78
God aga we bidi dabe dali yali sę po wai
1 Eno hani bage dabe,
dagego eno po bugagia odao.
Dagego eno wainogo ebo poba olo bugagia muao.
2 Eno dageba te po dabe pusainu ebao.
Eno te haniani sę dabe te polobadu geme dualaluali sę
me te megi e sogoba usu nagasu, te po pusaibao,
tama eno te po dabego
page dagebolo pusaibao. * Mat 13:35
3 Polobadu te wąį nǫų dabego dabolo
te tiali sę dabe po wali,
tama dago odolama, tama dago te koneai dao.
4 Dago te po te dena wai dabeba
geme me dualugobeo.
Menio, te dago te gesi tamadi ame nabo
wai dabeba te po waibao.
Te dago Godigo genuai bomogo yali sę po pusaibao,
tama te bomai sę dabe me agai yali,
tama te bidigo isiąwai sę
te haniani bomai sę agai yai dao.
5 Godigo aga bomai po
te aga we bidi Israel dabebolo mawai.
Agai po te Jekipgo wąį nǫų dabebolo menama,
te augwa wali pomainu yai.
Agai te polobadu wąį nǫų dabebolo te tama po wai,
“Dagego te duga wai dabeba te eno bomai po tigidali
te bugagia ma mao,” po wai.
6 Tama tialima, te nosali pedalubo hani wai dabego
te nosali augwa me ola mayu,
tama te hanigo te augwa wai dabeba
te po omainao, te po wai.
7 Te augwa te tiwai eyu da, teda te hani dabego me te
Godiba konealubo homu dąų waibao,
tama agai te yali sę dabe
te augwaligo homu kone gegeda
pidali weyu, te tiwai yao.
Tama te augwa agai bomai po tigidali wali pomainu yao.
8 Tiyu, augwali te augwa wąį nǫų dabe
tobage tiwai pedelabuo.
Te wąį nǫų dabego te hagoma eyu,
tama Godigo po sela sąnama,
tama augwa konealubo homu agaba
dąų mu me wasiąwai,
tama augwaligo te agai po sesemane wali me pabeo.
9 Polobadu te Efraim dabego hwįani,
te enesigi enego te hwįai.
Tiali goli, te sogo te wąbi hodolama hwįbaso,
tama augwali wi pai dao.
10 Augwaligo te Godigo dąų walali
bomai po wali pisąyu,
tama augwaligo agai bomai po
wali pabo homu isiąwai dao.
11 Augwaligo te agai yali sę dabe
te homu kone gegeda pali,
tama te bidigo isiąwai bomai sę
agai te augwali gedude yai,
te me augwaligo gegeda pali.
12 Te wąį nǫų dabego gedude Godigo
bomai sę me deli te Soan bulu,
te Isip tǫ pedaide, yai dao. * Sai 7:8–12:32
13 Godigo te tamu ąį togolama,
tama tamu ąį te me badu buga siyu,
me badu buga siyu elama, dolaluali,
tama agai te Israel dabe tomodu
odasa palio. * Sai 14:21-22
14 Te giligade aga te pǫdu polasa pali,
tama hulide aga te sia ulade
te augwali asobodu polasa pai. * Sai 13:21-22
15 Agai te masigi tǫ bulude
te masigiba elama,
tama te wę aiyadu pedalumainu
elama, te augwaligo tuali.
16 Agai te masigide wę pedalumainu
elama, tama wę te busidu soabo
genuai wę tiwai soali. * Sai 17:1-7; Nam 20:2-13
17 Tiali goli, augwaligo te Ugwade Mu Bidibo Godiba
dwai sę yali,
tama augwali te kemi tǫ bulude
bidiyu, agaba hagoma yalio.
18 Augwaligo God usu siyu, te tiwai yai.
Augwaligo i bomonama agaba weyu,
te augwaligo wei ebo nai agai momainu yai.
19 Augwaligo te tiwai posobo po Godiba wali,
“Godigo dabolo te tǫ wa pai bulude
te nai hauwa mabo usu yaiba, agawe?
20 Mu tama, hasiabolo agai
te genuai masigiba elibaso, tama te wę pedelali.
Tiali goli, magi ebawe?
Agai dabolo te bret meba me
te tubo mi magowe?” wali.
21 Tialima, Genuai Bidigo augwaligo po odolama,
tama agai wado po wali.
Agai te Jekopgo hani dabeba te sia tula palali.
Tama agai wado po te genuai mu pedelalio.
22 Magi baso meni, augwaligo konealubo
homu agaba musiąwai.
Tama te agai augwali tau selama,
te bugagia bidimainu yaibao,
tede augwaligo agaba konealubo
homu dąų me wabeo.
23 Tiali goli, tagalao, agai te ugwadu elalubo dagaluba
po olama, tama te dagalu dalaluai dao.
24 Tialima, agai te nai mana tagala palama, tulalubosi,
te augwaligo selama, tuali.
Agai te dagalude nai te we bidi dabe augwaliba
mawai dao. * Jon 6:31
25 Tama tialima, augwa te enselgo nai salio.
Godigo te nai hauwa mu augwaliba menama,
tama augwali usu mu yai.
26 Tama nosali agai te giliga
pedalubo badu te wali hodolali,
tama agai bomogo naga,
agai te saut badu wali hodolali.
27 Tama agai te ba sibi hauwa mu
te tǫ hogomu tiwai me,
te nabis wę sande te kemi tiwai,
te augwali tomoba tulalumainu yai dao.
28 Godigo te ba dabe te augwa
bidalubo pesage tomoba tulalumainu ilali,
tama augwaligo ugwa be bagua salio.
29 Tama tialima,
te we bidi dabego tulama,
tama augwa mu pągąna peyu, tabia palio.
Te we bidi dabego sainu te gela wali nai,
te Godigo augwali manio.
30 Augwa te nai tutubo sę yai.
Mu tama, augwa te nai tula silisąbadi,
31 tama Godigo augwaliba wado po weyu,
tama te bomai bidi dabe ela muani,
te Israel wiegi yai ogwa bidi dabe dao.* Sai 16:2-15; Nam 11:4-23, 31-35
32 Godigo te bidigo isiąwai
te tobage bomai sę dabe yali,
tiali goli, te we bidi dabego
te dwai sę umabo mu idu geyu,
tama augwaligo konealubo homu
agaba dąų me wabeo.
33 Tialima, polo tama mu, te agai augwali dola silalio,
te pedauwalide mobo pedelama,
te polo pela silibo tiwai yalio.
Agai augwali polo tama mu dolama,
tama augwali isai dao.
34 Te Godigo meba ela mubo sogo,
te gasa bage ge neyu, augwa homu begelama,
tama agaba ma begasa aselama,
tama agaba gedu haluasa po bomonama walio.
35 Te megi da, augwaligo homugo ma koneama,
God te augwa tonalubo bidi dao homu yai.
Te Ugwadu Mu Bidibo Godigo agai
te augwali tau sabo bidi dao.
36 Tiali goli, augwa tibo po olama,
tama agaba te odolali pedauwalide
ąį soabo tiwai elama, daganobo po walio.
37 Augwaligo agai po wali me pabe,
tama augwaligo te aga dali dąų walali
bomai po bolama, togalio. * Tpi 8:21
38 Tiali goli, Godigo te olo tau mabo
wiegi yai kolesaga augwaliba elama,
tama augwaligo te dwai sęgę sela sąwani,
tama agai augwali me dolobeo.
Hauwa sogo te agai wado yali, te palia selama elalu,
tama augwaliba haliga sębę me ebeo.
39 Agai te tama tiwai homu augwaliba yai.
Augwali te we bidi naga tama tiwai,
augwali te wali aselama pabo tiwai ebao.
40 Hauwa sogo augwa hagoma eyu, agai po sela sąyu,
te bidi meni yai tǫ wa pai bulude bidiyu tiali.
Tama hauwa augwaligo aga haliga sęgę ilali.
41 Te Israel dabego God
te tedali gasa wiegi yai mu dao.
Tiali goli, hauwa sogo augwaligo aga usu sabo sę eyu,
tama agai wado yabo sę ilali.
42 Augwaligo te agai genuai bomo
teba homu konesiąwai,
tama agai augwali te boi bidi dabego
nogode ma sali, te sogoba augwaligo homu
kone me palobeo.
43 Te sogo agai te bidigo isiąwai bomai sę dabe
te Soan bulude yali, te Isip tǫ pedaide dao.
44 Godigo te wę dabede te kaneme
pedalumainu elama,
tama te Isip dabego tuainu yali usu me ebeo. * Sai 7:17-21
45 Tama agai te bolia hauwa,
me te gedeli hauwa te augwaliba tagala palai.
Tama te bolia dabego augwali gąų kela tuyu yali,
tama te gedeli dabego
te Isip bagego gide nai dabe
hauwa dolali. * Sai 8:1-6, 20-24
46 Tama Godigo te suma digi me,
kauwa bidi dabe me,
te kuli mano dabe dali tagala palama,
tama augwaligo te augwa gide nai dabe
tula silai. * Sai 10:12-15
47 Agai te talua ge tulubage tagala palama,
tama tego te augwaligo wain ni dabe dolali.
Tama agai te talua ge tulubagego te augwaligo ni kaya
dolomainu yai dao.
48 Agai te genuai tulubage,
te talua ge tulubage, tagala palama,
tama augwaligo bulmakau dabe ela muai dao.* Sai 9:22-25
49 Agai augwaliba te wado umabo mu
udubadi udubadi genama,
tama augwaliba te dene mu mawai.
Tama agai te ensel bidi meba tagala palama,
te augwali doligi pali,
tama augwali te sęgę genuai mu salio.
50 Agai augwaliba haliga sębę elama,
tama agai augwali me gogolobeo. Menio.
Agai te genuai gasi tagala palama,
tama augwali isila palio.
51 Agai te Isip hani tigidaligo te gomunai ogwa dabe
ela muna silali. * Sai 12:29
52 Tama agai te sipsip tonalubo bidi tiwai elama,
tama aga polasa peyu tama,
aga we bidi dabe tonaluali.
Tama te tǫ wa pai bulude agai augwaliba
te sunumi ola mawai. * Sai 13:17-22
53 Agai augwali odasa peyu,
tama augwali bugagia bidali,
tama tiyu, augwali wi me ebeo.
Tiali goli, te tamu ąįgo augwa
boi bidi dabe mesega salio. * Sai 14:26-28
54 Agai augwali te aga tǫba digi odasa asali.
Te bulu du te pesage te aga digi bomogo sali bulu dao.* Sai 15:17; Jos 3:14-17
55 Agai te gasa hani dabe te aga hani dabe asobo si,
te augwali sela sąwani.
Tama agai te tǫ te Israel hani dabeba doba yali.
Tama agai augwali te augwa ugwa be dabede
bugagia bidimainu yai dao. * Jos 11:16-23
56 Tiali goli, te Israel dabego
te Ugwadu Mu Bidibo God usu selama,
tama agaba hagoma yai.
Augwaligo agai bomai po
wali me pisąwai. * Tob 2:11-15
57 Augwa hagoma elama, agai po sela sąwani,
te augwa wąį nǫų dabego
te polobadu yali tiwai yalio.
Augwali te gagea pai enesigi
te enebo dolo pisąbo tiwai yai dao.
58 Augwaligo te tibo godigo alta dabe nigali,
tama te tebogo te Godigo wado po omainu ilali.
Augwaligo te tibo god dabe nigilama ebaso,
tama Godigo augwaliba dwai haliga yai dao.
59 Godigo augwaligo te tebo kolesaga sulama,
tama agai augwaliba haliga sębę dwai mu yai,
tama tibaso agai te Israel dabe tudiba mu muanio.
60 Tama agai te aga Silode elaluali ugwa be tagalalio.
Te bede aga te we bidi dabe tomode bidali.* Jos 18:1; Jer 7:12-14; 26:6
61 Tama agai te boi bidi dabego
te dąų walali bomai po muani halobage,
te bokis kontrak, sela pomainu ilali.
Te bokis halobagede augwaligo
te agai bomo me ula suali. * 1 Sml 4:4-22
62 Agai te aga we bidi dabeba wado po olama,
tama te boi bidi dabego
augwali ela mumainogo yai dao.
63 Te gesi ogwa bidi dabe
te genuai boi hwįani madi isali,
tama te gesi ogwa we wegi dabe
te augwali sabo bidi dabe meni yai dao.
64 Te boi bidi dabego te pris dabe ela mubaso,
tama augwa we dabego
te augwalide homu dene eyu,
tama gela wainu ebo te usu ebeo.
65 Tialima, megi da, Genuai Bidi hodaluali,
te bidi betde pilama hodalubo
tiwai gilama yali, tama te bomai bidigo
te wain wę hauwa tulama, tama te i hai ola bilibo
tiwai gilama yali.
66 Tama agai te boi bidi dabe dali hwįnama,
tama augwa asaliba ma pobeasa pali.
Agai augwali aiyaba mu elalubaso,
tama augwali hale dwai mu yali,
tama augwaligo ma hwįabo usu ebeo.
67 Tiali goli, agai te Josepgo
wąį nǫų hani bage te wei isiąwai,
tama agai te Efraimgo hani bage
te sa me mubeo. Menio.
68 Agai te Juda hani bage dali,
te Saion bulu dali sa muani, te bulu du te agai
wei mu ebo bulu dao.
69 Agai te aga genuai tempel be te bulu dude nigali,
te aga dagalude elalubo be tiwai.
Tama agai te tempel be sesemane
te bomo dali elalumainu yali,
te e tǫ dili dąų elalubo tiwai gilama emainu yai dao.
70 Godigo Devit sa muani,
te aga sę bidi, tama aga selama,
te genuai sipsip dabe tonalubo sę me,
te sipsip wai dabe
tonalubo sę emainu sa muai dao.
71 Tama Godigo aga
te Israel king bidi mubaso bidali,
tama aga te Godigo we bidi
tonalubo bidi bidai dao.* 1 Sml 16:11-12; 2 Sml 7:8; 1 Sto 17:7
72 Devitgo te aga sęba naga homu kone palama,
tama augwali bugagia tonaluai.
Tama aga te augwaligo
wiegi yai polalubo bidi bidai dao.