nago ena tagala palama, ena paio,” wai. “Te pąde be posainogo ebao,” wali.

Tiali goli, Jekopgo agabolo te po wai, “Eno nage me tagala palogobeo. Nago te dwagi yai tau sabo po enabolo mayu bolo yao.” 27 Tama te bidigo Jekopbolo hanalu wali, “Nago nogi de dawe?” Tama Jekop po wei ponani, “Ena nogi te Jekop dao.” 28 Tialima, te bidigo te po wai, “Megi da, nago nogi te Jekop ma wagobeo. Nago te God dali hwįani, tama bidi dali me hwįai, tama nago nogi ugwaba sali. † Te Hibru pode te nogi Israel te page elalubao, te “Agai God dali usu siyu hwįbo dao,” te wabo. Tialima, nago gesi nogi te Israel dao.” * Gag 35:10 29 Tama Jekopgo te po wai, “Ae, nago nogi po enabolo wao,” te po wai. Tiali goli, agai te po wei ponani, “Magi baso nago enabolo eno nogi po hanalubawe?” Tama agai Jekopbolo te aga dali dwagi yai sę pedelabo po mawai.

30 Tama nosali aga noma sobaso, Jekopgo te po wai, “Eno God sualio, tiali goli ena me isibeo.” Tama tibaso, agai te bulu nogi Peniel poai. ‡ Te Hibru pode te nogi Peniel te page elalubao, te “Godigo gesabidi,” te wabo dao.

31 Te giliga pedelama, tama Jekopgo te Peniel bulu taga soai. Tiali goli, aga dolo bugagia me soabeo, aga te haiagalu ela soali, magi baso meni, te sili si wadolali te guda palio. 32 Tama te sogo dąį elama, megi tama bidada asobo sogo, te Israel dabe augwaligo te kibu sipsip, meme, bulmakau, te bage sili dilide daganalubo mi te me tubeo, magi baso meni, polobadu te bidigo Jekop te sili dilide elali dąį elama, tama tiai dao.