1 Te wali po silama, tama nosali me sogo Jisas Galili sigi ąį te moni gebadu nogelama, u badu pai. Augwaligo te ąį nogi me Taiberius nogi yai. 2 Tama genuai we bidi hani hauwa augwaligo Jisasgo te gasi yai bidi hauwa agai dodolobo augwaligo suai. Tama tebo sulama, augwali Jisas wali pai. 3 Tama Jisas bulu du meba holama, tama Jisas aga wali pabo bidi dabe dali dulaluai, te bulu dude. 4 Tama bo disąwai nai bret tuabo sogo te pąde tama dao, te sogo nogi Pasova, te Juda bagego olo bidibo side wai. 5 Jisasgo tonono bilibadi, tama agai suali, genuai we bidi hani Jisas agaba asai. Tama Filipbolo agai te po wai, “Dago te we bidi augwali tuabo nai bret menade abelegowe?” Jisasgo te po wai. 6 Jisasgo Filipbolo te po wai, agai homu magi ebowe naga suainogo eyu, Jisasgo te po wai. Jisas aga digi yabo sę da te aga konea selama, te sę yaibao. 7 Filipgo Jisasbolo po wei ponoyu, te po wai, “Tibaso da, dago bret te masigi umabogo abelama, te we bidi mabo da, te augwali usu egobeo. Te augwali deli deligo te nai dwasianu naga siyu da, te me usu egobeo,” Filipgo Jisas dali te po wai.

8 Aga bidi me deli Andru, te Saimon Pita aga ama, agai Jisas agabolo te po wai, 9 “Ogwa me deli ede bidibao, te ogwa agai a naga bret dali sųgų si dali munalubo. Te bret te bali plauago nigai. Tiali digi, te naigo e genuai we bidi hani usu egobeo,” Andrugo te po wai. 10 Jisasgo te po wai, “Te we bidi augwali duayao wao,” te po wali. Noswai hauwa tede elaluai, tama te we bidi augwali duawai, augwali te bidi hani bidi sese hauwa mu 5,000, te we dali wai puluba dali nedebeo. 11 Augwali duada pao olama, augwali dualaluai, tama Jisasgo te ogwago bret selama, tama Jisasgo Godibolo nage usu dao wai. Tilama, te we bidi augwalibolo te nai dobaba pai. Te sųgų si me agai tama naga tiwai agai augwalibolo mawai, augwa homugo usu yabo te tiwai naga. 12 Augwali nai tuali usu ela silai. Tama Jisas aga wali pabo bidi dabebolo te po wai, “Dagego nai me badu munalubo sisinao,” wai. “Tiyu yaide me badu nai olo tagalobuo,” wai. Jisasgo te po aga bidi dabebolo wai. 13 Tama tialima, augwaligo te tulama, me badu munalubo nai dabe sisinama, tama augwaligo bonou wa nogo si olama, sągą badu si pągąwai. Te a naga bali bret tego bidi augwali nai tuali usu yalima, tama me badu munaluai, te nai augwaligo te bonou wade ma buai.

14 Te we bidi augwaligo Jisasgo te bomo yai sę ebo sulama, tama augwaligo te po wai, “Mu tamao, te aga e tǫba asaiba wali bidi te aga dao, te Godigo po ola mabo bidi dao,” te we bidi augwa hasi te po wai. 15 Tialima Jisasgo koneai, augwaligo homugo Jisas aga dąų olama, tama Jisas aga augwaligo tuni bidi bidimainogo yaibao, augwali te homu yai Jisas aga dali. Tama tibaso, Jisas agaduba bulu duba ma pai.

16 Pio tama Jisas aga wali pabo bidi augwali te sigi ąį geba dulai. 17 Megi hulia sai, tama Jisas augwali bidibo digi pedalobeo. Tama tibaso, augwali moni gebaba holama, te ąįdu pai. Augwali Kaperneam be naniba painogo yai. 18 Bomo yai wali dali tama genuai ąį gisigi asiyu dali yai. 19 Augwali te gebadu ąį todogo pali, te kilomita a naga ma te a naga olama me badu nogo deli tama dąį egi pai. Tama augwaligo suali, Jisas ąį daidu asiyu tama te geba pąba sabolainogo asai. Tama augwali moni wi yai. 20 Tialima, Jisasgo augwalibolo te po wai, “Ena Jisas tama asobao,” wai. “Dage wi ebo tagaliąo,” te po wai, Jisasgo. 21 Tama augwaligo Jisas geba tomoba sela asainogo yai. Tama te geba polo augwali te pabo bulu teba poloba tugi pai.

22 Te do tama wabo side te we bidi augwali te sigi ąį sesege badu bidaluai. Augwaligo koneai, te do tama te gasa geba me menio. “Deli digi e munaluali,” wai. Tama Jisas aga wali pabo bidi dali te gebaba holobeo. Menio. Te bidi dabe augwa naga te gebaba holama pai, te we bidi augwaligo te koneai. 23 Tama augwaligo homu hauwa ebadi yaide, Taiberius bulu du asai geba meba teba poloba tuagasai, te Genuai Bidigo Godibolo nage usu da olama, tama te we bidi hauwa augwaligo nai tuali madigi pąba. 24 Te we bidi augwaligo suali, Jisas dali aga bidi dabe dali bidibo subeo. Tialima, augwali te tamadi asai geba dabeba holama, tama augwali Kaperneam buluba Jisas gegegi pai.

25 Te we bidi augwaligo Jisas sigi ąį sesege badu gegai. Sulama, tama augwaligo Jisasbolo te po hanalu wai, “Po ola mabo bidi, nage eba nisu asai dawe?” te po wai. 26 Jisasgo po wei ponoyu, te po wai, “Mu tama eno dagebolo obao, dagego eno yali bomo yai sę page homugo koneama, ena gegeyu ebeo. Menio. Dage eno te mani bret tulama, tama dage haliga pągąwai dao. Te tiali pagede dagego ena gegebo sę ebao,” wai. Jisasgo te po Juda bage dali wai. 27 “Dagego te mobia pabo nai naga sabo sę tiwai dagego egimio. Te menio. Dagego te bidada peyu bidabo bomo mabo nai sabo sę yao. Te tiwai nai Godigo Bidi Mu agai dagebolo mawaibao. Magi basowe? Aga Aya Godigo te bidide dwagi yai homu eyu, sa muai,” Jisasgo te po wai. 28 Tama tibaso, augwaligo Jisasbolo te po wai, “Dago mena tama tilama, tama dago Godigo sę yaibawe?” augwaligo Jisas dali te po wai. 29 Jisasgo augwalibolo po wei ponoyu, te po wai, “Godigo sę e tama dao: dagego te Godigo tagala palali bidigo wabo poba duga homu tigidali muyu bidao,” Jisasgo augwalibolo te po wai. 30 Tama tibaso, augwaligo Jisasbolo te po wai, “Dena homu tigidali nageba mumainogo, tama nago magi bomo yai sę yaibawe? Nago magi sę yaibawe?” te Juda bagego Jisas dali te po hanalu wai. 31 “Dago wąį dabe augwaligo bidi meni yai bulude ili isiąwai nai nogi mana tuai dao. Godigo wali po bukude bidi mego asęani po gilama,

34 Tama tibaso, augwaligo Jisasbolo te po wai, “Genuai Bidi, nago te bret dabolo tigidali sogo da mao,” wai. 35 Jisasgo augwalibolo te po wai, “Ena digi ena bidabo bomo mabo bret dao. Bidi agai homu enaba muyu, ena pageba asobaso da, te bidi aga nasi munu me egobeo. Tama bidigo aga homu tigidali enaba mu baso da, te bidi aga ąį nogone munu me egobeo,” Jisasgo te po wai. 36 “Tialima, eno dagebolo polobadu wali gilama, dagego ena suai dao, tiali digi dagego enabolo bomo yai homu dąų wabeo. 37 Eno Ayago enabolo mabo we bidi tigidali augwali ena pageba asaibao, ena wali asomainogo. Ena pageba asobo bidi te aga eno me sela sągobeo, mu menio. 38 Magi basowe? Eno dagalu tagalama, e tǫba dulali, te eno homu kolesaga wali painogo asobeo. Menio. Ena e tǫba dulali, te ena tagala palai bidigo homu ena wali pomainogo asai. 39 Tama te ena tagala palai bidi agai homugo tama tiwai, agai enabolo mani we bidi eno me deli hagalamuo. Menio. Agai homugo eno augwali te tǫ dali dagalu dali sia sabo sogo augwali tigidali eno ma hodolaibao. 40 Eno Aya agai homu tama telalubo, aga ogwa osola suyu, agabolo bomo yai homu dąų olama muyu yai we bidi tigidali te augwali bidada peyu bidada pabo bomo selama, mu bidaibao. Tama augwali eno te tǫ dali dagalu dali silibo sogode augwali eno digi ma hodolaibao, ma bidimainogo,” Jisasgo te po wai.

41 Te Jisasgo te po tamadi wai dao, “Ena digi ena te tubo diluai nai bret dagalu tagalama, eba dulai.” Jisas agai te po obaso, Juda bage augwa hasi hagelabo po miani. 42 Augwaligo te po wai, “E bidi da, te Josep aga ogwa dao. Dago aga aya ida dali koneai dao. Magi baso agai te po megi wabowe, ‘Ena dagalu tagalama, e tǫba duali dao,’ wabowe? Agai po usubeo,” augwaligo te po wai.

43 Te Jisasgo augwalibolo po wei ponoyu, te po wai, “Dage duga hasi tomode te hagelabo po wabo tagaliąo. 44 Bidi me deli ena pageba olo me asogobeo. Menio. Ayago ena tagala palobaso, ena asai dao. Tibaso, agai bidi me deli kegali da, tiali da, te bidi ena pageba asagameo. Tama te bidi eno aga nosali tǫ dali dagalu dali silibo side ma hodolaibao, aga ma bidimainogo tama yaibao. 45 Te Godigo nosali yabo sę po pusa mani profet bidi dabe augwaligo te po asęani, ‘Godigo tigidali we bidi ola mawaibao.’ Mena bidi me Ayago po odolama, tama koneama, te bidi ena pageba asobo dao. *Ais 54:13 46 Tiali goli, bidi me deligo Aya me gedugo subeo. Te bidi God dali bidilama, asali, te bidigo naga Aya gedugo suai dao. 47 Eno mu po dagebolo obao. Bidigo enabolo aga homu dąų olama, enaba tialubo bidi, aga bidada peyu, bidada pabo bomo selama, mu bidaibao. 48 Ena digi ena te mu bidabo bomo elalubo tubo diluai nai bret dao. 49 Polobadu duga nǫų dabe augwali te bidi meni yai bulude bididubadi, te ili isiąwai nai nogi mana tuali goli, augwali nosali isali. 50 Tialima, te dagalu tagalama dulali bret, te tedali gasagi yai. Tama tibaso, bidigo te bret tuali da, te aga te mu bidabo bomo munu me tagalogobeo. 51 Ena digi ena da, te bidabo bomo elalubo bret da, te ena dagalu tagalama, e tǫba dulai dao. E bret bidigo tuyu da, te bidi aga bidada paibao, mu gamonaibao. Tama eno te bret agabolo mawaibao, te eno tigi dao. E tǫde bidibo we bidi augwali mu bidimainogo, eno ena tigi mawaibao,” Jisasgo te po wai.

52 Te Jisasgo te wali pode te Juda bage augwa hasi bomo elama, konila yali. Augwali me badugo te po hanalu wali, “Mena tama tibaso, te bidi aga tigi da menama, tama dago tueibawe? Te sę ebo usu egobeo,” Juda bage augwaligo te po wai. 53 Tama Jisasgo augwalibolo te po wai, “Eno mu po dagebolo obao, dagego Godigo Bidi Mu agai tigi tusiąwani da, agai kaneme tusiąwani da, tiali da, dagego te bidabo bomo elalugobeo. 54 Bidigo eno tigi tuyu, tama eno kaneme tuali bidi da, aga bidada pabo bomo elaluaibao, tama eno aga te tǫ dali, dagalu dali silibo side aga ma hodolaibao. 55 Magi basowe? Eno tigi te tubo nai mu dao, tama eno kaneme te mu tubo ąį dao,” Jisasgo te Juda bage dali wai. 56 “Bidigo eno tigi dali eno kaneme dali tubo bidi da, aga enade bidiyu, tama ena agade bidiyu, te bidi dadi si mu kęą pai elalueibao. 57 Bidada pabo bidi Aya agai ena tagala palai. Te tiwai gilama, ena me bidada pabo dao. Te tiwai gilama, mena bidi eno mi tuali bidi da, te bidi mu bidabo bomo te ena bomode saibao. 58 E bret, eno dagebolo po wabo bret da, te dagalu tagalama e tǫba dulai bret dao. Duga nǫų dabego bret tuali goli, augwali isali. Eno dagebolo wabo bret te tiwai menio. Bidigo e bret tuyu da, te bidi aga mu bidabo bomo selama, bidada peyu, bidada paibao,” Jisasgo te po wai.

59 Jisasgo augwali te bomo yai po ola mabo be tomode te po ola mawai, te Kaperneam be nanide.

60 Te bidi Jisas agai te bret dagaludu dulali po olama, tama aga wali pabo we bidi hauwa augwaligo te po odolama, augwa hasi tomode te po wai, “Te pogo dabolo sęgę mabo, dago te po magi elama, wali pogowe? Mena bidigo te po odolama, wali pabo usu egowe?” augwaligo te po wali.

61 Bidi mego agabolo te po wasiąbadi, Jisas aga digi koneai, aga wali pabo bage hauwa augwa hasi tomode te hagelabo po wai. Tama tibaso, agai augwalibolo te po wai, “Eno wali pode dage sębę elama, dagego ena tagalaibawe? 62 Tialima, dagego suali ma te Godigo Bidi Mu aga polobadu bidali buluba hodobo suyu da, magi yaibawe?” Jisasgo te po wai. 63 “Te mu bidabo bomo mabo bidi da, te God agai Mobo Bidi naga dao. Bidigo bomogo dwasianu me tau sogobeo, usu egobeo. Te po eno dagebolo polo wai dao, te pogo dagebolo God agai Mobo Bidi mabo dao, agai dagebolo te mu bidabo bomo momainogo. 64 Tiali digi, me badu bidi dage tomode augwaligo enade bomo yai homu dąų olama, mube,” Jisasgo te po wai. Polobadu digi, aga sę ebo gagalali sogode, Jisas aga koneai agade bomo yai homu dąų olama, musiąbo bage. Tama aga koneai me, te aga te boi bidigo nogoba sela maiabo bidi, te me agai polobadu koneai. 65 Tama Jisasgo po me wadoloyu, te po wai, “Te pagede eno dagebolo te po wai dao, Ayago bidi mebolo usu dao wasiąyu da, teda te bidi ena pageba asobo usu egobeo,” Jisasgo te po wai.

66 Te po silama, tama Jisas aga wali pabo we bidi hauwa augwaligo te po odama, Jisas tagalama, augwa ma geasa pai, tama augwali Jisas dali me bidibeo. 67 Tama tibaso Jisas aga bidi nogo si olama, sągą badu si bidibolo te po hanalu wai, “Dagego me ena tagalama, paibawe?” te po hanalu wai. 68 Saimon Pitago Jisasbolo po wei ponoyu, te po wai, “Genuai Bidi, dago nage tagalama, da mena bidi pageba pogowe? Nago po da, te bidada peyu bidada pabo bomo elalubuo. 69 Tama dago te pode bomo yai homu dąų olama, bidibo dao. Me dago nage koneai, naga digi naga Godigo doloba pai bidi mu dao, Godigo tagala palai bidi dao, te dago konebao,” Pitago Jisas dali te po wai. 70 Jisasgo te po wei ponoyu, te po wai, “Eno dage nogo si bidi selama, sągą badu si bidi dage eno sai dao. Tialima, dage tomode me deli dwai haubo bidi te bidibao,” Jisasgo te po aga bidi dali wai. 71 Jisas agai te Judasde te po wai, te gasa bidi Saimon tego ogwa, aga bulu nogi Keriot. Te aga nogo si olama sągą badu si bidi te tomode, tialima, nosali te Judas agai Jisas boi bidi nogoba sela muaibao.