49
Genuai Bidigo sę bidi te tigidali tǫ kantrigo ula tiwai bidaibao
1 Dage te bulu tǫ kantri pąde, me digibulu
bidalubo we bidi dabe, dagego eno po odiąo.
Te idago ena ame nisąbadi, te Genuai Bidigo ena sa
muyu, dąį ilama,
enaba te nogi mawai dao. * Jer 1:5
2 Te agai ena sisi ilama, te eno po bugagia miyu,
te eno pogo te we bidi dabego haligade mu enama,
te bainat poai tiwai mu yaibao wali.
Te agai nogogo ena bugagia geme dualali.
Tama agai ena te poa pai ene mu tiwai te polama,
muani tiwai yai dao. * Hib 4:12; Ped 1:16
3 Te agai te tiwai po wali,
“Israel, nage eno sę bidi da.
Te nagede naga, te eno bomo,
me eno genuai nogi te tigidali
we bidiba ola mawaibao,” wai dao.
4 Tiali goli, eno enade digi te tiwai po obao,
“Eno sę dene mu elama, te eno bomo tigidali sia salio.
Tiali goli, te nai me pedalisiąma,
te ena odolali sę dene yalio.”
Tiali goli, tagalao, Genuai Bidigo te eno yali sęde
koneama,
tama eno tede sabo nai aga nogode elalubao.
Awe, te eno Godigo ena te sę yalide
wei ponabo nai sisi elama, munolubao.
5 Genuai Bidigo ena te idago haligade sa munama,
te ena agai sę bidi bidimainu yali.
Te agai te po enaba weyu, te Israel dabe sisinama,
te augwali agaba odasa asomainu yali,
magi baso meni,
God eno Genuai Bidigo enaba te genuai nogi menama,
te aga digi ena bomo mawai.
Te megi da, Genuai Bidigo enaba te tiwai po walio,
6 “Hasiabolo eno nageba
te boi bidi dabego ela musiąwai Jekopgo hani dabe
ma hodolabo sę mawai.
Eno te Israel bage meba hagea sai dao,
tama eno nageba te augwali sisinama,
enaba odasa asabo sę mawai dao.
Tialima, te sę ebogo te nago bomogo dęą me sogobeo.
Eno te gasa sę me mawaibao.
Eno nage te Israel hani isąwai we bidi hani tigidaligo
sole ula tiwai nigaibao.
Awe, nago te eno te tigidali bulu tǫ habu
we bidi ma dobola sabo sę yaibao,” te po wali.* Ais 42:6; Luk 2:32; Tpi 13:47; 26:23
7 Genuai Bidi, aga te Israelgo Wiegi Yai Doloba Pai
Kolesaga Tigidali Mu Ebo God dao,
aga te Israel tudibadu posolalu, tau sabo bidi
elalubao,
agai te po aga sę bidiba wali.
Aga da te gasa we bidigo godolo homu isiąbo bidi,
te gasa bulu tǫ kantri we bidigo te aga dwai nai mu
tiwai tonani,
te aga te genuai bidi dabego olo sę ebo bidi tiwai
bidali.
Genuai Bidigo te tiwai po wali,
“Te king dabego nage sulama,
te augwali dolagaselama,
te genuai bidi dabe augwa gesabidi
te tǫba basigulama,
te nageba genuai nogi mayu tiaibao.
Augwaligo tama tebo, magi baso meni,
ena Genuai Bidi, te Israelgo God,
ena te Wiegi Yai Doloba Pai Kolesaga Mu Ebo God
da,
nage sa muani, te eno sę emainu yali,
te eno dąų wali po te eno me bologobeo,” wali.
8 Genuai Bidigo aga sę bidiba te tiwai po wali,
“Eno digi eno nage ma selama,
te nage wiegi yai ilabo sogo bodolu muani,
te sogo mu dolo eno nago i wabo odolama,
nage tau saibao.
Te nage eno bugagia tonaluaibao,
te nagede naga eno te tǫde we bidi tigidali dali
bomo yai po dąų waibao.
Tama eno te Israel tǫ kantri wiegi yai ma pedalumainu
ilaibao,
tama te Israel hani augwa te megi olo elalubo tǫde
ma bidaibao. * 2 Ko 6:2
9 Te eno te kalabuside bidibo,
me be hulia side bidibo bidi dabeba
te tiwai po weyu, ‘Asao,’ po waibao.
‘Dage te kalabus tagalama, olo mu bidaibao,’ ” te po wali.
“Tama augwa te kalabus tagalama, augwa tǫba ma
asaibao.
Te augwali sunumidu pebelayu, me bulu dudu pabode,
te augwa tubo nai hauwa elalueibao.
10 Te augwali nai me, wę me sǫą pogobeo,
te posolai giligago me waligo
te augwali tigi posolo me egobeo.
Magi baso meni, te augwali olo mu tau mabo wiegi yai
kolesaga ebo bidigo te augwali bugagia tonalu,
te sipsip tonalubo bidigo te sipsip dabe
te nosai hauwa elalubo pesageba,
me wiegi yai wę elalubo madiba
odasa pabo tiwai gilama ebo dao.” * Ped 7:16-17
11 “Te eno nigali bulu du dabe te pepedama,
dodolaibao, te eno ena genuai sunumi
pedalumainu yaibao.
12 Tialima, eno te digibulu bidalubo we bidi dabe,
te not badu me, te giliga dega sigulubo badu me,
asaibao.
Te augwali te taun Aswan badu me asaibao,” wali. * Tede te po wali, te Hibru pogo te po wali “Sinim,” wali, tiali goli te bulu te menade mu elalubo, te dago konebeo. Bidi hauwago te homu yai, te profetgo te taun Aswan po olama wali homu yai, te taun me deli te Isip tǫ kantri te saut badu elaluai dao.
13 Dagalu, nago te wiegi yai homu pemene eyu, i wao.
Te tǫ, nage pemene elama, genuai po dągą wao.
Dage bulu du dabe, dagego me
te pemene ebo balia wao.
Magi baso meni, Genuai Bidigo olo mu
tau mabo wiegi yai kolesaga aga we bidiba ebo dao.
Augwa te sęgę hauwa tolali, tiali goli, megi da,
Genuai Bidigo augwaliba wiegi yai sę elama,
te augwa haliga dua tamugulama ma bidaibao.
Genuai Bidigo te we bidi dabe te Jerusalem taunba ma odasa asaibao
14 Te Jerusalem we bidi dabego te tiwai po wali,
“Genuai Bidigo da tudi ola mobao,
te agai da homu kone mu gegeda palobao,” wali.
15 Tiali goli, Genuai Bidigo augwaligo
po wei ponoyu, te tiwai po wali,
“Te idago aga digi ame nai wai homu kone ebo tagalama,
te agai aga te ame mani wai
homu dene ebo meni da, agawe?
Te ida me deligo tama me tiabo homu yali goli,
eno dage homu kone palobo me tagalogobeo.
Mu menio.
16 Jerusalem, eno nageba homu kone ebo me gegeda
palogobeo.
Eno nage noma bidi piksa nigali,
tama eno nogo sawali si daide
nago nogi dali piksa dali si asęani.
Te sesemane sogo eno sulama,
nage homu kone palobo dao.
17 Te nago wai dabe ma asaibao,
te hanigo dabe nage dolali,
te augwaligo nage tagalama, wi paibao.
18 Nago tobolu ugwaba sagulama, tonono bilao,
te nago naga wai dabe deliba sisinama,
te nageba asobo sueibao.
Ena Genuai Bidi, ena sesemane sogo bidibao,
eno mu po obao,
te nago wai dabe te nago au yabo
nai dabe tiwai elalueibao,
te we bidiba painu te sawi yai ugwa
au ebo tiwai elama elalueibao.”
19 “Awe, nage mu dolobaso, olo bidali.
Nago tǫ te dwai madi pedelali.
Tiali goli, megi da, te wai dabe te nageba pągąna
sagaselama, te nago tǫ augwali usu egobeo.
Te nage dolali hani, te nagede digibulu mu bidaibao.
20 Nago te wai dabe te nago we bidi dabe kalabuside
digibulu bidali sogo pedelali,
te augwaligo nageba te tiwai po waibao,
‘Te tǫ dwasianu mu dao.
Dago bidabo tǫ dwasianu mu dao.
Dago bidabo tǫ pedai genuai tǫ sabo homu ebao,’
waibao.
21 Te nago nagade digi te tiwai po waibao,
‘Dego enaba te tigidali wai maniwe?
Eno wai dabe te hagawai,
te eno wai ma ame nogobeo homu yali.
Te boi bidi dabego ena kalabus elama, sela pali.
Dego mu te wai dabe ame nenama, negeduama,
te genuai eboba usu naniwe?
Enaduba deli bidai, tiali goli te wai dabe
menadu asela wai dawe?’
nago te po hanalu waibao,”
God Genuai Bidigo te po wali.
22 God, Genuai Bidigo
te taun Jerusalemba te tiwai po wali,
“Eno te dąį me deli dodolama, te eno nogo me,
te dąį me deli tiwai ugwaba siyu,
te gasa tǫ kantri Israel hani
isąwai we bidi dabego sulama,
te nago wai dabe ma sela asomainu yaibao.
Te nago wai dabe te augwa nagede auwasa,
tama sela asaibao wali.
23 Te king dabego, me kwin dabego,
te nago wai dabe negeyu,
te augwa aya idago ebo tiwai yaibao.
Augwa kidu sugunama,
te augwa tobolu te nago sągą page tǫba basigulama,
te nageba genuai nogi mayu tiaibao.
Nago te tiwai koneyu, ena tama te Genuai Bidi da
waibao.
Enaba homu kęą pelama,
te eno augwali tau somainu tonalubo we bidi,
te augwali odolali me tonalugobeo,”
God Genuai Bidigo te po wali.
24 Te bomai boi bidigo hwįagaselama,
te bidi me deligo hani kalabus elama, te aga wiegi
yai doado bage sali,
te aga hani dali, te aga doado bage dali, ma saiba,
agawe?
25 Tiali goli, Genuai Bidigo Jerusalemba te tiwai po
wali,
“Mu tama, te eno nago hani dali ma siyu,
te nago wiegi yai doado bage
te bomai boi bidi dabe me te dwai king dabego
nogode ma dobola saibao.
Eno te nageba hwįani bidi dabeba te hwįbo wei
ponaibao,
te eno nago wai dabe ma saibao.
26 Te eno nago boi bidi dabe augwa
haside digi tomode hwįmainu yaibao.
Te augwa hasi digi elebo sę umabo eyu,
te bidi dabe te wain wę tulama,
gęǫ page ebo tiwai yaibao.
Tama te tǫde we bidi tigidaligo eno te ebo sę sulama,
te augwa te tiwai koneaibao,
ena naga ena te Genuai Bidi da homu yaibao.
Ena te ena we bidi ma sabo God dao,
te eno nage tudibadu posolalu, tonalu, te nage tau
siyu ebao,
ena te Jekopgo hanigo bomai God elalubo dao,”
wali.
*49:6: Ais 42:6; Luk 2:32; Tpi 13:47; 26:23
*49:12: Tede te po wali, te Hibru pogo te po wali “Sinim,” wali, tiali goli te bulu te menade mu elalubo, te dago konebeo. Bidi hauwago te homu yai, te profetgo te taun Aswan po olama wali homu yai, te taun me deli te Isip tǫ kantri te saut badu elaluai dao.