14
Genuai Bidigo aga we bidi ma oda saibao
1 Genuai Bidigo aga Israel we bidi hobede ma
elama,
augwali tau siyu, tama augwali aga
we bidi tiwai dąį ma ilaibao.
Tama agai augwali augwa tǫba ma odasa paibao.
Tama gasa hani we bidi augwali dali bidagaselama,
tama augwali te Jekopgo hani dali taluama,
augwali Israel we bidi mu pedelaibao.
2 Awe, Genuai Bidigo te Israel hani isąwai we bidigo
te Israel dabe augwa buluba
ma asomainu tau somainu ilaibao,
te Genuai Bidigo augwalibolo sa muani tǫ dao.
Tama te we bidi dabe te Israel dabego
olo sę ebo we bidi tiwai pedalaibao.
Te bidi hani polobadu Israel dabe kalabus elaluali bage,
megi da augwali Israel dabego
kalabus bidi dabe bidaibao.
Te polobadu te Israel dabe
aiyaba elaluama, augwali dali dwai sę yali.
Tiali goli, megi da, Israel dabego augwali tonaluaibao.
Te bomai tuni bidi tulaluai wabo balia po
3 Genuai Bidigo dage Israel dabego dene me dwai sogo silama, tama dage Israel dabe bugagia bidaibao. Te gasa bagego dage aiyaba elaluama, tama augwaligo dage tonaluai dao. Tama dage bomai sę mu yai dao. Tiali goli, te tigidali sęgę dabe sia saibao. 4-5 Tama Genuai Bidigo te tama tibo si da, dagego te Babilon tuni bidide elalubo po page hanilama waibao. Te hanilabo po da, e tama dao.
“Suao. Bomai tuni bidi polo tulalualio.
Mena tama tibaso te tobage bomai
sę ebo bidi dolaliwe?
Genuai Bidigo tama te we bidi dabe
dwai sę ilali bagego bomo silalio.
Tama te augwali wi mu ilali bidi dolalio.
6 Te tuni bidigo gasa we bidi dali
odolali genuai sębę eyu,
tama dwai sę elama, tama augwali dolai dao.
Tama agai gasa bulu dabe dolobo sę me
hodo me dolobeo.
Agai te sę mu tagalobeo.
7 Tiali goli, megi da, tigidali bulu
tǫ dabe bugagia ma bidaibao.
Tama tigidali we bidi wiegi yai homugo
i weyu, balia po obao.”
8 “Te ni pain de sida si te Lebanon bulu du ni dabe
augwaligo me te wiegi yai homu
yaibao, te Babilon tuni bidi aga isalide.
Augwaligo te po obao, ‘Te da gelagasabo bidi me menio,
agai da ma gelagasogobeo.’ ”
9 “Te isai bidi dabego bulude augwaligo
te homu pemene ebo po wainogo dodalubao,
magi baso meni, te tuni bidi asobao.
Te gų pagego tede bidibo bagebolo te po waibao,
‘Te genuai bidi dage hodaloao.
Me, dage tuni bidi dabe duga tuni bidi sia sai
tagalao.
Dage tigidali aselama, e bidi asobo
suagasiąo, tiąba asiąo,’ waibao.
10 Babilon king, augwali tigidaligo
nage dali te tobage po naga waibao,
‘Tegoba, dago homugo tiai dao,
nago bomogo da tigidaligo bomo
aiyaba elaluai dao homu yai dao.
Tiali goli, megi da, nago bomo sia selama,
tama nage da tiwai te pedalali dao.
11 Polobadu nago haniani aubo nai dabe muai dao.
Tama te we bidigo gita dabe eliyu,
nago genuai nogi ugwaba sainu yai dao.
Tiali goli, megi da,
te sawede nago pibo sai tiwai dao.
Tama te osogane dabego nage tigi
bolama, tama te ugwa banunobo ąǫ yaibao,’
te gų pagede bidibo bagego te po waibao.”
12 “Nage genuai nogi mu elaluai dao.
Te tigidali tǫde we bidi dabego gedude
nage te kigamu dagalude nanebo hǫ tiwai bidai dao.
Tiali goli, megi da, Godigo nage polo tǫba sąwai dao.
Nage boma pai hwįbo bidi dao,
nage tǫ pedai kantri hauwa aiyaba elaluali bidi dao.
Tiali goli, megi da, mu menio. *Ped 8:10; 9:1
13 Nago te tama homu elaluai dao,
‘Eno te hǫ dabe ela pelama,
tama ena dagaluba mu paibao,’ homu yai dao.
‘Tama eno tuni bidi sia te Godigo hǫ daide muaibao.
Tama me ma, ena te god dabe
sisinagasabo not badu bulu dude dualaluaibao.
14 Te ena te pǫ dabeba ugwaba mu
holama, tama ena God tiwai ogwade mu bidaibao,’
nago te homu yai dao.”
15 “Tiali goli, hobede mu dao.
Nage polo tulaluali, tama nage aiyaba aba mu tulaluama,
tama isai bidi dabego bulu paibao.
Tama nage dologode mu bidaibao. *Mat 11:23; Luk 10:15
16 Te isai bidigo bulude,
te isai bidi dabe noma mu saibao, te nage subode.
Tama augwaligo nage dolo si mu tonaluama,
tama augwaligo augwa hasi nagede hanalu waibao,
‘Aga tama te bidi da, agawe, te tǫ mali ilali bidi,
me te gasa bulu tuni bidi dabe wi elama,
noma selali bidi aga dawe?
17 Aga tama dawe, te hanu dabe
dolama, tama te bulu dabe olo bulu nigilali bidi
dawe?
Te tama dao, te bidi agai te aga kalabus
ilali bidi dabe hobede elama,
tama agai augwa buluba
ma pomainu sula tagalai menio,’
augwaligo te tobage po augwa hasi hanalu waibao.”
18 “Te gasa tuni bidi dabe isibo sogo,
te we bidi dabego wiegi yai sę elama,
tama augwaligo te wiegi yai
gų pageba pubaligi pabo dao.
19 Tiali goli, nage da, menio.
Augwaligo nage sąyani,
te bidi dabego ni nologo togalama,
damumainu sąbo tiwai mu yalio.
Nago tigi te masigi elalubo tǫ dedagede munalubo,
te meba bidi dabego tigi dologode munalubo,
te wąbi hwįani sogo isali bidi dabe tigi dologode.
Tama bidi dabego agayu ebo,
te augwali ugwa eda udula bilibode.
20 Te augwaligo nago tigi wiegi yai
sę elama, pubalogobeo,
te meba tuni bidi dabego tigi yali
gilama. Magi baso meni.
Naga digi naga bulu dolama,
tama naga we bidi naga digi ela silai dao.”
“Te wiegi yai mu dao, te tuni bidi dwaigo hani sese
e tǫde sia siyu da, usu dao.
21 Tama tibaso, agai wai bǫų dabe
odasa aselama, ela muagasao,
te aga ayago yali dwai sę, me augwa wąį dabego
yali dwai sę wei ponoyu tama yao.
Tama augwali deli me bidama, tama tuni bidi nigilama,
tama bulu dabe tonaluyu,
tama hanu dabe tigidali bulude dabe ma nigilamuo.”
Genuai Bidigo Babilon dabe dolaibao
22 Tigidali Bomo Elalubo Genuai Bidigo te po wali,
“Ena Genuai Bidi, ena digi te Babilon
dabe dali hwįnama, tama eno augwali sese mu
dola silaibao.
Te eno augwali me deli bidimainu me
sula tagalogobeo. Mu menio.
Te tigidali we me bidi me, wai dabe me,
sese mu tama silaibao.
23 Te eno te Babilon eno te hogomu
poabo naigo poabo tiwai yaibao,
te tigidali nai dola silibo hogomu poabo nai dao.
Tama eno te Babilon sele pu bulu nigilaibao.
Tama te dwai ba dabe naga bidagasaibao.
Ena Tigidali Bomo Elalubo Genuai Bidi,
eno po polo walio,” wali.
Genuai Bidigo Asiria dabe dolaibao
24 Tigidali Bomo Elalubo Genuai Bidigo bomai po
me deli e tama wali,
“Mu tamao. Sę me eno yabo homu yali,
te sę eno yaibao.
Sę me eno pedalabo homu yali, te sę mu pedalaibao.
25 Te Asiria dabe eno tǫba aselama,
tama eno we bidi sęgę tolomainu yaibao.
Te Israel dabe te bulmakau kibu tiwai bidibao.
Te bidigo sęgai ni name magede munama,
tama sę emainu tonalubo tiwai yaibao.
Tiali goli, te Asiria dabe Israel dabego
bulu dude dabe bidibadi yaide,
teda eno augwali agalama, mimieibao.
Tama te genuai sęgę Israel dabego tolali,
te sęgę dabe sese mu tama silaibao,” wali.
26 Te tobage kolesaga naga
Genuai Bidigo tigidali tǫde elalubo
kantride yabo homu yalio.
Tama tibaso, agai nogo ugwa sagulama,
tama augwali dolabo no sealubao.
27 Magi baso meni.
Tigidali Bomo Elalubo Genuai Bidigo
te tama sę yabo homu kolesaga polo yali.
Tama dego aga paliaibawe?
Agai nogo dolalubao.
Tama mego agai nogo aiyaba mubo usu egobeo.*Ais 10:5-34; Nah 1:1–3:19; Sef 2:13-15
Genuai Bidigo Filistia dabe dolaibao
28 Te tuni bidi king Ahas isali kibu
bede, Genuai Bidigo po me mani.
Te po da e tama dao. *2 Kin 16:20; 2 Sto 28:27
29 “Te Filistia bage, dage tigidaligo odiąo.
Te dage elali wąbi dage polo toga pali dao.
Tiali goli, dagego homugo dage bugagia
bidaibao homu igimio.
Te dwai gula mane me isibosi, te gasa
dwai gula mego agai pesage sabo dao.
Tama te gula manego gasa dwai
gula mane mu me ame nabo dao.
Aga te iba, eda bola bilibo bogo yai gula mane dao. *Te profetgo ede pusali po te agai te Asiria king me deli isibaso, te tiwai po pusali. Agai po digi begelama, e tiwai po wali, te gasa king dabego agai bidali pesage hasegelama, sabo po wali, tama augwaligo te gasa tǫ pedai kantriba sęgę mabo sę te genuai mu uganu igulu, te polasa bidali kingo kolesaga aiyaba elalueibao, te po olama, wali.
30 Te nai meni yai Israel bidi dabe augwaligo nai
selama,
bugagia homu tegaluama, bidaibao.
Tiali goli, dage Filistia dabe da, ena Genuai Bidi eno
dagebolo dwai nasi si taga palaibao.
Tama te nasigo dage elama, dage mu silaibao,” wali.
31 “Dage te genuai Filistia dabego
hanu, me dage te hanu dabede bidibo we bidi,
dage sese wi dwai mu elama,
gela dwai olama, i bomona waiąo.
Magi baso meni. Te ami hani me deli
te not badu asobao.
Tama augwali nosali badu hano holobao.
Te ami bidi dabe augwali tigidali
hwįbode boma pai bidi dabe mu da weyu,
tama augwali deli me nosali me dua dua asobeo.”*Jer 47:1-7; Ese 25:15-17; Jol 3:4-8; Amo 1:6-8; Sef 2:4-7; Sek 9:5-7
32 Te dago mena po wei ponaibawe,
te Filistia dabe augwaligo dago
augwali tau somainu hanaluagasobaso?
Te dago augwaligo po wei e tama ponaibao,
“Te hanu Saion te dago Genuai Bidigo
digi duala sabo bulu tiwai nigilai dao.
Tama aga we bidigo genuai sęgę elaluyu,
me sęgę yai sę eyu ebaso da,
augwali teba pelama, tama augwali
bugagia bidaibao,” wali.
*14:27: Ais 10:5-34; Nah 1:1–3:19; Sef 2:13-15
*14:28: 2 Kin 16:20; 2 Sto 28:27
*14:29: Te profetgo ede pusali po te agai te Asiria king me deli isibaso, te tiwai po pusali. Agai po digi begelama, e tiwai po wali, te gasa king dabego agai bidali pesage hasegelama, sabo po wali, tama augwaligo te gasa tǫ pedai kantriba sęgę mabo sę te genuai mu uganu igulu, te polasa bidali kingo kolesaga aiyaba elalueibao, te po olama, wali.
*14:31: Jer 47:1-7; Ese 25:15-17; Jol 3:4-8; Amo 1:6-8; Sef 2:4-7; Sek 9:5-7