13
Dago te Godigo da dali dwagi yai homu ilibo kolesaga iyąo
Dage Godigo po wali pabo we bidi, sesemane sogo dagego duga hasi duga ama dede dali dwagi yai homu eyu godolo iduao. Dagego te duga beba digibulu asobo bidi dabe augwali tau sabo homu ebo te dagego me gegeda pigio. Duga koneani, polobadu bidi mebago te tiwai elama, tama augwaligo te ensel mobo bidi meba te augwa beba odasa pelama, augwali gesali. Augwaligo te ensel bidi asobo me konebeo. Augwaligo te bidi naga da te homu yai dao. * Gag 18:1-8; 19:1-3 Dagego te ama dede augwaligo Krais wali pobaso te boi bidi dabe augwaligo augwali meba kalabus beba muani. Tama te kalabuside bidibo ama dabe dagego homugo konealuao, augwali tau sao, te duga digi te kalabuside augwali dali bidibo tiwai ebao. Tama te bidi dabe augwali tigide sęgę sabo te dagego homugo koneao. Dagego koneani, te duga me tigi elalubo dao.
Tama te we sabo te wiegi yai kolesaga dao, te we bidi tigidaligo te homu yao. Dagego e tama yao, te bidi dali aga we dali augwa hasi te homugo kęą pai kolesaga naga yao. Dagego koneao, nosali Godigo te penani yali we bidi me, te we sabo kolesaga dolali we bidi dali, augwalibolo te wei ponabo te dwai dene genuai sabo te elalubao.
Dagego te monede pesą eyu godolo ebo kolesaga wali me pigio. Te dagego tolalubo naide te dagego e tiwai homu yao, “Te wiegi yai dao. Te ena usu yaibao.” Magi baso meni, Godigo digi te po walio, “Te ena nage munu me tagalogobeo. Te eno nage tudiba munu me mugobeo.” * Bom 31:6, 8; Jos 1:5 Tama Godigo te po obaso, dago dena homu bomonama tama dago e tiwai po waiyąo,
“Genuai Bidi da ena tau sabo bidi dao. Te ena wi
me egobeo.
Te bidi dabe augwaligo ena dali ebo dwai kolesaga
tigidaligo ena dologowe? Menio!” * Tib 118:6
Dagego duga tobolu bidi dabego yali kolesaga homugo bugagia koneao, polobadu augwaligo Godigo po dagebolo pusai. Dagego augwali bilali kolesaga dali, augwali isali kolesaga dali si homugo koneama, tama augwaligo konealubo po dąų weyu Godiba tią pali kolesaga te wali pao. Jisas Krais aga munu me hasegelegobeo. Polobadu aga hasegelebeo, megi aga hasegelebo meni, nosali aga munu me hasegelegobeo. Aga ebo kolesaga deli naga me ela piduaibao. Tama tibaso, te gasa haniani haniani ola mani pogo dagego homu kegeyu, tama dagego Godigo tų wali pabo tagalu gogologimio. Te dago homugo te Godigo da olo tau siyu mabo kolesagade dago bomo sai yai baso da, te wiegi yai dao. Dago homugo te haniani nai tubode bomai po wali pabode te bomo sainogo ebo usu egobeo. Te kolesagade bilali we bidi augwali te kolesagago tau me sabeo.
E tiwai ofa mabode Godigo godolo ebo po
10 Dago ofa ebo alta sai tiwai elalubao, tama tede dago Godigo nogi ugwaba sabo po wabogo te ofa tiwai agabolo mabo dao. Tama te Juda dabego pris bidi dabe augwaligo augwa lotu wabo te ugwa bede sę eyu, augwaligo te dago ofa tiwai ebo kolesagade sę meni. 11 Tama tigidali kibu bede te Juda dabego polalubo tobolu pris bidigo te sipsip dabe me te bulmakau me te kaneme selama, tama agai te Tedali Gasagi Yai Be Habu Mu tomoba pelama, te we bidigo sęgę sela sąyu ofa ilai. Tiali goli te kibu dabego tigi da, te augwaligo te augwa bidibo digi bulu badu sia nogonama, siaba ulai dao. * Prs 16:27 12 Tama tibaso, Jisas me te obo bagulali hanu bulu badu te aga dene tolali, te agai kanemego digi te we bidigo sęgę sela sąyu, tama augwali Godigo gedude wiegi yai mu pedalomainogo ilali dao. 13 Tama tibaso, da me te pesage nigali te bulu badu agaba pelama, tama dago agai aga isibode tolali hale tiwai te dago me tolao. 14 Dago koneani, te e tǫde dago te gamonabo hanu me deli dago me elalubo menio. Tiali goli dago te nosali pedalabo hanu godolo mu ebo homu ebo dao. 15 Tama tibaso, Jisasgo nogide Godibolo wiegi yai homu pemene elama, tama dago te aga nogi ugwaba sabo kolesaga te sesemane sogo agabolo mayu, te ofa tiwai yao. Awe, dago pedauwaligo aga dago Genuai Bidi dao te po wabogo dago Godibolo dena ofa tiwai mabo dao. 16 Tama dagego duga hasi te we bidi augwalibolo wiegi yai kolesaga ebo te dagego homugo gegeda pelamuo. Tama tiyu dagede elalubo doado bage, te dagego te nai meni yai we bidiba dobayu, te augwali tau sao. Godigo te tiwai ofa ebode dwagi yai homu mu ebo dao.
17 Te duga tobolu bidi dabe augwaligo dage tau sabo homu elama, tama augwaligo dage sesemane sogo tonalubo dao. Magi baso meni, nosali augwaligo digi yali sę po tigidali te Godibolo pusaibao. Tama dagego augwaligo ola mabo po wali pelama, tama augwali dologode bidao. Te dagego tama tibaso da, teda augwali wiegi yai homu pemene elama, tama augwa sę tulama sę eyu, tama augwali homu sęgę me egobeo. Tialima augwaligo dage tonaluabo te homu sęgę ebaso da, teda te tebogo te dage tau me sogobeo.
18 Dagego gedu haluasa po Godigo da tau somainogo weduao. Dago homugo koneani, te da God gedude dolo bidibao. Tama da tigidali sęde dolo bilabo homu ebo dao. 19 Tama eno homugo godolo mu ebao, te dagego gedu haluasa po Godibolo olama ena tau somainogo yao, tama ena dage bidibo madi polo tamadi asomainogo yao.
20-21 God aga te da we bidi homu nagame ilibo page bidi elalubao. Agai te dago Genuai Bidi Jisas te gų pagede ma hodolama, tama aga ma bidimainu ilali. Hasia Jisasgo aga digi bidibo ula olo mayu, tama Godibolo ofa tiwai mani, te da we bidi tau somainogo yali. Tama tebogo agai te Godigo te we bidi tau sabo dąų wali gamonabo po te mu dąų walali. Tama tiyu, aga te da sipsip tiwai bidibo we bidi tonalubo te polalubo bidi pedalai dao. Tama eno homugo te God agai te tigidali wiegi yai kolesaga dagebolo mao, te dagego agai homu kolesaga wali pabo usu ilimainogo yao. Tama eno homugo me da tomode agai tigidali te aga digi godolo yabo kolesaga tigidali pedalomainogo yao, te Jisas Kraisgo nogide tama tiao. Aga genuai nogi te sesemane bidada pabo sogo elalua peyu, elalua paibao, te eno homugo. Mu dao.
Po silagasu wabo po
22 Ama dedeo, eno po bomo elama dagebolo obao, dagego eno e mobo mabo wali pode dwagi yai homu eyu, odao, te eno dagego homu dąų ilabo po e pas tomode wai dao. Eno dagebolo e asęna tolobo pas te pęwadage tiwai naga dao. 23 Eno homugo duga koneao, augwaligo te dago ama Timoti olo tagala palali, tama aga te kalabuside me bidigobeo. Tama aga enaba polo pedalobaso da, teda ena dali da si talua si pelama dage suagasaibao.
24 Te dagego dago te siade da wali po te duga tobolu bidi tigidalibolo me, te tigidali Godigo we bidiba dali te po wao. Te ede bidibo Itali hani Godigo we bidi augwaligo te siade da wabo po te dagebolo tolai dao.
25 Te eno homugo Godigo olo tau siyu mabo wiegi yai kolesaga te dage tigidali dali bidao.

*13:2: Gag 18:1-8; 19:1-3

*13:5: Bom 31:6, 8; Jos 1:5

*13:6: Tib 118:6

*13:11: Prs 16:27