Elifasgo polasa wali po
4
(Dąį 4–5)
Godigo doloba pai bidi tau siyu, te dwai sę ebo we bidi aiyaba elalubo dao
1 Elifas te Teman hanu bidi agai Jopgo wali po oda silama, agai po wei ponoyu, te po wali,
2 “Jop, eno po dwasianu nage dali waibao.
Ma, tama eno tama tiyu da,
teda nago ena dali wado yaibawe, ma meniwe?
Tiali goli, tagala, eno penane panialugobeo.
3 Eno koneani, nago dwagi yai homu
we bidi hauwabolo mani.
Tama nago bomo menia we bidi bomo ma ilali.
Tede nago homu kone palao.
4 Te we bidi genuai sęgę selama, tǫba tulaluai goli,
nago augwalibolo dwagi yai po mawai.
Tama nago te pogo augwali ma hodolai dao.
Tama augwali ma bomo elama
dolalumainogo nago augwali tau sali.
5 Tiali goli, hobede mu dwali.
Megi dwai sęgęgo mu nage te mesegelai yaba.
Tama nage noma siyu,
nago homu sęgę genuai mu te eba.
Awe, te sęgę nageba pedalubaso, nage noma mu sali.
6 Nage Godigo po wali peyu, tama agade lotu po weyu,
tama aga dologode naga bidiyu eyu yaide,
nago dwagi yai doloba pai kolesaga
tigidali sogo eyu ebo da.
Tama megi me nago agade homu dąų walama,
tama agai nage ma tau somainu yao,” wali.
7 “Jop, nago koneani,
we bidi me dwagi yai kolesaga eyu,
dwai kolesaga menia, te bidi dolama isaliwe?
Ma, te doloba pai we bidi olo dolaliwe?
Teda meni homu eba.
8 Tiali goli, eno suali,
dwai kolesaga hauwa ebo bidi dabe da,
te bage da dwai kolesaga wali peyu,
augwali sęgę hauwa wali peyu ebo.
Te e tiwai dao, bidigo aga gide dwagi yai nai wai
bulama,
tama te dwagi yai nai sabo tiwai,
ma te bidigo dwai nai wai bulama,
tama te dwai nai sabo tiwai.
9 Godigo te dwai sę ebo bidi dali sębę elama,
tama augwali mu dolama,
tama augwali mu silibo dao.
Te e tiwai dao, isigo ni ulama sia sabo tiwai dao.
10 Dwai bidi dabego gasa bidi dolama,
dwagi yai homu ebo,
te bulu yowi laiongo bulu hasa
ela munama, hai wabo tiwai ebo dao.
Tiali goli, Godigo te bidi dabe aiyaba
elaluama, sęgę mena tagalobo dao.
Tama augwali te bulu yowi laion tiwai dao,
te augwaligo kele degelama,
te bulu hasa ma ela tuabo usu meni ebo dao.
11 Tama te bulu yowi laion aga tuabo nai meniama,
tama isibosi, augwaligo wai dabe wi tedela pabo.
Te tiwai te dwai bidi dabe tigide ebo dao,”
Elifasgo te po wali.
Bidi me deli Godigo gedude dwai kolesaga isąwai bidi meni dao
12 Tama Elifas agai po genina mu ma weyu, te po wali,
“Me sogo po me dua digi mu ena pageba sabolali.
Pąde mu tama te po odabo ąǫ ebe.
13 Te po eno hulide sali.
Te bidi dabe sese mu godege pilama tomo mu igi paide.
Ena pila mubadi yaide, te haniani kolesaga
eno tobolude iba oba ida wali.
14 Tama tibadi yaide, magi nai mego eno tigi wi ilama,
tama eno tigi noma geninama mu sali.
15 Tama dwasianu wali eno gesabididu
aselama, eno gesabidi pona sąyani.
Teda ena wi genuai mu elama,
tama eno tigi nisi hodaluali.
16 Eno magi nai me dolalubo suali.
Tama tibaso, eno gedu dilasa mu tonali.
Tama te nai eno bugagia koneabo ąǫ ebe,
tama eno kilikili me me odobe.
Tiali goli, nosali eno po me odali, te pogo e tama wali,
17 ‘Godigo tigidali we bidi nigai dao.
Tama augwali aga dologode bidibao.
Tama God agai gedude doloba pai
bidi me bidibeo, te God aga tiwai.
18 Te Godigo ensel mobo bidi dabe
God aga dali bidiyu, sę agade ebo.
Tiali goli, me sogo augwaligo augwa sę
bugagia me ebo menio.
Godigo subo da, te ensel mobo bidi dabe
me sogo bugagia me bidibo menio.
19 Tiali goli, bidi dabe da, e tǫde olo nai dao.
Nago homu bidigo ensel bidi edelama,
Godigo gedude doloba pai bidi bidaibawe?
Godigo e tǫde bidigo tigi nigai dao.
Tama augwali polo isibo da,
te ba bogǫų bidigo sągą agala sabo tiwai dao.
20 Bidi me deli kigamu bugagia bidiyu,
tama pio aga isilama, tama me badu we bidigo aga
mu gegeda palaiba, agawe?
21 Te bidi dabe dwagi yai kolesaga sisąbadi yaide,
te isibo augwaliba polo sabolobo dao,
te sel ugwa be te bono pįsįgana palobo si,
tǫba polo tulalubo tiwai ebo dao,” wali.