Genuai Bidigo te Jerusalem we bidi augwaligo kolesaga dodolaibao wali
28
(Dąį 28–35)
Genuai Bidigo te sawi yai taun Samaria dolaibao
1 Hobede mu dao, te Israel bagego sawi yai
Nage mu dolaibao.
Te naga genuai bidi dabego wain wę hauwa mu tulama,
poliyu, tama nago nogi ugwaba mu sabo dao.
Augwaligo te po wabo dao,
nage te bomai hanu mu dao, po wabo dao.
Nage te nai bula tuabo tǫ wiegi yai
bulu dude te bidibao.
Tama nage te naga genuai bidi dabego
tobolude mubo plaua kula wai bono
elalubo ąǫ te elalubao.
Tiali goli, nage pąde tama te plaua bono sasia pelama,
dolobo tiwai nage dolaibao.
2 Mu tamao. Genuai Bidigo te bomai
hani me deli polo nage elalumainu sa muanio.
Te hani te bomai wali tiwai asaibao,
tama me te tulubage te talua ge
tulubage tulubo tiwai yaibao,
tama augwaligo nage togolama, tǫba tula palaibao.
3 Tama te hanigo nage agalama,
nage daidu augwali bilaibao,
nage te genuai bidi dabe poliyu,
nago nogi ugwaba sabo hanu dao.
4 Nage te nai wai bulabo tǫde
te dwasianu bulu du elalubo madi nage te bidibao.
Tama nage sawi yai plaua bono tiwai elalubo ąǫ te ebao.
Tiali goli, nage te plaua bono mobia
pelama, dobo tiwai yaibao.
Tama nage deli sogo tama silaibao,
te ni fik du me deli hasia tau ebo
tiwai, tama bidi me deligo sulama,
polo sela tubo tiwai yaibao.
5 Te sogo te Godigo we bidi hani
dwasianu naga bidiyu da,
teda augwaligo Tigidali Bomo Elalubo Genuai
Bidiba wiegi yai homu yaibao.
Genuai Bidi aga digi aga wiegi yai
tuni bidigo madi tobolude bulai,
me te wiegi yai plaua bono
augwaligo tobolude mubo tiwai bidaibao.
6 Genuai Bidigo te po tų odobo
bidi dabebolo wiegi yai kolesaga
menama, tama augwaligo
po tų bugagia osola sueibao.
Tama agai te hanude ami bidi dabe bomo mawaibao.
Tama augwaligo te boi bidi dabe
te hanu tomoba we bidi dabe dali
hwįagasomainu sula tagalogobeo.
Te pris dabe dali, profet dabe dali sigo Aisaia posobo po wali
7 Te profet dabe, me pris dabe,
augwaligo te wain wę me bia wę hauwa tulama,
polobo homu yabo homu elama, dodolama,
wa bilabo homu eyu, dodola bilabo homu ebo dao.
Augwaligo homu kolesaga menia pabo dao.
Tama augwaligo augwa sę bugagia ebo menio.
Tama me, te pris bidi dabe augwaligo
te we bidi dabego sęgę bugagia dodolobo menio.
8 Augwa bogu te augwa bugulama,
wę tubo tebol saide pesage holobo dao.
Tama dwasianu wiegi yai me elalubo menio.
9 Te augwaligo eno po odobo si da,
augwaligo e tama po wabo dao,
“Te bidigo homugo de mu agai skul
ola mawainu homu eyu ebowe?
Agai pogo de mu ola mawainu ebowe?
Da dwasianu wai bǫų dabe meni.
Tamadi tama, da ame tubo tagalama bidibe.
10 Tigidali sogo agai dedeli po naga wabo,
te bidigo wai bǫų dabe te leta dabe
dolo nogi eyu emainu,
me po dage deli me hani deli deli dolo nogimainu
ola mabo ąǫ ebo,”
augwaligo te tobage po enade wabo dao.
11 Te we bidi dabe augwaligo
eno po odobo hagela mu ebo.
Tama tibaso, Genuai Bidigo augwalibolo
te gasa po wabo bagego
pedauwalidu augwali po ola momainu,
te gasa bidi dabebolo te agai po ola mawaibao.
12 Aga digi aga we bidi te tǫ badu
tagalai dao. * 1 Ko 14:21
Tama agai augwalibolo te po wai dao,
“Te bulude dage toma tuyu, bugagia dua bidiaganio.
Tama te bidi dabe, augwaligo tigi
boma pelama, augwaligo tigi hagela
pobaso da, augwali hodo doliyu,
te bulude dua bidagameo,” wai dao.
Tiali goli, augwaligo agai po odobo hagela mu yali.
13 Tama tibaso, Genuai Bidi aga digi
augwali deli deli leta dabe dolo
nogi ebo, me deli deli po nogi ebo, me deli deli lain
nogi ebo me,
te tiwai Genuai Bidi aga digi augwali ola mawaibao.
Te dwasianu wai dabe ola mabo tiwai aga digi yaibao.
Tama augwali homu kone tua pelama, dene mu saibao.
Tama te boi bidi dabego augwali nogo bono dunama,
augwali kalabus elama, odasa paibao.
Godigo te dwagi yai boma pai masigi te bulu Saionde muaibao
14 Dage e Jerusalemde we bidi tonalubo we bidi,
dagego Genuai Bidigo po odiąo.
Dagego homugo Genuai Bidigo po
olo nai dao homu ebo.
15 Tama dagego e tama po wabo dao,
“Dago te isibo kolesaga dali dago polo po dąų ola selama,
tama dago te gų page dali dago
po polo dąų ola sai dao.
Tama tibaso, augwali sigo da me dologobeo.
Te dwai sę da dolo pedalubadi me tagala,
teda da geda muaibao.
Magi baso meni. Dago te ili po olama,
te hasegelu hasegelu ebogo
da tau siyu, tama da bugagia bidaibao,”
dagego te po wabo dao.
16 Tiali goli, God, Genuai Bidigo te po wali,
“Odao. Eno te be page dąų walabo
masigi dila pai deli me polo dąį ilai dao.
Te aga te dwagi yai boma pai mu dao.
Tama eno te masigi te bulu du Saionde muaibao. † Bidi mebago homu te e nosali wabo po te tiwai po wabo da, “Tama te masigi nogi te tiwai wali, ‘Te konealubo po mu dąų wabo bidi dabe da, augwali da te wi elama, midigi me egobeo,” te po wai dao.
Te bidi dabego agaba homu dąų wabo bidi dabe da,
teda augwali wi elama, didibili me egobeo.* Tib 118:22-23; Rom 9:33; 10:11; 1 Pi 2:6
17 Te ena te doloba pai skel
te dagego kolesaga skel ebo te skel tiwai bidaibao.
Tama te doloba pai kolesaga naga
te eno usu ni tiwai elaluyu,
tama tego eno dage usu saibao.
Dagego homugo te tibao, te dagego dwai kolesaga ebo
te kolesagago dage tau saibao homu te ebao.
Tiali goli, eno te dwai sogo dageba
pedalomainu yaibao.
Tama dage te bidi dabe te genuai
talua ge tulubage asiyu,
ela silibo te tiwai yaibao.
Tama dage pelama, duala sigi pabo
pesage mu menia saibao.
18 Tama eno dagego te isibo kolesaga dali,
me te isibo bidi dabego bulu dali,
dagego dąų olama yali po eno
tomode togolama, mu silaibao.
Tama te dwai kolesaga mu dagede
pedalama, tama dage mu isila paibao.
19 Te dwai kolesaga dabego dage
munu me taga pogobeo. Menio.
Te augwali geninama mu dageba tigidali sogo hulide
me ulade dageba me pedalidu geaibao,” wali.
Ma, dagego Godigo te wiegi yai po page
dagego bugagia mu koneyu da,
dage noma selama, wi mu yaibao.
20 Dage te dwai dene mu saibao.
Te bidi pibode te dene dene hauwa ebo
tiwai dagego tigide yaibao. Magi baso meni.
Te pibo sai te pęwądage mu elama,
agai sągą olo pobialuali.
Me, te banua pibo blanket te dwasianu mu elama,
agai banua pibo usu sisąbaso,
o agai tigi sese usu isąbaso.
21 Genuai Bidi aga bomo dali
hogodasa asaibao, te agai polobadu
te bulu du Perasimde,
me te Gibeongo odogo malu bulude
yali tiwai yaibao.
Tama agai yainu yali sę agai yaibao.
Tiali goli, dagego te sę ebo sulama,
tama dagego te gasagi yai mu da, te homu yaibao.* Jos 10:10-12; 2 Sml 5:20; 1 Sto 14:11
22 Tama tiali, dagego te Genuai Bidigo
po dolobo kolesaga tagaliąo.
Ma, meniyu da, dagego sęgę dabe
genuai mu pedalaibao. Magi baso meni.
Eno odali, God Tigidali Bomo Elalubo Bidigo te bomai
po tama wabo suali.
Agai e bulu tigidali pesage mu dola silaibao.
Bidi dabego wiegi yai kolesaga dabe Godigo naga manio
23 Dagego olo saganama, eno po bugagia odiąo.
24 Te bidi mego te nai wai bulainu agai
te tǫ elebo sę naga ebo yali bogo,
25 tama agai te nai wai dabe bulubo meniwe?
Meni ma.
Agai tǫ elama, silibo si, agai te ono ge tede bulubo dao.
Agai te dola pai lainde agai te nai wit wai dabe bulama,
tama me du dage badu agai
te nai bali wai tede bulubo dao.
Tama agai gasagi yai wit me agai te gi
homu badu me bubula bilibo dao.
26 Godigo digi aga te nai wai bulama,
sela tubo kolesaga ola mani dao.
27 Te ono ge dabe dwasianu sabo usu yai de da,
te bidigo agai te ni name selama,
tama te nai ono agabo menio.
Tama agai te wit ge dabe sainu,
te wilkar dabe me te nai wit ge sainu,
ugwadu kegebo yaligila ebo menio. Mu meni.
Agai te dwasianu wąbi dage dabe naga selama,
tama te ono dabe elebo dao,
te augwaligo dwasianu ge dabe sainu.
28 Agai te nai wit ge dabe sabo
kolesaga agai mu koneani, te agai te nai dwasianu
ge dabego bret nigabo.
Te agai te hos dali, me te wilkar si agai
te nai wit aga dilide sela sąwainu da,
teda agai te hos kibu dali,
te wilkar sigo te wit dolama,
mia saidali weyu agai bugagia tonalubo dao.
29 Te tigidali sę ebo kolesaga Godidu naga asalio.
Tigidali Bomo Elalubo Genuai Bidi
agaduba deli naga tigidali haniani wiegi yai
kolesaga dali, homu kolesaga mu pągąna pai dao.
*28:1: Te vesde, Aisaiago te taun Samaria po olama wali, te kantri Israelgo genuai hanu taun te not badu elalualio.
†28:16: Bidi mebago homu te e nosali wabo po te tiwai po wabo da, “Tama te masigi nogi te tiwai wali, ‘Te konealubo po mu dąų wabo bidi dabe da, augwali da te wi elama, midigi me egobeo,” te po wai dao.
*28:16: Tib 118:22-23; Rom 9:33; 10:11; 1 Pi 2:6
*28:21: Jos 10:10-12; 2 Sml 5:20; 1 Sto 14:11