Godigo genuai bodolu muani, te Godigo te we bidi dabego sęgę sela sąwainogo
16
(Dąį 16)
Hetprisgo te we bidi dabego sęgę sela sąbo ofa emainao
Polobadu Arongo ogwa sigo te Genuai Bidiba ofa igi pali te agai augwali sibolo te ofa yabo po wasiąbadi, tibaso augwali si isalio. Te tilama, nosali Genuai Bidigo Mosesbolo te tiwai po wali, “Nago naga ama Aronbolo walao, sesemane sogo aga te Tedali Gasagi Yai Mu Be Habu te genuai dąį togwali tudi badu tomoba me pelamu dao. Tialima, ena digi dąį ilibo sogo, aga tomoba pagameo. Magi baso meni, ena te pǫ me deli tomode bidama, te ena hanilagasu, te sęgę sela sąbo Dąų Wali Bomai Po Elalubo Halobage daiba pedalubo dao. Te aga olo dali te be habu tomoba pobaso da, teda aga isaibao. * Hib 6:19 Aron te Tedali Gasagi Yai Mu Be Habu tomoba pabo sogo, agai e tama timainao. Hasia bolo agai te sęgę sela sąbo ofa yabo ogwa bidi bulmakau omai me deli sela pao, te agai omai kibu sipsip me deli te isiba tigidali ulama, dela silabo ofa yabo te me sela pao,” wali. * Hib 9:7
“Tama agai prisgo te tobage gasa ugwa gudaibao. Agai te bobage aiyaba tagalalubo ugwa gudama, te pęwadage trausis ugwa me muani, te ugwa nami agai haligade kukulu tiwai kekelama, te nami ugwa me deli te toboludu madi tiwai munama, kekaluao. Te tedela ugwa dabe naga muao. Ena digi te prisgo gudabo ugwa dabe dąį ilali. Tama tibaso, Aron aga ąį bolo paluama, nosali te ugwa doado bage mubaso usu dao,” wali.
“Te Israel we bidi augwaligo te sęgę sela sąyabo meme omai si sobadi, te omai sipsip deli isiba tigidali ulabo me selama, te Aronbolo mao. Tama Arongo te omai bulmakau aga digi sela asali te aga sęgę me aga we wai pulubago sęgę dali sela sąyabo ofa yainogo eyu, tama te eno geduba osogo muao,” te po wali. “Nosali agai te meme omai si selama, te si selasa pelama, te ena Genuai Bidi eno sel Ugwa Be sunumiba dolagasobaso, eno sueibao,” wali. “Te agai masigi si sao, me masigi deli e tiwai po elalueibao, ‘Te Genuai Bidigo da,’ te gasa masigide e tiwai po elalueibao, ‘Te Asaselgo dao.’ * Te po page Hibru pogo kuna page konebeo. Bidi mebago homugo te Asasel te Satango nogi ma dwai haubo mobo bidigo nogi da, te homu yai. Mebago homugo te dwai haubo bidi bidibo wa pai pesage me deli da homu elama, te mebago homugo te page e tiwai elalubo homu yali, “Te gasa pedai me deliba tagala palobo pesage dao,” wali. Te masigi si agai geme dualama, te deli deli guda selama, te ena Genuai Bidigo meme me deli dąį iliyu, te me deli Asasel dąį ilao,” te po wai dao. “Tama Arongo enabolo te dąį ilali meme selama, te we bidi dabego sęgę sela sąbo ofa tiwai yao. 10 Tialima, agai te Asaselba dąį ilali meme me eligio. Menio. Arongo eno geduba sesao. Tama te bidi meni yai buluba agai te Asaselbolo tagala palao, tama tiyu da, te memego te we bidi augwaligo sęgę sela pabo tiwai yaibao,” wali.
11 “Arongo te sęgę sela sąbo ofa yabo homu ebo sogo, agai te kolesaga wali pao. Hasia bolo agai te omai bulmakau seselama, te ela munama, te aga sęgę me aga we wai pulubago sęgę sela sąbo ofa yao,” po wali. 12-13 “Nosali agai ain sospen me deli selama, te altaba pelama, te sia dage sospenba bulama, te Tedali Gasagi Yai Mu Be Habuba selasa pao. Te wiegi yai denami ebo pauda agai nogo sigo sabua selama, te sela pelama, te sospende elalubo siaba mugi pao, te eno sueibao. Te paudago hanogo te sęgę sela sąbo pesage te Dąų Wali Bomai Po Elalubo Halobage mesega saibao. Te tiwai ebaso da, Arongo te sęgę sela sąbo pesage sugobeo. Tiyu, agai subaso, te eno aga ela muidali weyu tama tiaibao. 14 Tama agai te bulmakau kaneme me badu selama, te kaneme nogoba holama, te kaneme te sęgę sela sąbo pesage daiba ugwadu sąyao. Agai te kaneme nogo danide ma selama, te kaneme nogo a naga si sogo te Dąų Wali Bomai Po Halobage gesabidiba sąyao,” po wali.
15 “Nosali agai te we bidi dabego sęgę sela sąbo ofa yabo kibu meme ela muao. Tama agai te meme kaneme te Ugwa Be Tedali Gasagi Yai Mu Be Habu tomoba sela pelama, te dwasianu me badu te sęgę sela sąbo pesageba sąyao. Te agai dwasianu meba te Dąų Wali Bomai Po Elalubo Halobage gesabidiba sąyao. Agai te bulmakau kanemego yali sę tiwai yao,” wai. * Hib 9:12 16 “Te kolesagade agai te Tedali Gasagi Yai Mu Be Habu eno gedude wiegi yai pedelaibao. Magi baso meni, te Israel we bidigo hagoma eyu, eno po sela sąnama, te dwai sę hauwa eyu, te kolesagago te Tedali Gasagi Yai Mu Be Habu meda ilibo dao. Eno sel Ugwa Be te Israel dabe tomode elaluyu, te augwaligo dwai kolesagago te sel Ugwa Be eno gedude meda pedalubao. Tibaso, Arongo te kaneme dwasianu selama, te tobage sę te sel Ugwa Beba me yao, te agai te Tedali Gasagi Yai Mu Be Habude yali sę tiwai elama, te sel Ugwa Be wiegi yai ma pedelaibao. 17 Arongo aga sęgę dali, aga we wai pulubago sęgę dali sela sąbo ofa eyu, te Israel we bidi tigidaligo sęgę sela sąbo ofa yao. Aga te Tedali Gasagi Yai Mu Be Habu mu tomoba pabo sogo, te bidi me deli eno sel Ugwa Be tomoba me pisąbadi, te Aron buluba ma dią soaboba usu naibao. Te habu mu dao,” wali. 18-19 “Nosali agai te Tedali Gasagi Yai Mu Be Habu tagalama, buluba dią solama, te isiba tigidali domainu ulubo ofa ebo altaba pao. Te Israel dabego dwai sęgo te alta eno gedude meda ilali. Tibaso, Arongo te alta wiegi yai pedalumainu ilao. Agai te bulmakau kaneme dwasianu siyu, te meme kaneme siyu elama, te alta bogo me si me si elalubo madi te kom me si me side pibili pao. Tama agai nogo dani te kanemeba munama, te kaneme a naga me si sogo te altaba sąyao. Te kolesagade agai te alta wiegi yai pedalumainu ilaibao, tama te alta eno sę delide naga elalumainu sula tagalao,” te po wai dao.
Memego te Israel augwaligo sęgę selasa pabo po
20 Genuai Bidigo po e tiwai ma wali, “Te Arongo te Tedali Gasagi Yai Mu Be Habude yali sę tigidali badi, te sel Ugwa Be badu yali sę tigidali mu sia somainu elama, te alta wiegi yai pedalumainu yai baso da, teda agai te meme, te Asaselba sa muani meme, te enabolo selasa asao,” po wali. 21 “Te meme tede bidibadi te Arongo nogo si te meme toboluba munama, Arongo te Israel we bidi dabego yali dwai sę, me dwai kolesaga tigidali, me hagoma kolesaga hanilama pusao. Te kolesagade agai te sęgę tigidali te meme toboluba mueibao. Nosali te meme agai te sa muani bidi me deliba menama, tama te bidigo te tǫ wa pai buluba te meme kibu sela pelama, teba tagaligi paibao. 22 Tama te memego te Israel dabe augwaligo sęgę tigidali tolama, te bidi meni yai habu me deliba tagaligi pabo dao,” te po wai dao.
23 “Te sę silama da, teda Aron eno sel Ugwa Be tomoba pelama, tama aga te Tedali Gasagi Yai Mu Be Habu tomoba painogo gudali ugwa dabe peda mugi pao. Tama agai te ugwa te sel Ugwa Be tomode elalumainogo yao. * Ese 44:19 24 Tama aga te sel Ugwa Be obo tomoba ąį paugi pao, tama aga te sel Ugwa Be tomoba ma pelama, te ugwa gudama, te hetprisgo gudubo ugwa au yao. Nosali aga te buluba teda solama, te isigo tigidali dela silibo ofa si yao, me ofa agade eyu, me te tigidali we bidide yao. Te ofago aga sęgę sela sąbo ofa eyu, te we bidi augwaligo sęgę sela sąbo ofa me yao,” te po wali. 25 “Te agai augwaligo sęgę sela sąbo ofa yali kibu ili te siaba ulao. 26 Te meme kibu te tǫ wa pai buluba sela pelama, tagaligi pali bidi, agai ugwa ąį tedelama, te aga tigi bolo ąį pauwao, tama nosali aga te bidibo pesage tomoba ma asomainao,” te po wai dao. 27 “Tama augwaligo te sęgę sela sąyabo ofa yabo kibu bulmakau me meme sesao, te hasia bolo prisgo te kibu sigo kaneme te Tedali Gasagi Yai Mu Be Habu tomoba sela pelama, te aga sęgę sela sąyu, te we bidi dabego sęgę me sela sąmainu tama tiali. Augwaligo te kibu si te bidibo pesage bulu badu sela pelama, te isiba ulama, te sia keli naga elalumainogo yao. Te bidi me deligo te kibu wali me mi me haliga di te isiba ulama, te mu deli silimainogo yaibao. * Hib 13:11 28 Nosali te bidigo ugwa ąį tedelama, te aga tigi me ąį paluama, te aga bidibo pesageba ma asomainao,” wai dao.
Te Godigo te we bidi augwaligo sęgę sela sąbo genuai side yabo kolesaga po
29 Genuai Bidigo po e tiwai ma wali, “Dagego te bomai po sesemane sogo wali piduao. Te polua a naga olama, me badu nogo si wabo polua, te dei 10de, dage tigidali Israel dali te gasa hani dage dali bidibo we bidi, dage te nai tubo habu selama, te wiegi yai pemene ebo sę me habu selao, tama dagego sę tagalama, te dage toma tuao. 30 Magi baso meni, te side naga te prisgo dagego sęgę sela sąbo ofa yaibao, tama dage eno gedude wiegi yai ma pedelaibao. 31 Te side te eno genuai side dolo dao. Te dagego tigidali pemene ebo sę te side habu selama, te dage toma nao. Dagego sę munu me elamuo. Te habu mu dao. Te bomai po dagego sesemane sogo wali piduao. 32 Mena prisgo dage te duga ayago yali sę sabo dąį ilali bidi, agai naga te we bidi dabego sęgę sela sąbo sę emainu yao. Hasia bolo hetprisgo gudubo tedela ugwa te aga tigide muao. 33 Te nosali agai te sęgę sela sąbo ofa ebaso da, teda te Tedali Gasagi Yai Mu Be Habu tigidali badu, me sel Ugwa Be me, alta me, te pris dabe me, te Israel we bidi tigidali, te eno gedude wiegi yai ma pedalumainogo yaibao,” te po wai dao. 34 “Augwaligo te bomai po sesemane sesemane sogo wali pidubadi geao. Hetprisgo te tobage ofa te tigidali kibu bede deli sogo yao, te Israel we bidigo sęgę sela sąyu tiao, te augwali eno gedude wiegi yai pedalumainu ebao,” wali.
Genuai Bidigo te po Mosesbolo mobaso, te po tigidali Mosesgo wali pai dao. * Prs 23:26-32; Nam 29:7-11

*16:2: Hib 6:19

*16:3: Hib 9:7

*16:8: Te po page Hibru pogo kuna page konebeo. Bidi mebago homugo te Asasel te Satango nogi ma dwai haubo mobo bidigo nogi da, te homu yai. Mebago homugo te dwai haubo bidi bidibo wa pai pesage me deli da homu elama, te mebago homugo te page e tiwai elalubo homu yali, “Te gasa pedai me deliba tagala palobo pesage dao,” wali.

*16:15: Hib 9:12

*16:23: Ese 44:19

*16:27: Hib 13:11

*16:34: Prs 23:26-32; Nam 29:7-11