1 Tama Genuai Bidigo te we bidibolo Mosesgo te po wao wali, “ ‘Te 7 wabo poluago dei namba wande dage sisinama lotu weyu, tama dage te sę me elamuo. Te sogo da te biugel eliyu, wiegi yai homu ebo genuai sogo dao. 2 Tama me dagego te isigo mu dela silabo ofa Genuai Bidiba maiabo sogo dao. Agai te tobage ofa agai godolo ebo dao. Dagego te kau kibu omai ogwa bidi kibu deli, me sipsip kibu omai deli, me 7 sipsip kibu gǫų, te kibu be deli elama, augwaligo tigide keni dabego dolisąwai selama, ofa iyąo. 3 Tama dagego te wit ulubo ofa te ofa dabe dali yao. Dagego te wiegi yai plaua augwaligo witgo nigai, tama augwaligo oliv wel dali taluai selama, te ofa yao. Te kau kibu omai dali te 3 kilo plaua dali ofa yao, tama sipsip kibu omai dali te kilo si yai plaua ofa yao. 4 Tama sipsip gǫų dabe deli deli dali te plaua kilo deli dali ofa yao. 5 Tama me ma, dagego meme kibu omai te sęgę sela sąyabo ofa yao. Tama te sę ebogo te we bidi Genuai Bidigo gedude wiegi yai pedalaibao. 6 Dagego te ofa dabe yao, tama me dagego te isigo dela silibo ofa me eyu, me te wit ulubo ofa me eyu yao, te dagego tigidali poluago hasia wabo deide ebo tiwai yao. Tama me tigidali sogo yabo ofa me yao. Te da, te isigo sese dela silibo ofa, me te wit ulubo ofa, me te wain gelebo ofa dao. Genuai Bidigo te tobage ofa dabe godolo ebo dao, te wiegi yai denami ebo ofa,’ augwalibolo te po wao,” te po wai.

7 Tama Genuai Bidigo Mosesbolo te we bidibolo te po wao po wali, “ ‘Dage te 7 poluago namba 10 deide dage sisinagaselama, lotu wagasao. Tama dage nai dabe habu selama, tama dagego duga digi wiegi yai homu pemene ebo sę elamuo. Tama me dage te sogo sę me elamuo. 8 Tialima, dagego te kau kibu omai ogwa bidi kau kibu, me omai sipsip kibu, me 7 sipsip kibu gǫų dabe sao, te kibu be deli yai kibu sipsip dabe. Te hasa tigidali augwali tigide keni dabe mu meni yai sao. Tama dagego sese tama Genuai Bidibolo ofa yao. Te isigo sese dela silibo ofa tiwai ulao. Tama Genuai Bidigo te tobage ofa denami godolo mu yaibao. 9 Tama me dagego te wit ulubo ofa, me te isigo sese dela silibo ofa dali tama ulao. Te witgo wiegi yai plaua selama, tama oliv wel dali taluama, tama ofa yao. Dagego plaua kilo sela te kau kibu omai dali ofa yao, 10 me te sipsip kibu omai dali te plaua kilo si ofa yao, me te sipsip kibu gǫų deli deli dali te plaua kilo deli ofa yao. 11 Tama me ma, dagego te meme kibu omai te we bidigo sęgę sela sąbo ofa tiwai yao, te Genuai Bidigo gedude wiegi yai pedalabo ofa eyu, me te tigidali sogo yabo ofa me tama yao. Te da, te isigo sese dela silibo ofa, me te wit ulubo ofa, me te wain ąį gelebo ofa dao.’ Augwalibolo te po wao,” Genuai Bidigo te po wai. *Prs 16:29-34

12 Tialima, Genuai Bidigo Mosesbolo te we bidibolo te po walao po wali, “ ‘Dage te dei 15, te 7 poluade sisinama, lotu po omainu yao. Dagego a naga olama, me badu nogo si sogo te Genuai Bidiba genuai lotu wabo sogo bodolu muao. Tama dagego te sogo dabe dage sę me elamuo. 13 Te dei namba wan te 7 lotu wabo bodolu muani, te sogo dagego Genuai Bidiba ofa yao. Agai te tobage ofa ebo denami agai godolo ebo dao. Dagego te kau kibu omai ogwa bidi kibu te 13 tama ofa yao, me te sipsip kibu omai si, me 14 sipsip kibu gǫų te kibu be deli yai, tama keni dabego augwaligo tigi me dolisąwai sao. Dagego wiegi yai hasa dabe naga sao, te augwali tigide keni dabego me dolisąwai sao. 14 Te wit ulubo ofa, me te plaua ulainogo dagego te plaua oliv wel dali taluao. Te plaua kilo sela te kau kibu omai deli deli dali ofa yao. Tama te sipsip kibu deli deli dali te plaua kilo si te sipsip kibu dali ofa yao. 15 Tama me te plaua kilo deli te deli deli sipsip kibu gǫų dali ofa yao. 16 Tama me dagego te meme kibu deli te sęgę sela sąyabo ofa yao. Dage tigidali sogo yabo ofa me tama iyąo, te da te isigo sese dela silibo ofa dao, me te wit ulubo ofa, me wain gelebo ofa me, tama yao.’ Te po wao,” wali.

17 “ ‘Tama te dei namba 2, teda dagego te kau kibu omai ogwa bidi kibu 12 te ofa yao, tama te sipsip kibu omai si, me te 14 sipsip kibu gǫų te kibu be deli yai tama ofa yao, te augwali te keni dabego tigi me dolisąma yai sao. 18-19 Dagego te ofa dabe dali te dei namba wande yali ofa dali yao, te wit dali, wain ąį dali, te togbage nai me te dei namba 2 ma mayu ofa tama iyąo. Tama me dagego te meme omai me deli te dwai sęgę sela sąbo ofa dali yao.’ ”

20 “ ‘Tama te dei namba 3, tede dagego te 11 kau kibu omai ofa yao, me te sipsip kibu omai si, me te 14 sipsip kibu gǫų te kibu be deli yai, te ofa yao. Te kibu dabe augwali keni dabego dolisąma yai sao, tilama tama ofa yao. 21-22 Dagego te ofa te dage te dei namba wande te yali ofa, te wit, me wain, me meme, te tobage ofa dali tama me ulao. Tama me dagego te meme omai me deligo te dwai sęgę sela sąbo ofa dali yao.’ ”

23 “ ‘Tialima, te dei namba 4, tede dagego te kau kibu nogo si ofa yao, tama te sipsip kibu omai si, me te 14 sipsip kibu omai gǫų te kibu be deli yai, tama augwaligo tigide keni dabego me dolisąwai selama ofa yao. 24-25 Dagego te ofa dabe te gasa ofa dabe dagego te dei namba wande yali ofa dali me ma yao. Tama me dagego te meme omai me deligo te dwai sęgę sela sąbo ofa dali yao.’ ”

26 “ ‘Tama te dei namba 5, tede dagego te kau kibu omai 9; te sipsip kibu omai si, me te sipsip kibu gǫų 14 te kibu be deli elama, tama keni dabego me augwaligo tigi dolisąwai selama, ofa yao. 27-28 Tama dagego te ofa te dagego gasa meba sogo te dei namba wande yali ofa dali tama me yao, te wit, me wain, te tobage ofa me ma yao. Tama me dagego te meme omai me deligo te dwai sęgę sela sąbo ofa dali yao.’ ”

29 “ ‘Te dei namba 6, tede dagego te kau kibu omai 8 ofa yao, me te sipsip kibu omai si, me te sipsip kibu omai gǫų 14, tama te kibu augwali te keni dabego me dolisąwai sao, te kibu be deli yai kibu dabe. 30-31 Tama dagego te ofa dabe dagego te dei namba wande yali ofa dali ma eyu, tama yao. Tama me dagego te meme omai me deligo te dwai sęgę sela sąbo ofa dali yao.’ ”

32 “ ‘Tama te dei namba 7, tede dagego te 7 kau kibu omai ofa yao. Me te sipsip kibu omai si, me te sipsip kibu omai gǫų 14, te kibu be deli yai, te keni dabego augwaligo tigi me dolisąma yai selama, ofa tama yao. 33-34 Tama dagego te ofa te gasa ofa dagego te dei namba wande yali ofa dali tama yao. Tama me dagego te meme omai me deligo te dwai sęgę sela sąbo ofa dali yao.’ ”

35 “ ‘Tama te dei namba 8, tede dage sisinama, lotu wao. Tama te sogo dagego sę me elamu dao. 36 Tama dagego nai ofa Genuai Bidiba yao. Agai te tobage ofa ebo denami godolo ebo dao. Tama te ofade dagego te kau kibu omai deli siyu, me sipsip kibu omai deli siyu, me 7 omai sipsip kibu gǫų, te kibu be deli elama, tama keni dabego augwaligo tigi dabe me dolisąma yai selama, ofa yao. Tama isigo sese dela silabo ofa yao. Te kibu dabe te keni dabego augwaligo tigi dolisąma elama, wiegi yai mu selama, te ofa yao. 37-38 Dagego te kibu dabe ofa dali te dagego te gasa dei namba wande yali ofa dali yao, te wit me, wain me, te sęgę sela sąbo meme omai ofa me, te tama ofa me ma yao.’ ” *Prs 23:16, 34; Bom 16:13-15

39 “ ‘Dagego te isigo dela silibo ofa ebo bomai po wali peyu, me te wit ulubo ofago bomai po, me wain gelebo ofa ebo bomai po, me homu deli ilibo ofa ebo bomai po, te dage bolo agai te genuai lotu wabo sogo agai dagebolo sa muani sogo wali pabo bomai po dao. Dagego te ofa dabe dagego te dąį ilali sogoba usu nabo ofa, me duga homugo ebo ofa me tama yao,’ te po augwalibolo pusao,” Genuai Bidigo te po Mosesbolo wai.

40 Mosesgo te po odama, tama agai te Israel we bidibolo agai te wali po sese tama pusa mani.